ជាតិ
ក្រសួង៣ ពិភាក្សាគ្នាដើម្បីកំណត់អាយុកាលរថយន្តមួយទឹកដែលអាចនាំចូលមកកម្ពុជា លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ចូន។ រូបភាព៖ ក្រសួងសាធារណការ
× រដ្ឋមន្រ្តីក្រសួងសាធារណការ និងដឹកជញ្ជូន រដ្ឋមន្រ្តីក្រសួងបរិស្ថាន និងរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ កំពុងពិភាក្សាគ្នាជុំវិញ ការឈប់ឱ្យមានការនាំចូលរថយន្តមួយទឹក ដែលមានអាយុកាលច្រើន(រថយន្តចាស់ៗ) មកលក់នៅកម្ពុជា។ លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានលើកឡើងដូច្នេះនៅក្នុងពិធីសម្ពោធឱ្យប្រើប្រាស់ជាផ្លូវការមណ្ឌល ត្រួតពិនិត្យលក្ខណៈបច្ចេកទេសយានយន្ត(ឆៀក) សាខាសំរោងអណ្តែត នៅថ្ងៃទី២១ មេសា។
បើតាម លោក ស៊ុន ចាន់ថុល អាយុឡានដែលក្រសួងទាំង៣ បានជជែកគ្នានោះ គឺរថយន្តដែលបានផលិត ១៥ឆ្នាំ ១០ឆ្នាំ ឬ៧ឆ្នាំមុន។ «យើងបានពិភាក្សាគ្នាជាមួយក្រសួងបរិស្ថាន និងក្រសួងសេដ្ឋកិច្ច និងហិរញ្ញវត្ថុ នឹងរៀបចំពិនិត្យមើល ថាតើឡានមួយទឹក អាយុប៉ុន្មាន? ចាស់ជាងហ្នឹង យើងមិនអនុញ្ញាតឱ្យ(នាំ)ចូលទេ។ ឥឡូវកំពុងពិភាក្សាគ្នា! តើ១០ឆ្នាំ ឬ១៥ឆ្នាំ ឬ៧ឆ្នាំ? យើងកំពុងពិភ្សាគ្នា»។ រដ្ឋមន្ត្រីក្រសួងសាធារណការ មានប្រសាសន៍បន្ថែមយ៉ាងដូច្នេះ។
រូបតំណាង
ការកំណត់អាយុកាលឡានចាស់ៗដែលអាចនាំចូលមកកម្ពុជានេះ គឺកើតឡើងស្របពេលដែល រដ្ឋាភិបាលកំពុងជំរុញឱ្យប្រជាពលរដ្ឋប្រើប្រាស់រថយន្តថាមពលអគ្គិសនីនេះឱ្យបានកាន់តែច្រើន ដើម្បីចូលរួមកាត់បន្ថយការបំពុលបរិស្ថាន។ រដ្ឋមន្រ្តីរូបនេះ បានបន្តថា សព្វថ្ងៃនេះ ក្រសួងកំពុងកៀរគរអ្នកវិនិយោគទុនដាក់ទីតាំងបញ្ចូលថាមពលអគ្គិសនីឱ្យបាន ច្រើននៅកម្ពុជា ខណៈបច្ចុប្បន្ន ទីតាំងដែលបញ្ចូលថាមពលអគ្គិសនីរថយន្តមាន ប្រមាណ ១២កន្លែង។
លោក ស៊ុន ចាន់ថុល បានបញ្ជាក់ថា៖ «តាមយោបល់ខ្ញុំគួរតែទិញឡានថ្មី ឡានដែលប្រើដោយថាមពលអគ្គិសនី វាថោកជាងឡានមួយទឹកទៀត ហើយអត់បំពុលបរិស្ថាន និងមានសុវត្ថិភាព»។
បើតាម លោក ស៊ុន ចាន់ថុល បច្ចុប្បន្នមានយានយន្តហួសសុពលភាព ប្រមាណ១៥៣ ពាន់គ្រឿង ស្មើនឹងប្រមាណ ១៤ភាគរយ នៃរថយន្តទាំងអស់ ពុំទាន់ បានយកមកត្រួត ពិនិត្យលក្ខណៈច្ចេកទេស។ លោករដ្ឋមន្ត្រីក្រសួងសាធារណការ បានស្នើដល់ម្ចាស់ យានយន្តដែលហួសសុពលភាពទាំងនោះ យកយានយន្តទៅឆៀក ឱ្យទាន់ពេលវេលា ដើម្បីកុំឱ្យរងការពិន័យ។ «យឺតក្នុងមួយថ្ងៃ ត្រូវពិន័យ ៥០០រៀល សម្រាប់រថយន្តគ្រួសារ និងរថយន្តដឹកទំនិញ ក្នុងមួយថ្ងៃ ២០០០រៀល។ ដូច្នេះម្ចាស់រថយន្តទាំងអស់ សូមយករថយន្តមកត្រួតពិនិត្យលក្ខណៈបច្ចេកទេសឱ្យបានទាន់ពេលវេលា»។ លោក ស៊ុន ចាន់ថុល។
ដោយឡែក ចំពោះអ្នកដែលមានបណ្ណបើកបរផុតសុពលភាពមានចំនួន ៣៤៩ពាន់បណ្ណ ស្មើនឹង ១៨ភាគរយ នៃបណ្ណទាំងអស់។ លោក ស៊ុន ចាន់ថុល ក៏បានអំពាវនាវឱ្យម្ចាស់បណ្ណទាំងនោះ ទៅបន្តសុពលភាពឱ្យបានគ្រប់ៗគ្នាផងដែរ ដើម្បីចៀសវាងការផាកពិន័យ៕
© រក្សាសិទ្ធិដោយ thmeythmey.com