ជាតិ
លោក ហ៊ុន ម៉ានី៖ «យើងអាចមិនមានទស្សនៈដូចគ្នា ប៉ុន្តែយើងគួរមានទស្សនៈជាតិរួមមួយសម្រាប់កម្ពុជា» លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា។ រូបភាពពីសសយក
× ភ្នំពេញ៖ «យើងទាំងអស់គ្នាអាចមិនមានទស្សនៈដូចគ្នាទាំងអស់ ប៉ុន្តែអ្វីដែលយើងគួរមានរួមគ្នា គឺជាទស្សនៈជាតិរួមមួយសម្រាប់កម្ពុជា។ នោះគឺសេចក្តីស្រឡាញ់ចំពោះកម្ពុជា ក៏ដូចជាឆន្ទៈ និងសកម្មភាពក្នុងការបង្ហាញភាសាបេះដូងចំពោះសង្គមជាតិ»។ នេះជាការលើកឡើងរបស់លោក ហ៊ុន ម៉ានី ក្នុងកម្មវិធី #BeyondTheGames’Day នាវិមានឈ្នះឈ្នះ។
បន្ទាប់ពីដង្ហែភ្លើងគប់ទៅមុខវេទិកាវិមានឈ្នះឈ្នះ លោក ហ៊ុន ម៉ានី ប្រធានគណៈកម្មការអប់រំ យុវជន និងកីឡា ធម្មការ កិច្ចការសាសនា វប្បធម៌ និងទេសចរណ៍ នៃរដ្ឋសភា ត្រូវបានអញ្ជើញថ្លែងសុន្ទរកថាក្នុងកម្មវិធី#BeyondTheGames’Day។ នៅលើវេទិកា លោក ហ៊ុន ម៉ានី បានអរគុណទៅដល់រដ្ឋាភិបាល, អរគុណការចូលរួម និងអរគុណប្រជាជាតិកម្ពុជាផងដែរ។
ប្រធានសហភាពសហព័ន្ធយុវជនកម្ពុជារូបនេះ មានប្រសាសន៍ដូច្នេះ៖ «ថ្ងៃនេះ ខ្ញុំមានតែមួយពាក្យគត់ គឺពាក្យថាអរគុណ។ ហើយពាក្យថាអរគុណនេះ អាចនិយាយបានថា ជាការបង្ហាញក្នុងក្របខណ្ឌយុទ្ធនាការ#BeyondTheGamesនៃ Gratitude ដែលយើងមានសម្រាប់ភាគីផ្សេងៗ»។
បើតាមលោក ហ៊ុន ម៉ានី យុទ្ធនាការ #BeyondThegames គឺជាសក្ខីភាពមួយដែលបញ្ជាក់ពីស្មារតីរួបរួម និងចូលរួមយ៉ាងក្លៀវក្លារបស់ប្រជាជនកម្ពុជា ក្នុងការគាំទ្រភាពជាម្ចាស់ផ្ទះរបស់កម្ពុជាសម្រាប់ព្រឹត្តការណ៍កីឡាអាស៊ីអាគ្នេយ៍(SEA Games) និងកីឡាអាស៊ានប៉ារ៉ាហ្គេមឆ្នាំ២០២៣។ «យើងទាំងអស់គ្នាអាចមិនមានទស្សនៈដូចគ្នាទាំងអស់ ប៉ុន្តែអ្វីដែលយើងគួរមានរួមគ្នា គឺជាទស្សនៈជាតិរួមមួយសម្រាប់កម្ពុជា។ នោះគឺសេចក្តីស្រឡាញ់ចំពោះកម្ពុជា ក៏ដូចជាឆន្ទៈ និងសកម្មភាពក្នុងការបង្ហាញភាសាបេះដូងចំពោះសង្គមជាតិ»។ លោក ហ៊ុន ម៉ានី ថ្លែងបែបនេះ។
លោក ហ៊ុន ម៉ានី ក៏បានរំឭកពីការចូលរួម និងការខិតខំប្រឹងប្រែងរបស់យុទ្ធនាការ #BeyondThegames ដែលជាផ្នែកមួយជួយលើកស្ទួយវិស័យកីឡា។ លោក បន្តថា BeyondThegames ចង់បង្ហាញពីមោទកភាពក្នុងការចូលរួមជាមួយរដ្ឋាភិបាល និងបង្ហាញភាសាបេះដូងទៅកាន់កីឡាករកីឡាការិនី។
ឈរថ្លែងសុន្ទរកថាលើវេទិកាជិត ៣០នាទី លោក ហ៊ុន ម៉ានី មិនភ្លេចលើកឡើងពីការរួបរួមរបស់ប្រជាជនកម្ពុជានោះទេ។ ប្រធានគណៈកម្មការទី៧ នៃរដ្ឋសភា រូបនេះ លើកឡើងបែបនេះ៖ «យើងមានភាគហ៊ុនមួយស្មើៗគ្នាសម្រាប់អនាគតកម្ពុជា។ យើងត្រូវខិតខំប្រឹងប្រែងពោរពេញដោយភាពជឿជាក់ ដោយប្រើប្រាស់ជំនាញ និងទេពកោសល្យរបស់យើងម្នាក់ៗ និងរៀងៗខ្លួន ដើម្បីប្រជាជាតិយើងមានភាពសុខសាន្ត និងរុងរឿងជាងនេះ»។
សូមបញ្ជាក់ថា យុទ្ធនាការ BeyondThegames ឬលើសពីការប្រកួត ត្រូវបានបង្កើតដោយសហភាពសហព័ន្ធយុវជនកម្ពុជា។ នាពេលថ្មីៗនេះ BeyondThegames ក៏បានបំបែកកំណត់ត្រាបេះដូងក្រដាសច្រើនជាងគេ ដើម្បីប្រមូលថវិកាជូនកីឡាករកីឡាការិនីដែលមានពិការភាពផងដែរ៕
Tag:
Beyond The Games
ហ៊ុន ម៉ានី
SEA Games
© រក្សាសិទ្ធិដោយ thmeythmey.com