ជាតិ
អភិបាលខេត្តមណ្ឌលគិរី ទុកពេល១៥ថ្ងៃ ឱ្យម្ចាស់ដីនៅភូមិឡៅរមៀត ទៅពិនិត្យឯកសារវិនិច្ឆ័យប្លង់ដី លោក ថង សាវុន អភិបាលខេត្តមណ្ឌលគិរី។ រូបពី ហ្វេសប៊ុករបស់លោក សាវុន
× ភ្នំពេញ៖ អាជ្ញាធរ នឹងបិទឯកសារវិនិច្ឆ័យប្លង់ដីតំបន់ភូមិឡៅរមៀត ឃុំក្រង់តេះ ស្រុកពេជ្រាដា ខេត្តមណ្ឌលគិរី ជាសាធារណៈ ដើម្បីឱ្យម្ចាស់ដី ពិនិត្យ និងដាក់ពាក្យជំទាស់ សម្រាប់កែតម្រូវឡើងវិញ ចាប់ពីថ្ងៃទី១៩មេសា ដល់ថ្ងៃទី៣ឧសភា។
លោក ថន សាវុន អភិបាលខេត្តមណ្ឌលគិរី ចេញសេចក្ដីជូនដំណឹង ពីការបិទផ្សាយជាសាធារណៈនូវឯកសារនៃការវិនិច្ឆ័យ។ អភិបាលខេត្តមណ្ឌលគិរី ប្រាប់ម្ចាស់ដី រួមទាំងមន្ទីរ ស្ថាប័នពាក់ព័ន្ធនៅតំបន់វិនិច្ឆ័យ ភូមិឡៅរមៀត ឃុំក្រង់តេះ ស្រុកពេជ្រាដាថា គណៈកម្មការរដ្ឋបាល នឹងបិទផ្សាយជាសាធារណៈ ពីឯកសារសុរិយាដី និងបញ្ជីឈ្មោះអ្នកកាន់កាប់ដី ដែលក្រុមការងារប្រតិបត្តិកម្មវិធីបានវាស់វែង និងប្រមូលទិន្នន័យនាពេលកន្លងមក។
ហេតុនេះ អភិបាលខេត្តអំពាវនាវ អ្នកពាក់ព័ន្ធខាងលើ ទៅពិនិត្យទិន្នន័យ ដើម្បីបញ្ជាក់ពីភាពត្រឹមត្រូវ ឬខុសឆ្គង សម្រាប់កែតម្រូវឬជំទាស់លើទិន្នន័យទាំងនោះ ក្នុងរយៈពេល១៥ថ្ងៃ នៅផ្ទះលោកកើចប្រាលា មេភូមិឡៅរមៀត។ លោកសង្កត់ធ្ងន់ថា៖ «ផុតរយៈពេលកំណត់ ខាងលើ គណៈកម្មការរដ្ឋបាលសន្មត់ថាទិន្នន័យដែលបានបើកចំហ ជូនពិនិត្យជាសាធារណៈនេះ មានភាពត្រឹមត្រូវហើយមិនអាចជំទាស់ ឬតវ៉ានៅពេលក្រោយបានឡើយ»។
នៅពេលផុតកំណត់ការបិទផ្សាយជាសាធារណៈនេះ គណៈកម្មការរដ្ឋបាលនឹងបូកសរុបលើកសំណើផ្ដល់សិទ្ធិកាន់កាប់ដីធ្លីទៅរដ្ឋបាលខេត្ត ដើម្បីពិនិត្យហើយបញ្ជូនទៅរដ្ឋបាល សុរិយោដី។ បន្ទាប់មក នឹងចេញប័ណ្ណសកម្មសិទ្ធិ ដល់ម្ចាស់ដីស្រប់ច្បាប់៕
© រក្សាសិទ្ធិដោយ thmeythmey.com