រដ្ឋបាលខេត្តមណ្ឌលគិរី និងក្រុមយុវជនជាច្រើនរូប បានរួមគ្នាចុះដាំដើមក្ងោក នៅតាមបណ្តោយផ្លូវ ដើម្បីបង្កើនទេសភាពស្រស់បំព្រង និងទាក់ទាញភ្ញៀវទេសចរ។ ដើមក្ងោកទាំងនេះ ក៏ជាចំណែកមួយ នៃដំណើរការប្រព័ន្ធអេកូឡូស៊ី កាត់បន្ថយឥទ្ធិពលអវិជ្ជមាននៃការប្រែប្រួលអាកាសធាតុ គ្រោះធម្មជាតិនានា ផ្តល់ជាម្លប់សម្រាប់មនុស្ស និងសត្វដកដង្ហើមជាដើម។ 
 

ជាមួយគ្នានេះ លោក ថង សាវុន លើកឡើងថា  ដើម្បីសម្រួលដល់ក្រុមការងារដាំដើមក្ងោកសម្រេចតាមផែនការបានគ្រោងទុក លោកបានស្នើដល់រដ្ឋបាលស្រុកកែវសីមា ក៏ដូចជាបងប្អូនប្រជាពលរដ្ឋ និងសាធារណៈជន ដែលមានទីលំនៅតាមបណ្ដោយផ្លូវជាតិលេខ ៧៦ ចូលរួមសហការអនុវត្តន៍ឱ្យបានល្អប្រសើរ។ យ៉ាងណាមិញ អភិបាលខេត្តរូបនេះ ក៏បានអំពាវនាវដល់ប្រជាពលរដ្ឋទាំងអស់ ត្រូវចូលរួមថែរក្សាការពារ ដើមក្ងោកដែលដាំនេះ រួមទាំងធនធានធម្មជាតិ ឱ្យបានល្អប្រសើរផងដែរ៕