សាលាល្អ! សិស្សពូកែ១៨នាក់នៅកំពង់ឆ្នាំង មានដល់ទៅ១៧នាក់ចេញពីវិទ្យាល័យព្រះបាទសុរាម្រឹត

ជាតិ

សាលាល្អ! សិស្សពូកែ១៨នាក់នៅកំពង់ឆ្នាំង មានដល់ទៅ១៧នាក់ចេញពីវិទ្យាល័យព្រះបាទសុរាម្រឹត

07, Apr 2023 , 9:59 pm

រូបភាព

រូបតំណាងពីហ្វេសប៊ុកវិទ្យាល័យព្រះបាទសុរាម្រឹត

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ សិស្សវិទ្យាល័យព្រះបាទសុរាម្រឹតចំនួន ១៧នាក់ បានប្រឡងជាប់សិស្សពូកែទូទាំងខេត្តកំពង់ឆ្នាំង ក្នុងចំណោមជ័យលាភី ១៨នាក់។ លោកស្រី លឿង បញ្ញាវុឌ្ឍ នាយិកាស្ដីទីវិទ្យាល័យព្រះបាទសុរាម្រឹត ខេត្តកំពង់ឆ្នាំង ប្រាប់សារព័ត៌មានថ្មីៗ តាមទូរសព្ទថា នេះជាលើកទី១ ដែលសាលាមានសិស្សជាប់ច្រើនលើសសាលាដទៃបែបនេះ។

នៅថ្ងៃទី៣០ មីនាកន្លងទៅ មន្ទីរអប់រំ យុវជន និងកីឡា ខេត្តកំពង់ឆ្នាំង បានរៀបចំការប្រឡងសិស្សពូកែថ្នាក់ខេត្ត លើមុខវិជ្ជាអក្សរសិល្ប៍ខ្មែរ, គណិតវិទ្យា និងរូបវិទ្យា សម្រាប់សិស្សថ្នាក់ទី៩ និងថ្នាក់ទី១២។ ការប្រឡងសិស្សពូកែខាងលើ មានសិស្សចូលរួមចំនួន ១៧០នាក់ មកពីសាលារដ្ឋ និងឯកជនចំនួន ១៦នៅទូទាំងខេត្ត។

លទ្ធផលសិស្សពូកែទូទាំងខេត្តកំពង់ឆ្នាំង

ការប្រឡងសិស្សពូកែទូទាំងខេត្តកំពង់ឆ្នាំង បានរកឃើញជ័យលាភីចំនួន ១៨នាក់ សម្រាប់ចូលរួមប្រឡងសិស្សពូកែទូទាំងប្រទេសនៅខេត្តបាត់ដំបង នាថ្ងៃទី១២ មិថុនាខាងមុខ។ បើតាមសេចក្ដីសម្រេចស្ដីពីការទទួលស្គាល់សិស្សពូកែទូទាំងខេត្តកំពង់ឆ្នាំងរបស់មន្ទីរអប់រំចេញផ្សាយនៅព្រឹកថ្ងៃទី៧ មេសានេះ ក្នុងចំណោមជ័យលាភី ១៨រូប មានសិស្សវិទ្យាល័យព្រះបាទសុរាម្រឹត ១៧រូប និងសិស្សមកពីអនុវិទ្យាល័យពន្លៃចំនួន ១រូប។

លោកស្រី លឿង បញ្ញាវុឌ្ឍ នាយិកាស្ដីទីវិទ្យាល័យព្រះបាទសុរាម្រឹត លើកឡើងថា សិស្សវិទ្យាល័យនេះ តែងចូលរួមប្រឡងសិស្សពូកែជារៀងរាល់ឆ្នាំ ប៉ុន្តែឆ្នាំនេះ មានសិស្សពូកែប្រឡងជាប់ច្រើន។ លោកស្រី បង្ហាញក្ដីរីករាយដូច្នេះ៖«ខ្ញុំសប្បាយចិត្ត និងមោទកភាព។ កូនសិស្សទាំងអស់ ជាកូនរបស់ខ្ញុំ ទឹកចិត្តរបស់ខ្ញុំគឺបែបនេះ។ លោកគ្រូ អ្នកគ្រូរបស់ខ្ញុំក៏ដូចគ្នាដែរ គឺសប្បាយចិត្តទាំងអស់គ្នា»។

