ជាតិ
ផែថ្មីតម្លៃជាង៣លានដុល្លានៅកោះកុង នឹងជួយតភ្ជាប់ការដឹកជញ្ជូនតាមផ្លូវសមុទ្រឱ្យកាន់តែសម្បូរបែប កំពង់ផែដងទង់ ដែលត្រូវបានសម្ពោធដាក់ឱ្យប្រើប្រាស់នៅថ្ងៃទី២៣ ខែមិថុនា។ រូបភាព៖ ក្រសួងសាធារណការ
× កំពង់ផែដងទង់ដែលអាចផ្ទុកនាវាឱ្យចូលចតបានដល់ទម្ងន់២០០០តោន ស្ថិតនៅទឹកដីខេត្តកោះកុង ត្រូវបានដាក់ឱ្យប្រើប្រាស់ជាផ្លូវការចាប់ពីថ្ងៃទី២៣មិថុនានេះ តទៅ។ ផែថ្មីតម្លៃជាង៣លានដុល្លារនេះ នឹងជួយលើកកម្ពស់ការតភ្ជាប់និងភាពសម្បូរបែបនៃការដឹកជញ្ជូនតាមផ្លូវសមុទ្រដល់អ្នកជំនួញ អាជីវករ និងពាណិជ្ជករផ្សេងៗឱ្យកាន់តែមានប្រសិទ្ធិភាព។
កំពង់ផែទេសចរណ៍ និងទំនិញរាយ ដងទង់ ជាចំណែកមួយក្នុងការតភ្ជាប់ និងភាពសម្បូរបែបនៃ ហេដ្ឋរចនាសម្ព័ន្ធផ្លូវសមុទ្រ ក្នុងខេត្តតំបន់ឆ្នេរទាំង៤នៅកម្ពុជា។ នេះជាការលើកឡើងរបស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងពិធីសម្ពោធដាក់ឱ្យប្រើប្រាស់កំពង់ផែនេះ នាព្រឹកថ្ងៃទី២៣មិថុនា ឆ្នាំ២០២៣។ លោកបានបញ្ជាក់ថា កំពង់ផែនេះ នឹងជួយលើកកម្ពស់កំណើនសេដ្ឋកិច្ចប្រកបដោយបរិយាបន្ន នៅក្នុងប្រទេសជាប់សមុទ្រទាំងបី នៃមហាអនុតំបន់មេគង្គ រួមមាន កម្ពុជា ថៃ និងវៀតណាម។
បើតាមលោក ស៊ុន ចាន់ថុល កំពង់ផែដងទង់ មានបណ្តោយប្រវែង១១៥ម៉ែត្រ ទទឹងប្រវែង១៦,៥០ម៉ែត្រ ជាមួយជម្រៅទឹកពី៤ម៉ែត្រទៅ៨ម៉ែត្រ ដែលមានលទ្ធភាពឱ្យនាវាផ្ទុកទំនិញទម្ងន់២០០០តោន អាចឱ្យចូលចតបាន។
លោកបានបន្តរៀបរាប់ថា ការសាងសង់កំពង់ផែបេតុងនេះប្រើប្រាស់ថវិកាជាតិអស់១២,៨៩៧ពាន់លានរៀល (ប្រមាណជាង៣លានដុល្លារអាម៉េរិក)។ ទំំហំចំណាយនេះ គឺមិនរាប់បញ្ចូលនូវហេដ្ឋារចនាសម្ព័ន្ធជាច្រើនទៀត ដូចជា ស្ពានបេតុងភ្ជាប់ទៅផែ, ផ្លូវបេតុងចេញចូលផែ, អគារអ្នកដំណើររង់ចាំ, អគាររដ្ឋបាល បន្ទប់ទឹកសាធារណៈ ប្រព័ន្ធលូ របង និងខ្លោងទ្វា រជាដើម។
សម្រាប់ខេត្តកោះកុង ក៏ទទួលបានការអភិវឌ្ឍលើវិស័យហេដ្ឋារចនាសម្ព័ន្ធដឹកជញ្ជូនជាច្រើនទៀតពីរដ្ឋាភិបាល ផងដែរ។ ក្នុងនោះ មានការសាងសង់ផ្លូវជាតិលេខ៤៨ មានប្រវែង១៤៨ គីឡូម៉ែត្រ តភ្ជាប់ក្រុងខេមរភូមិន្ទ ទៅកាន់ផ្លូវជាតិលេខ៤ និងផ្លូវជាតិលេខ១០ មានប្រវែងជាង ១៩៨ គីឡូម៉ែត្រ តភ្ជាប់ខេត្តកោះកុង ទៅកាន់ខេត្តពោធិសាត់ និងបន្តដល់ខេត្តបាត់ដំបង៕
© រក្សាសិទ្ធិដោយ thmeythmey.com