ប្រធានាធិបតីចិន លោក ស៊ី ជិនភីង នៅថ្ងៃទី២៦ ខែមេសា បានផ្ញើលិខិតមួយ ដើម្បីអបអរខួបរយៈពេល ៥០ឆ្នាំនៃកិច្ចសហប្រតិបត្តិការរវាងចិន និងអង្គការកម្មសិទ្ធិបញ្ញាពិភពលោក (WIPO)។ 

 

ក្នុងលិខិតនោះ មេដឹកនាំចិន បានកត់សម្គាល់ថា ក្នុងរយៈពេល ៥០ឆ្នាំកន្លងមកនេះ ចិនបានប្តេជ្ញាយ៉ាងមុតមាំក្នុងការគោរពប្រព័ន្ធពហុភាគីនៃសិទ្ធិលើកម្មសិទ្ធិបញ្ញាអន្តរជាតិ រួមទាំងការពង្រីកកិច្ចសហប្រតិបត្តិការជាមួយអង្គការ (WIPO) ប្រកបដោយលទ្ធផលផ្លែផ្កា។ 

 

បើតាមលោកស៊ី រដ្ឋាភិបាលក្រុងប៉េកាំង តែងចូលរួមយ៉ាងខ្លាំងលើការការពារសិទ្ធិកម្មសិទ្ធិបញ្ញា និងបង្កើនកិច្ចខិតខំ ដើម្បីឱ្យចិនមានការការពារកម្មសិទ្ធិបញ្ញាយ៉ាងរឹងមាំ។ នេះបើតាមការចុះផ្សាយរបស់ទូរទស្សន៍ CGTN។ 

 

បន្ថែមពីនេះ មេដឹកនាំចិន ក៏បានបញ្ជាក់ផងដែរថា ចិនមានឆន្ទៈក្នុងការពង្រឹងកិច្ចសហប្រតិបត្តិការប្រកបដោយមិត្តភាពបន្ថែមទៀតជាមួយអង្គការកម្មសិទ្ធិបញ្ញាពិភពលោក និងធ្វើការរួមគ្នាដើម្បីធ្វើឱ្យប្រព័ន្ធអភិបាលកម្មសិទ្ធិបញ្ញាពិភពលោក កាន់តែត្រឹមត្រូវ និងល្អប្រសើរសម្រាប់មនុស្សជាតិ៕