ជាតិ
សេដ្ឋកិច្ច
កំពតកែប មានអំបិល និងទឹកត្រី ឯខេត្តតាកែវមានបង្កង ជាម៉ាកសម្គាល់ភូមិសាស្ត្រទំនិញ
× អំបិលកំពតកែប ទឹកត្រីកំពតកែប និងបង្កងតាកែវ ត្រូវបានក្រសួងពាណិជ្ជកម្មប្រកាសជាម៉ាកសម្គាល់ភូមិសាស្រ្តទំនិញ(Geographical Indication/GI)ជាផ្លូវការ នាថ្ងៃទី២៦មេសា។ ការប្រកាសនេះធ្វើឡើងក្រោមវត្តមានលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម។
ផលិតផលដែលបានក្លាយម៉ាកសម្គាល់ភូមិសាស្រ្តទំនិញជាផ្លូវការរួមមាន អំបិលកំពតកែប ទឹកត្រីកំពតកែប និងបង្កងតាកែវ នឹងជួយបង្កើនតម្លៃបន្ថែមដល់ផលិតផលក្នុងស្រុក និងពង្រឹងភាពប្រកួតប្រជែងផលិតផលខ្មែរនៅទីផ្សារក្នុងស្រុក និងទីផ្សារនាំចេញ។ លោក ប៉ាន សូរស័ក្តិ ថ្លែងបែបនេះក្នុងពិធីសម្ពោធម៉ាកសម្គាល់ទំនិញនិងម៉ាកសមូហភាពចំនួន៧មុខ នៅសណ្ឋាគារភ្នំពេញនាព្រឹកថ្ងៃទី២៦មេសា ឆ្នាំ២០២៣ ដែលក្នុងថ្ងៃជាមួយគ្នានេះ នំបញ្ចុកសៀមរាប អំបុកកំពង់ធំ ដូងខ្ទិះបាត់ដំបង និងក្រូចថ្លុងកោះពីរ របស់ខេត្តត្បូងឃ្មុំ ក៏បានក្លាយជាម៉ាកសមូហភាពជាផ្លូវការ ផងដែរ។
បើតាមលោករដ្ឋមន្ត្រី ការចុះបញ្ជីផលិតផលទាំងនេះ គឺជាសម្ធទិផលដ៏សំខាន់ ដោយគ្រប់ភាគីពាក់ព័ន្ធបានខិតខំរួមគ្នា បង្កើត ចងក្រង អភិរក្ស ថែរក្សា និងអភិវឌ្ឍផលិតផលក្នុងស្រុកឱ្យមានតម្លៃបន្ថែមខ្ពស់ និងផ្សព្វផ្សាយ ពីវប្បធម៌របស់ខ្មែរ។ លោក ប៉ាន សូរស័ក្តិ មានប្រសាសន៍យ៉ាងដូច្នេះ៖ «ខ្ញុំជឿជាក់យ៉ាងមុតមាំថា ម៉ាកសម្គាល់ទំនិញ និង ម៉ាកសមូហភាព នឹងជំរុញឱ្យមានកំណើនតម្រូវការផលិតផលលើទីផ្សារជាតិ និងអន្តរជាតិកាន់តែច្រើន និងជាផ្នែកមួយនៃគោលដៅទេសចរណ៍ ផងដែរ»។
សម្រាប់លោក ចាន់ ស៊ីថា ដែលជាម្ចាស់សហគ្រាសផលិតទឹកត្រី អ៊ីឆេ ង៉ូវហេង ខេត្តកំពត បន្ទាប់ពីទឹកត្រីកំពតកែប បានក្លាយជាម៉ាកសម្គាល់ភូមិសាស្រ្តទំនិញហើយនោះ នឹងមានការកើនឡើងនូវតម្រូវការទីផ្សារ និងតម្លៃបន្ថែម។ លោក បានបញ្ជាក់ថា៖« ទំនិញGI គឺជាទំនិញដែលមានពិសេសណាស់ដែលអ្នកផ្សេងមិនអាចធ្វើបានយើង។ អ៊ីចឹង! ខ្ញុំជឿជាក់ថា តម្លៃទំនិញនេះនឹងល្អប្រសើរជាងតម្លៃដែលយើងលក់ប្រកួតទីផ្សារសព្វថ្ងៃ»។
មូលហេតុចម្បងដែលទឹកត្រីកំពតកែប ត្រូវបានចុះបញ្ជីជាម៉ាកសម្គាល់ភូមិសាស្រ្តទំនិញនេះ ក៏ព្រោះតែទឹកត្រីនេះ មានរសជាតិឆ្ងាញ់ និងមានប្រូតេអ៊ីនខ្ពស់ លើសពីទឹកត្រីធម្មតាដែលភាគច្រើនផលិតចេញពីត្រីទឹកសាប។ នេះជាការលើកឡើងរបស់លោក ស៊ីថា ដោយរំពឹងថា៖ «ប្រសិនបើទឹកត្រីកំពតកែប ត្រូវបាននាំចេញ នឹងមានការទទួលស្គាល់ពីអ្នកប្រើប្រាស់ និងអាចមានទីផ្សារច្រើន ព្រោះទឹកត្រីកំពត ជាផលិតផលសុទ្ធមួយ សម្រាប់យើងហូបមានរសជាតិឆ្ងាញ់ ថែមទាំងមានគុណភាព ទៀត»។
បើតាមលោក សួន វិជ្ជា ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម ក្រៅពីផលិតផលដែលបានចុះបញ្ជីម៉ាកសម្គាល់ភូមិទំនិញ និងម៉ាកសមូហភាពទាំងនេះ នាយកដ្ឋានកម្មសិទ្ធិបញ្ញាក៏កំពុងរៀបចំចុះបញ្ជីម៉ាកសម្គាល់ភូមិសាស្ត្រទំនិញ«ក្តាមថ្មកោះកុង និង« ប្រហុកសៀមរាប» ផងដែរ។ លោកបន្តបន្តនិយាយដោយអះអាងដូច្នេះ៖«នាយកដ្ឋានកម្មសិទ្ធិបញ្ញា ប្តេជ្ញាចិត្តជំរុញការចុះបញ្ជីការពារផលិតផលសក្កានុពលរបស់កម្ពុជាឱ្យកាន់តែច្រើនបន្ថែមទៀត ដើម្បីជាប្រយោជន៍ដល់ប្រជាកសិករ ជំរុញការនាំចេញ និងលើកកម្ពស់វប្បធម៌របស់កម្ពុជាយើង»។
គិតដល់បច្ចុប្បន្ន នាយកដ្ឋានកម្មសិទ្ធិបញ្ញានៃក្រសួងពាណិជ្ជកម្មបានចុះបញ្ជីម៉ាកសរុបជាង១០ម៉ឺនម៉ាក។ ដោយឡែកក្នុងឆ្នាំ២០២២ នាយកដ្ឋានកម្មសិទ្ធិបញ្ញាបានចុះបញ្ជីចំនួន៦ ២៣០ម៉ាក និងបានចុះបញ្ជីការពារម៉ាកសម្គាល់ភូមិទំនិញបរទេសចំនួន៥៦, ម៉ាកសម្គាល់ភូមិទំនិញកម្ពុជាបន្ថែមចំនួន៣ និងម៉ាកសមូហភាពចំនួន៤៕
Tag:
សេដ្ឋកិច្ច
ម៉ាកស្គាល់ភូមិសាស្ត្រទំនិញ
© រក្សាសិទ្ធិដោយ thmeythmey.com