អន្តរជាតិ
រ៉ុក្កែតដ៏ធំរបស់ក្រុមហ៊ុន SpaceX បានផ្ទុះប៉ុន្មាននាទីក្រោយហោះចេញពីរដ្ឋ Texas
រ៉ុក្កែត Starship មិនមានមនុស្សបើករបស់ក្រុមហ៊ុន SpaceX ផ្ទុះប៉ុន្មាននាទីក្រោយពេលហោះឡើងពីទម្របង្ហោះសាកល្បង Boca Chica នៅជិតទីក្រុង Brownsville
×![]()
ដោយ: VOA
រ៉ុក្កែតថ្មីដ៏ធំមួយរបស់ក្រុមហ៊ុន SpaceX បានបង្ហោះចេញនៅក្នុងការហោះសាកល្បងជាលើកដំបូងបង្អស់របស់ខ្លួនកាលពីថ្ងៃព្រហស្បតិ៍ ប៉ុន្តែបានផ្ទុះក្នុងពេលប៉ុន្មាននាទីក្រោយមក បន្ទាប់ពីបានហោះចេញពីទម្របង្ហោះនិងធ្លាក់ចូលទៅក្នុងឈូងសមុទ្រម៉ិកស៊ិក។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AP។
ក្រុមហ៊ុន SpaceX របស់លោក Elon Musk មានបំណងបញ្ជូនរ៉ុក្កែត Starship ដែលមានប្រវែងជិត ១២០ ម៉ែត្រនេះ ពីតំបន់ជ្រោយខាងត្បូងនៃរដ្ឋ Texas នៅជិតព្រំដែនម៉ិកស៊ិក ទៅធ្វើដំណើរជុំវិញពិភពលោក។ រ៉ុក្កែតនេះមិនមានដឹកជញ្ជូនមនុស្សឬក៏ផ្កាយរណបអ្វីទេ។
រ៉ុក្កែត Starship មិនមានមនុស្សបើករបស់ក្រុមហ៊ុន SpaceX ពេលហោះឡើងពីទម្របង្ហោះសាកល្បងBoca Chica នៅជិតទីក្រុង Brownsville រដ្ឋ Texas
ផែនការគឺចង់ឱ្យកំណាត់កាំជ្រួចជំរុញរ៉ុកក្កែតផ្តាច់ខ្លួនចេញពីយានអវកាសក្នុងពេលតែប៉ុន្មាននាទីប៉ុណ្ណោះបន្ទាប់ពីយាននោះបានហោះចេញ ប៉ុន្តែវាបានបរាជ័យ។ រ៉ុក្កែតនេះបានចាប់ផ្ដើមធ្លាក់ចុះនិងផ្ទុះក្នុងពេលហោះហើរបាន ៤ នាទី ដោយធ្លាក់ចូលទៅក្នុងឈូងសមុទ្រម៉ិកស៊ិក។
បើតាមគម្រោងការ បន្ទាប់ពីយានអវកាសនេះផ្ដាច់ចេញពីកំណាត់កាំជ្រួចជំរុញ យានអវកាសនេះគួរត្រូវបន្តដំណើរទៅទិសខាងកើត និងព្យាយាមហោះជុំវិញពិភពលោក មុនពេលធ្លាក់ចូលទៅក្នុងមហាសមុទ្រប៉ាស៊ីហ្វិកនៅជិតកោះ Hawaii។
អ្នកទស្សនាជាច្រើនបានមើលការបង្ហោះនេះពីទីក្រុង South Padre Island ដែលស្ថិតនៅចម្ងាយប៉ុន្មានគីឡូម៉ែត្រពីកន្លែងបង្ហោះនៅឆ្នេរសមុទ្រ Boca Chica ដែលជាកន្លែងដែលគេមិនអនុញ្ញាតឱ្យចូល។ នៅពេលដែលរ៉ុក្កែតនេះហោះចេញ ហ្វូងមនុស្សបានស្រែកហ៊ោថា «ហោះទៅ!»។
ក្រុមហ៊ុន SpaceX មានផែនការប្រើយានអវកាស Starship នេះដើម្បីបញ្ជូនមនុស្សនិងទំនិញទៅកាន់ភពព្រះចន្ទ និងនៅទីបំផុតទៅកាន់ភពព្រះអង្គារ។ ទីភ្នាក់ងារអវកាស NASA របស់សហរដ្ឋអាមេរិក បានកក់យានអវកាស Starship នេះ ទុកសម្រាប់ដឹកក្រុមអ្នកទៅភពព្រះចន្ទបន្ទាប់របស់ខ្លួន ហើយអ្នកទេសចរមានទ្រព្យធនបានកក់ទុកការហោះហើរទៅកាន់ភពព្រះចន្ទរួចហើយ។
នេះគឺជាការប៉ុនប៉ងហោះហើរលើកទីពីរ។ ការប៉ុនប៉ងហោះហើរលើកទីមួយកាលពីថ្ងៃចន្ទត្រូវបានបង្អាក់ដោយសារសន្ទះកំណាត់កាំជ្រួចជំរុញរ៉ុក្តែកបានគាំងមិនដំណើរការ។
ដោយមានប្រវែងជិត ១២០ ម៉ែត្រ និងទម្ងន់ប្រហែល ៨ លានគីឡូក្រាម យានអវកាស Starship នេះមានប្រវែងនិងទម្ងន់លើសរ៉ុក្កែតទៅកាន់ភពព្រះចន្ទរបស់ទីភ្នាក់ងារ NASA ទៅទៀត ទាំងពេលអតីតកាល ពេលបច្ចុប្បន្ន និងពេលអនាគត។
រ៉ុក្កែតនេះត្រូវបានរចនាឡើងដើម្បីឱ្យអាចដំឡើងប្រើបានឡើងវិញទាំងស្រុងក្នុងរយៈពេលលឿន និងចំណាយទាបខ្លាំង ស្រដៀងទៅនឹងអ្វីដែលរ៉ុក្កែត Falcon ដែលតូចជាងនេះរបស់ក្រុមហ៊ុន SpaceX ដែលត្រូវបានបង្ហោះចេញជាច្រើនដងពីជ្រោយក្រុង Cape Canaveral រដ្ឋ Florida ដូច្នេះដែរ។ ការហោះហើរសាកល្បងនៃយានអវកាស Starship លើកនេះ មិនមានគម្រោងយករ៉ុក្កែតមកវិញនោះទេ។
យានអវកាសសម្រាប់ពេលអនាគតនេះ បានហោះចម្ងាយប៉ុន្មានគីឡូម៉ែត្រចូលទៅអាកាសក្នុងអំឡុងពេលសាកល្បងកាលពីប៉ុន្មានឆ្នាំមុន ដោយបានចុះចតដោយជោគជ័យបានតែម្ដងគត់។ ប៉ុន្តែលើកនេះគឺជាការបង្ហោះសម្ពោធនៃកំណាត់កាំជ្រួចជំរុញផ្នែកដំបូងរ៉ុក្កែតដែលមានម៉ាស៊ីន ៣៣ គ្រឿងដើរដោយឧស្ម័នមេតាន៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
