អន្តរជាតិ
ថៃ គ្រោងផ្តល់ប្រាក់ឱ្យប្រជាជនមានចំណូលទាបដើម្បីជួយកាត់បន្ថយថ្លៃអគ្គិសនី លោកប្រាយុទ្ធ ចន្ទអូចា នាយករដ្ឋមន្រ្តីថៃ។ រូបភាព AFP
× រដ្ឋាភិបាលថៃ គ្រោងនឹងផ្តល់ប្រាក់ច្រើនជាង៣២០លានដុល្លារ (១១ពាន់លានបាត) សម្រាប់ជាឧបត្ថម្ភធនដល់ប្រជាជនដែលមានប្រាក់ចំណូលទាបក្នុងរយៈពេល ៤ខែ ដើម្បីជួយកាត់បន្ថយថ្លៃអគ្គិសនី។ វិធានការដែលនឹងចាប់ផ្តើមនៅខែឧសភានេះ ត្រូវដាក់ទៅគណៈកម្មការរៀបចំការបោះឆ្នោតថៃ (EC) ជាមុនសិន។
ក្នុងកិច្ចប្រជុំគណៈរដ្ឋមន្រ្តីនៅថ្ងៃទី២៥ ខែមេសា នាយករដ្ឋមន្រ្តីថៃ លោកប្រាយុទ្ធ ចន្ទអូចា បានលើកឡើងពីកិច្ចខិតខំរបស់រដ្ឋាភិបាលក្នុងការលើកឡើង និងការដោះស្រាយពីបញ្ហាការចំណាយដ៏ខ្ពស់លើថ្លៃអគ្គិសនីរបស់ប្រជាជន។
«សូមទុកចិត្តរដ្ឋាភិបាលចុះ។ យើងកំពុងខិតខំឱ្យបានល្អបំផុត»។ លោកប្រាយុទ្ធ បានបញ្ជាក់បែបនេះ នៅថ្ងៃទី២៥ ខែមេសា ដោយបន្តថា ការផ្តល់ប្រាក់ច្រើនជាង៣២០លានដុល្លារសម្រាប់ប្រជាជនមានចំណូលទាប ដើម្បីដោះស្រាយថ្លៃអគ្គិសនី គឺពិតជាចាំបាច់ណាស់។
បើតាមមេដឹកនាំរូបនេះ គណៈរដ្ឋមន្រ្តីចាំផ្ទះ បានចុះហត្ថលេខាលើឧបត្ថម្ភធនរួចហើយ ដោយពេលនេះ គឺវាអាស្រ័យលើគណៈកម្មការរៀបចំការបោះឆ្នោតថៃ។
ដោយផ្អែកតាមរដ្ឋធម្មនុញ្ញថៃ រាល់ការផ្តល់ប្រាក់លើបញ្ហាបន្ទាន់ ដែលអនុម័តដោយរដ្ឋាភិបាលបណ្តោះអាសន្ន ក្រោយរដ្ឋសភាត្រូវបានរំលាយ ត្រូវតែមានការគាំទ្រពីគណៈកម្មការរៀបចំការបោះឆ្នោតសិន។
ទន្ទឹមនេះ លោក ប្រាយុទ្ធ ក៏បានឌឺដងដាក់បក្សនយោបាយផ្សេងផងដែរ ដែលមានបំណងកាត់បន្ថយពន្ធលើថ្លៃអគ្គិសនី ដើម្បីជួយសម្រាកបន្ទុកប្រជាជន។ ត្រង់ចំណុចនេះ ប្រមុខរដ្ឋាភិបាលបណ្តោះអាសន្នថៃ បានលើកឡើងថា បក្សនយោបាយទាំងនោះ គួរតែដឹងពីហេតុផល និងភាពចាំបាច់ ក៏ដូចជាព័ត៌មានលម្អិតដ៏ស្មុគស្មាញ ពាក់ព័ន្ធនឹងការចំណាយលើអគ្គិសនី។ នេះបើតាមការចុះផ្សាយរបស់កាសែតបាងកកប៉ុស្តិ៍។
បន្ថែមពីនេះ លោក ប្រាយុទ្ធ ក៏បានការពារវិធានការរបស់រដ្ឋាភិបាលថា ថៃត្រូវតែប្រុងប្រយ័ត្នលើការចំណាយ សម្រាប់ក្រុមមនុស្សដែលចាំបាច់ ពោលគឺរដ្ឋាភិបាលត្រូវតែប្រឹងប្រែងឱ្យបានល្អបំផុត ដើម្បីជួយប្រជាជនងាយរងគ្រោះ។
សូមបញ្ជាក់ថា ចាប់តាំងពីខែមករា ដល់ខែមេសា រដ្ឋាភិបាលថៃ បានផ្តល់ឧបត្ថម្ភធនប្រមាណ ៨៧លានដុល្លារ (៣,២ពាន់លានបាត) រួចហើយ ដើម្បីជួយប្រជាជនមានប្រាក់ចំណូលទាប ដោះស្រាយថ្លៃអគ្គិសនី៕
© រក្សាសិទ្ធិដោយ thmeythmey.com