ជាតិ
ភ្នំត្បែង ទឹកធ្លាក់ព្រះនិម្មិត និងបរិវេណសាលាខេត្តព្រះវិហារ នឹងរៀបចំសង្រ្កាន្ត ដោយសម្ដែងសិល្បៈបុរាណ និងល្បែងប្រជាប្រិយខ្មែរ រូបភាពពី មន្ទីរទេសចរណ៍ខេត្តព្រះវិហារ
×
ភ្នំពេញ៖ រដ្ឋបាលខេត្តព្តះវិហារ នឹងរៀបចំកម្មវិធីសង្ក្រាន្តឆ្នាំថ្មី នៅ៣ទីតាំងធំៗ គឺភ្នំត្បែង ទឹកធ្លាក់ព្រះនិម្មិត និងបរិវេណសាលាខេត្ត ក្រោយខកខានរយៈពេល២ឆ្នាំ។ ព្រឹត្តិការណ៍ជាលក្ខណៈទ្រង់ទ្រាយធំនេះ ធ្វើឡើងនៅថ្ងៃទី១៤-១៦ ខែមេសា ក្នុងគោលបំណងដើម្បីផ្សព្វផ្សាយសម្បត្តិវប្បធម៌ជាតិ និងបង្ហាញពីភាពរីកចម្រើនរបស់ខេត្តព្រះវិហារ។
លោក គង់ វិបុល ប្រធានមន្ទីរទេសចរណ៍ បាននិយាយថា «សង្រ្កាន្តខេត្តព្រះវិហារ» ក្នុងបរិវេណសាលាខេត្ត គឺមានទីឆ្លាធំទូលាយដែលងាយស្រួលលេងកម្សាន្ត ការលេងល្បែងប្រជាប្រិយខ្មែរគ្រប់ប្រភេទ ដូចជា របាំប្រពៃណីជាតិខ្មែរ, ការរាំកម្សាន្ត, កម្មវិធីប្រគុំតន្ត្រី, បោះអង្គញ់, ទាញព្រ័ត្រ និងទម្រង់សិល្បៈបែបបុរាណ។
លោក គង់ វិបុល បានបន្ថែមថា ទីតាំងភ្នំត្បែង និងទឹកធ្លាក់ព្រះនិម្មិត ក៏រៀបចំសង្រ្កាន្តដែរ។ ចំពោះទីតាំងទាំង២នេះ នឹងរៀបចំតុបតែងភ្លើងលម្អ និងការប្រគំតន្រ្តី លេងល្បែងប្រជាប្រិយ រយៈពេល៣ថ្ងៃដូចគ្នា។ « ភ្ញៀវនឹងមកលេងច្រើនជាងឆ្នាំមុន ពីព្រោះខេត្តយើងសម្បូរ តំបន់គោលដៅទេសចរណ៍ជាច្រើន ជាពិសេសឆ្នាំនេះយើងមានព្រឹតិត្តការណ៍សង្រ្កាន្ត»។ប្រធានមន្ទីរទេសចរណ៍ រំពឹងបែបនេះ។
ប្រធានមន្ទីរទេសចរណ៍រូបនេះ បន្តថា នៅតាមទីវត្តអារាម និងសាលារៀននានា ទូទាំងខេត្តព្រះវិហារ ក៏មានរៀបចំកម្មវិធីសង្រ្កាន្តតាមតំបន់រៀងៗខ្លួនផងដែរ។ យ៉ាងណាមិញ នៅពេលរាត្រី ភ្ញៀវទេសចរ អាចរាំលេងកម្សាន្ត ទស្សនាការប្រគំតន្ត្រី ការតាំងពិព័រណ៍ផលិតផល នៅទីតាំងសាលាខេត្ត ។
អាជ្ញាធរ និងអង្គភាពជុំវិញខេត្ត កំពុងរៀបចំហេដ្ឋារចនាសម្ព័ន្ធក្នុងខេត្ត និងតាមរមណីយដ្ឋានទេសចរណ៍ នឹងរៀបចំលម្អភ្លើងពណ៌ ដើម្បីស្វាគមន៍ទេសចរក្នុងថ្ងៃសង្ក្រាន្តខាងមុខ។ ដោយឡែក ទេសចរដែលមកកម្សាន្តក្នុងខេត្តព្រះវិហារ មានដូចជា ប្រាសាទព្រះវិហារ, ប្រាសាទកោះកែរ, ប្រាសាទព្រះខ័នកំពង់ស្វាយ, តំបន់សត្វស្លាប, ទឹកជ្រោះព្រះនិម្មិត និងភ្នំត្បែង។ នេះជាការបញ្ជាក់បន្ថែមរបស់លោក គង់ វិបុល។
សូមបញ្ជាក់ដែរ រដ្ឋបាលខេត្តព្រះវិហារ ក៏បានណែនាំដល់ម្ចាស់អាជីវកម្មពង្រឹងការទុកដាក់សំរាមឱ្យមានសណ្តាប់ធ្នាប់ និងពង្រឹងអាជីវករទាំងអស់ឱ្យរក្សាតម្លៃ និងគុណភាពម្ហូបអាហារ កុំដំឡើងថ្លៃក្នុងពិធីបុណ្យចូលឆ្នាំខ្មែរ៕
Tag:
សង្រ្កាន្តខេត្តព្រះវិហារ
© រក្សាសិទ្ធិដោយ thmeythmey.com