លោកស្រី លឿង បញ្ញាវុឌ្ឍ នាយិកាស្ដីទីវិទ្យាល័យព្រះបាទសុរាម្រឹត។ រូបភាពពីហ្វេសប៊ុកវិទ្យាល័យព្រះបាទសុរាម្រឹត

នៅពេលចេញលទ្ធផលឃើញវិទ្យាល័យព្រះបាទសុរាម្រឹត មានសិស្សជាប់ច្រើន លោកស្រី បញ្ញាវុឌ្ឍ ភ្ញាក់ផ្អើលខ្លាំង ចំពោះការខិតខំរបស់សិស្ស និងគ្រូ នាពេលកន្លងមក។ «ខ្ញុំមានជំនឿជឿជាក់ ថាសិស្សរបស់ខ្ញុំអាចទទួលបានជ័យលាភីទូទាំងប្រទេស។ ជារៀងរាល់ឆ្នាំ សិស្សរបស់ខ្ញុំ តែងមានជានិច្ច ឆ្នាំទៅក៏មានដែរ»។ នេះជាក្ដីសង្ឃឹមរបស់នាយិកាស្ដីទី ពីការទទួលបានជ័យលាភីសិស្សពូកែនៅទូទាំងប្រទេស។

បើតាមលោកស្រី បញ្ញាវុឌ្ឍ កត្តានាំឱ្យវិទ្យាល័យព្រះបាទសុរាម្រឹតមានសិស្សពូកែច្រើន កើតឡើងតាមរយៈការសម្រួចសិស្សតាំងពីថ្នាក់ទី៧មកម៉្លេះ។ លើសពីនេះ លទ្ធផលដែលទទួលបាននៅពេលនេះ កើតចេញពីការប្រឹងប្រែងរបស់សិស្សានុសិស្ស លោកគ្រូ អ្នកគ្រូ និងអាណាព្យាបាល។

លោក ស៊ឹម ប្រិម ប្រធានមន្ទីរអប់រំ យុវជន និងកីឡា ខេត្តកំពង់ឆ្នាំង បានឱ្យសារព័ត៌មានថ្មីៗដឹងថា៖ «តាមពិតទៅ គេបានបណ្ដុះបណ្ដាលសិស្សទាំងនោះ តាំងពីថ្នាក់ទី៧មកម៉្លេះ។ ដូច្នេះសិស្សខិតខំប្រឹងប្រែងរៀនសូត្រ និងមកពីការទំនុកបម្រុងរបស់អាណាព្យាបាលផង»។

លោក ស៊ឹម ប្រិម ប្រធានមន្ទីរអប់រំ យុវជន និងកីឡា ខេត្តកំពង់ឆ្នាំង។ រូបភាពពីហ្វេសប៊ុកមន្ទីរអប់រំ យុវជន និងកីឡា ខេត្តកំពង់ឆ្នាំង

ត្បិតសាលាមួយចំនួន មិនបានជាប់ជ័យលាភីទូទាំងខេត្ត ប៉ុន្តែប្រធានមន្ទីរអប់រំខេត្តកំពង់ឆ្នាំង មើលឃើញសិស្សបានខំប្រឹងប្រែងដូចគ្នា គ្រាន់តែសិស្សនៅទីក្រុងអាចរៀនបានច្រើនជាង។ ប្រធានមន្ទីរអប់រំរូបនេះ សង្ឃឹមថា ឆ្នាំនេះ សិស្សនឹងទទួលបានមេដាយច្រើនជាងឆ្នាំមុនផងដែរ។

សូមបញ្ជាក់ថា កាលឆ្នាំ២០២២ ខេត្តកំពង់ឆ្នាំង មានសិស្សប្រឡងជាប់សិស្សពូកែទូទាំងប្រទេសចំនួន ៥នាក់ ក្នុងនោះសិស្សវិទ្យាល័យព្រះបាទសុរាម្រឹតមានចំនួន ២នាក់, វិទ្យាល័យក្រុងកំពង់ឆ្នាំង ១នាក់, វិទ្យាល័យ ហ៊ុន សែន រលាប្អៀង ១នាក់ និងអនុវិទ្យាល័យទន្លេក្រៅ ១នាក់៕