លោក ហួន ច័ន្ទថុន អះអាងថា ទោះបីបក្សលោក មិនទទួលបានសំឡេងក្នុងរដ្ឋសភាពិតមែន ប៉ុន្តែបក្សនៅតែមានសកម្មភាពជួយដោះស្រាយបញ្ហាប្រជាពលរដ្ឋ ដែលជួបការលំបាក។ ត្រង់ចំណុចនេះ លោក ច័ន្ទថុន យល់ឃើញថា ការចូលរួមប្រកួតប្រជែងនយោបាយ មិនចាំបាច់ទាល់តែឈ្នះកៅអីរដ្ឋសភា ឬដឹកនាំរដ្ឋាភិបាលទេ ទើបជួយដោះស្រាយបញ្ហាពលរដ្ឋនោះឡើយ។
 

សម្រាប់លោក ច័ន្ទថុន ការធ្វើនយោបាយ គឺជាការខ្វាយខ្វល់ពីបញ្ហាសង្គម នៅក្នុងសង្គមប្រជាធិបតេយ្យ ហើយក៏មិនមែនទាល់តែមានទិសដៅដណ្ដើមអំណាចគ្នាដែរ។ 
 

គណបក្សខ្មែរអភិវឌ្ឍន៍សេដ្ឋកិច្ច ដាក់ចេញគោលនយោបាយ៥ចំណុច រួមមាន អភិវឌ្ឍន៍ធនធានមនុស្ស, អភិវឌ្ឍន៍កសិ-ឩស្សាហ៍កម្ម, អភិវឌ្ឍន៍ទេសចរណ៍, អភិវឌ្ឍន៍សេដ្ឋកិច្ចជាតិ និងអភិវឌ្ឍន៍ប្រព័ន្ធយុត្តិធម៌។ តាមរយៈគោលនយោបាយទាំងនេះ លោក ច័ន្ទថុន អះអាងថា បើទោះលោក មិនបានកៅអីរដ្ឋសភា ក៏លោកនឹងដាក់សំណើឱ្យរដ្ឋាភិបាលដឹកនាំ នាអាណត្តិទី៧ យកគិតពិចារណាដែរ ដើម្បីចូលរួមអភិវឌ្ឍន៍ប្រទេស។

 

គណបក្សខ្មែរអភិវឌ្ឍន៍សេដ្ឋកិច្ច បង្កើតឡើងនៅឆ្នាំ២០១២ ដោយលោក ហួន រាជចំរើន (មរណភាពនៅឆ្នាំ២០២១) ។ គណបក្សខ្មែរអភិវឌ្ឍន៍សេដ្ឋកិច្ច ធ្លាប់ចូលរួមបោះឆ្នោត២លើកមកហើយ គឺនៅឆ្នាំ២០១៣ និង២០១៨។ សម្រាប់ការចូលរួមឈរឈ្មោះបោះឆ្នោត លើកទី៣នេះ គណបក្សខ្មែរអភិវឌ្ឍន៍សេដ្ឋកិច្ច សម្រេចដាក់បេក្ខជនឈរឈ្មោះបោះឆ្នោត ៧រាជធានី-ខេត្ត ដើម្បីដណ្ដើមកៅអីរដ្ឋសភា។ 

 

សម្រាប់ការបោះឆ្នោតជ្រើសរើសតំណាងរាស្រ្ត ឆ្នាំ២០២៣នេះ មានគណបក្សនយោបាយចំនួន១៨ ចូលរួមប្រកួតប្រជែង។ចំពោះការបោះឆ្នោតជ្រើសរើសតំណាងរាស្ត្រ អាណត្តិទី៧ នេះ នឹងប្រព្រឹត្តិទៅនៅថ្ងៃទី នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣៕