អង្គការ Fauna & Flora បានបញ្ជាក់ថា នៅខែមិថុនានេះ ក្រុមការងារអភិរក្សក្រពើភ្នំនៃអង្គការ Fauna & Flora សហការជាមួយ មន្ទីរបរិស្ថានខេត្តកោះកុង រដ្ឋបាលព្រៃឈើ និងសហគមន៍មូលដ្ឋាន បានរកឃើញសម្បុកក្រពើ ភ្នំមួយកន្លែង នៅជម្រកដីសើមត្រពាំងពាង ស្ថិតក្នុងឧទ្យានជាតិជួរភ្នំក្រវាញខាងត្បូង ខេត្តកោះកុង។ សម្បុកនោះមានពងចំនួន២១គ្រាប់ ហើយ១៧គ្រាប់ ដែលបង្កកំណើត ត្រូវបានផ្លាស់ទៅកន្លែងសុវត្ថិភាព និងកំពុងភ្ញាស់តាមបែបសិប្បនិម្មិត ដើម្បីធានាសុវត្ថិភាព។ ដោយឡែក ពងមិនបង្កកំណើត៤គ្រាប់ ត្រូវរក្សាទុកក្នុងសម្បុកដើមដដែល។ 
 

 

ក្រពើភ្នំ (Crocodylus siamensis) ជាប្រភេទសត្វជិតផុតពូជបំផុត និងគំរាមកំហែងដល់ការផុតពូជពីធម្មជាតិ។ ក្រពើភ្នំ ត្រូវបានរកឃើញមានវត្តមាន នៅកម្ពុជា ដោយការអង្កេតរបស់អង្គការ Fauna & Flora និងរដ្ឋបាលព្រៃឈើនៅតំបន់ជួរភ្នំក្រវាញក្នុងឆ្នាំ ២០០០ ដែលជាទីជម្រកដ៏សំខាន់បំផុតសម្រាប់សត្វប្រភេទនេះ។ តាមការសិក្សា លើពិភពលោក ក្រពើភ្នំមានប្រហែល ១ពាន់ក្បាលប៉ុណ្ណោះ ក្នុងនោះ កម្ពុជាមាន ៤០០ក្បាល ដូច្នេះ ការរកឃើញថ្មីពងថ្មីនេះ គឺជាព័ត៌មានរីករាយសម្រាប់អ្នកអភិរក្ស និងពិភពលោក៕