ថ្លែងប្រាប់សារព័ត៌មានថ្មីៗតាមសារអេឡិចត្រូនិកនៅថ្ងៃទី២១ ខែមេសា លោក សេង ប៊ុនសុង ប្រតិភូអមដំណើរនាយបេសកកម្មដង្ហែភ្លើងគប់ស៊ីហ្គេម-អាស៊ានប៉ារ៉ាហ្គេម មើលឃើញការចូលរួមរបស់មន្រ្តីកីឡា និងអត្តពលិកនៃប្រទេសមីយ៉ាន់ម៉ា ចូលរួមច្រើនដែលនេះអាចថាមានចំនួនច្រើនលើសពីប្រទេសមុនៗ។

 

លោក សេង ប៊ុនសុង និយាយថាមានមនុស្សច្រើនប្រហែល១៥០០នាក់ ដែលបានចូលរួមដង្ហែភ្លើងគប់នៅប្រទេសមីយ៉ាន់ម៉ា និងពិសេសការឈរអមនៅតាមសងខាងផ្លូវ ការលេងរបាំ ឆៃយ៉ាំកំដរតាមដងផ្លូវដល់ទីបញ្ចប់។

 

បើទោះមានការចូលរួមច្រើន ប៉ុន្តែលោក ប៊ុនសុង អះអាងថាចំពោះសុវត្ថិភាពវិញ ក្នុងពិធីដង្ហែរភ្លើងគប់ស៊ីហ្គេមមានភាពប្រើសើរ ដោយមានសន្តិសុខការពារបានល្អ។

មីយ៉ានម៉ា ជាប្រទេសទី៨ហើយ បន្ទាប់ពីវៀតណាម ហ្វីលីពីន ឥណ្ឌូណេស៊ី ទីម័រខាងកើត ម៉ាឡេស៊ី សិង្ហបុរី និងថៃ ដែលទទួលការដង្ហែភ្លើងគប់ដោយជោគជ័យ។ 
 

គួបញ្ជាក់ថា បន្ទាប់ពីបញ្ចប់ពិធីដង្ហែរភ្លើងគប់ស៊ីហ្គេម-អាស៊ានប៉ារ៉ាហ្គេម នៅទីក្រុងរ៉ុងហ្គូន ប្រទេសមីយ៉ាន់ម៉ា នាយបេសកកម្មដឹកនាំដោយលោក ហោ សារុន នឹងបន្តដំណើរទៅប្រទេសឡាវ នៅថ្ងៃទី២២ ខែមេសា ឆ្នាំ២០២៣ មុនធ្វើមាតុភូមិនិវត្តន៍មកកម្ពុជា៕