ជាតិ
ក្រសួងសាធារណការ កំពុងរកថវិកាទិញដើមឈើទៅដាំនៅសួនបណ្តោយផ្លូវជាតិលេខ៣ឡើងវិញ សួនច្បារពុះចែកទ្រូងផ្លូវជាតិលេខ៣
× រដ្ឋមន្រ្តីក្រសួងសាធារណការនិងដឹកជញ្ជូន កំពុងស្វែងរកថវិកាដើម្បីទិញដើមឈើយកទៅដាំនៅសួនច្បារពុះចែកទ្រូងផ្លូវតាមបណ្ដោយផ្លូវជាតិលេខ៣ឡើងវិញ បន្ទាប់ពីកូនឈើដែលបានដាំកន្លងមកបានងាប់អស់ដោយសារខ្វះការថែទាំ និងស្រោចទឹកបានត្រឹមត្រូវ។
នាពេលថ្មីៗនេះ កូនឈើដែលបានដាំនៅសួនច្បារពុះចែកទ្រូងផ្លូវតាមបណ្ដោយផ្លូវជាតិ លេខ៣ ខ្វះការថែទាំ និងស្រោចទឹកត្រឹមត្រូវ រួមផ្សំជាមួយនឹងការកើនឡើងកំដៅថ្ងៃ បានបណ្ដាលឱ្យដើមឈើនៅក្នុងសួរច្បារទាំងនោះ ងាប់អស់គ្មានសល់។
បច្ចុប្បន្នលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានចាត់តាំងឱ្យ ក្រុមការងារ របស់លោករកថវិកា ដើម្បីទិញកូនឈើទៅដាំនៅទីនោះ ឡើងវិញ បន្ទាប់មកនឹងបែងចែកឱ្យអាជ្ញាធរតាមខេត្តនីមួយៗ ស្រោចទឹក និងថែទាំនៅលើដីរបស់ខ្លួនឱ្យបានល្អ ។
លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន។ រូបភាព៖ ក្រសួងសាធារណការ
លោក ស៊ុន ចាន់ថុល បានបញ្ជាក់ថា៖ «ការដាំដើមឈើនៅចំពាក់កណ្ដាលផ្លូវនេះ មិនមែន ដាំលម្អភ្នែកនោះទេគឺដាំដើម្បីទប់ស្កាត់កុំឱ្យភ្លើងឡាន ឬរថយន្តចាំងភ្នែកពេលបើកបរ
ដូច្នេះដើមអ្វីដែលអាចជួយបាំងពន្លឺបាន នឹងត្រូវទិញយកមកដាំ។ យើងនឹងទិញដើម ឈើណាដែលមានស្លឹកច្រើនអាចជួយទប់ស្កាត់ចាំងភ្នែក និងជួយកាត់បន្ថយគ្រោះថ្នាក់ ចរាចរណ៍»។
សូមជម្រាបថាខេត្តដែលជាប់ជាមួយផ្លូវជាតិលេខ៣ មានរាជធានីភ្នំពេញ ខេត្តកណ្ដាល តាកែវ កំពង់ស្ពឺនិងខេត្តកំពត៕
Tag:
ដើមឈើ
ផ្លូវជាតិលេខ៣
© រក្សាសិទ្ធិដោយ thmeythmey.com