ជាតិ
សង្រ្កាន្តឆ្នាំថ្មី
×![]()
ដោយ: រួបរួម
វេលាម៉ោង៤ ថ្ងៃសុក្រ ៩រោច ខែចេត្រ ពុទ្ធសករាជ២៥៦៦ ត្រូវនឹងថ្ងៃទី១៤ ខែមេសា ឆ្នាំ២០២៣ នេះ ជាថ្ងៃចូលឆ្នាំថ្មីប្រពៃណីជាតិ ឆ្នាំថោះ បញ្ចស័ក។ នេះបើតាមសៀវភៅមហាសង្ក្រាន្ត ដែលរៀបរៀងដោយ លោក អ៊ឹម បុរិន្ទ អ្នកស្រាវជ្រាវវិជ្ជាហោរាសាស្ត្រខ្មែរ ចិន សកល និងជានាយកនៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ។
សម្រាប់ឆ្នាំថ្មី ឆ្នាំថោះនេះ មគ្គនាយិកា គឺព្រះនាង កិមិរាទេវី រាជបុត្រីទី៦ នៃកបិលមហាព្រហ្ម ដែលត្រូវមកគ្រប់គ្រងផែនដី ជម្ពូទ្វីប។ តាមក្បួនតម្រា ព្រះនាងទ្រង់អម្ពរពណ៌សេត (ស) លម្អនៅព្រះកាណ៌ដោយសៀតផ្កាចង្កុលណី ព្រះហស្តស្តាំទ្រង់ព្រះខ័ន្ធ ព្រះហស្តឆ្វេងទ្រង់ពិណ ដោយគង់លើអង្គុតពាក់ឆៀងបើព្រះនេត្រនៅលើខ្នងមហឹង្សា (ក្របី) ដែលជាយានពាហនៈ។
ព្រះនាង កិមិរាទេវី ទទួលតំណែងបន្តព្រះនាង កិរិណីទេវី។ បើតាមក្បួនហោរារបស់លោក អ៊ឹម បុរិន្ទ ទេវតាឆ្នាំនេះ សោយ ចេកណាំវ៉ា ដែលជាភក្សាហារ ត្រូវបានកំណត់តាំងពីបុរាណរៀងមក។
ថ្ងៃចូលឆ្នាំ ជាថ្ងៃវារៈមហាសង្រ្កាន្ត បន្ទាប់មកនៅថ្ងៃសៅរ៍ ១០រោច ខែចេត្រ ត្រូវនឹងថ្ងៃទី១៥ មេសា ជាវារៈវ័នបត ខណៈថ្ងៃអាទិត្យ១១រោច នាវេលាយប់ម៉ោង៨ ២នាទី និង២៤វិនាទី ជាវារៈឡើងស័ក គម្រប់ជាសង្ក្រាន្ត៣ថ្ងៃស្រេចបរិបូរណ៍ ដោយចូលជាសកលឆ្នាំថោះ បញ្ចស័ក មហាសករាជ១៩៤៥ ចុល្លសករាជ ១៣៨៥តទៅ។
លោក អ៊ឹម បុរិន្ទ ដែលសរសេរសៀវភៅក្បួនហោរាសាស្ត្រ មហាសង្ក្រាន្ត តាំងពីឆ្នាំ១៩៩៤ មក បានណែនាំដល់ពលរដ្ឋប្រុសស្រី រៀបចំគ្រឿងសក្ការបូជា អុជប្រទីបជា្វលា ថ្វាយព្រះរតនត្រ័យ លះបង់ចិត្តអាក្រក់ គំនុំគំកួន ព្យាបាទ ឈ្នានីស ហើយតាំងចិត្តប្រព្រឹត្តល្អប្រកបដោយករុណា មុទិតា ឧបេក្ខា និងបញ្ញា៕
Tag:
ចូលឆ្នាំ
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 ថ្ងៃ
