ក្នុងបទសម្ភាសផ្ទាល់ជាមួយសារព័ត៌មានថ្មីៗ នៅថ្ងៃទី២០ ខែមេសា ឆ្នាំ២០២៣ កីឡាករប្រដាល់គុនចម្រុះជនជាតិអាហ្រ្វ៊ិកខាងត្បូង Emmanuel Onyedikachi លើកឡើងថាខ្លួនបានមករស់នៅប្រទេសកម្ពុជាជាង១០ឆ្នាំមកហើយ និងបានចាប់ចិត្តជាមួយ«ក្បាច់គុនបុរាណខ្មែរ» តាំងពីពេលនោះមក។

 

កីឡាករ Emmanuel Onyedikachi ឬ ម៉ានូ សិល្បៈ រៀបរាប់ថា៖«ខ្ញុំហាត់គុនខ្មែរជាមួយ ចាន់ រតនា តាំងពីឆ្នាំ២០០៨ ខ្ញុំហាត់បាន៨ខែខ្ញុំសុំប្រកួត។ បន្ទាប់មកគេឱ្យខ្ញុំវាយនៅក្រៅស្រុកហើយខ្ញុំវាយតំណាងកម្ពុជា និងគុនខ្មែរតាំងពីពេលនោះមក»។ ការប្រកួតតំណាងគុនខ្មែរ និងប្រទេសកម្ពុជានេះដែរ ម៉ានូ អះអាងថាខ្លួនវាយដោយក្តីស្រលាញ់ចេញពីបេះដូងព្រោះគុនខ្មែរមានភាពវិសេសដែលធ្វើឱ្យខ្លួនចាប់អារម្មណ៍។

 

កីឡាករវ័យ ៣៧ឆ្នាំ បន្តថា៖«សម្រាប់វិស័យគុនខ្មែរ ខ្ញុំចូលចិត្តប្រដាល់សកល កីឡាក្នុងទ្រុង MMA ប៉ុន្តែខ្ញុំស្រលាញ់គុនខ្មែរច្រើនជាង ព្រោះគុនខ្មែរគេប្រើក្បាច់ច្រើន ប្រើកែង ជង្គងង់ ជើង ហើយអត់សូវប្រើកម្លាំងទេ តែប្រើខួរក្បាល»។

 

សូមបញ្ជាក់ថា កីឡាករគុនចម្រុះ Emmanuel Onyedikachi មានប្រវត្តិប្រកួតក្នុងស្រុក និងក្រៅស្រុក៥៧លើក ឈ្នះ៥០លើក និងចាញ់៧លើក ប្រកួតចុងក្រោយយកឈ្នះកីឡាកររុស្ស៊ី DARA ដោយវាយឱ្យសន្លប់ទឹកទី៣ លើប្រភេទទម្ងន់ ៨៨គីឡូក្រាម៕