លោក គួច ចំរើន បានលើកឡើងថា ខេត្តព្រះសីហនុ មានសក្ដានុពលនិងជាគោលដៅចាប់អារម្មណ៍យ៉ាងសំខាន់សម្រាប់អ្នកវិនិយោគ។ បើតាមលោក ចំរើន រាជរដ្ឋាភិបាល បានរៀបចំផែនការមេ ប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ដែលនៅចាំតែការពិនិត្យសម្រេចចុងក្រោយ ដើម្បីដាក់ឱ្យប្រើប្រាស់ផែនការមេនេះ ដែលជាត្រីវិស័យដ៏សំខាន់សម្រាប់ចង្អុលទិសអភិវឌ្ឍន៍នៅក្នុងខេត្ត។ 

 

 

អភិបាលខេត្តព្រះសីហនុរូបនេះ បានបន្តថា រដ្ឋបាលខេត្តគួរតែផ្សព្វផ្សាយឱ្យបានទូលំទូលាយ ជាពិសេសធ្វើសិក្ខាសាលាផ្សព្វផ្សាយជូនដល់អ្នកវិនិយោគជាតិ និងអន្តរជាតិនៅខេត្តព្រះសីហនុ។ មិនតែប៉ុណ្ណោះ ផ្តល់ភាពងាយស្រួលដល់អាជីវករ ពាណិជ្ជករសម្រាប់ការវិនិយោគនៅក្នុងខេត្ត ដើម្បីជំរុញកំណើនសេដ្ឋកិច្ចសង្គមឱ្យកាន់តែល្អប្រសើរ។

 

លោក គួច ចំរើន បានបញ្ជាក់ថា៖«ចាប់ពីខែកញ្ញាតទៅ អ្នកដែលវិនិយោគមានដើមទុកក្រោម ៥លានដុល្លាអាម៉េរិក មិនចាំបាច់ទៅសុំសិទ្ធិវិនិយោគនៅ CDCនោះទេ គ្រាន់តែស្នើសុំទៅអនុគណៈកម្មការវិនិយោគខេត្ត និងផ្តល់ភាពងាយស្រួលផ្នែករដ្ឋបាលសម្រាប់អ្នកវិនិយោគនៅខេត្តព្រះសីហនុ»។

 

លោក គួច ចំរើន បានបន្ថែមថា កិច្ចសហប្រតិបត្តិការនេះ ត្រូវបានយកចិត្តទុកដាក់ពី CDC ដើម្បីលើកទឹកចិត្អអ្នកវិនិយោគ ចាប់យកឱកាសបោះទុនរកស៊ីនៅកម្ពុជា។ 

ជាក់ស្ដែងក្រុមហ៊ុនមួយ កំពុងរៀបចំកែលម្អតារាងវាយកូនហ្គោលនៅតំបន់រាម។ នៅខាងមុខទីលានតេជោ កំពុងរៀបចំបើកការដ្ឋានសាងសង់ សណ្ឋាគារ ខុនដូរ ផ្សារ និងសួនចញ្ចឹមត្រី ដែលនេះជាផ្នែកមួយជួយទាក់ទាញភ្ញៀវទេសចរ លើកមុខមាត់នៅក្នុងខេត្តព្រះសីហនុ។ នេះបើតាមលោក ចំរើន៕