ជាតិ
លោក កៅ ថាច ជំរុញឱ្យម្ចាស់រោងម៉ាស៊ីនកិនស្រូវជួយទិញស្រូវពីកសិករ នៅរដូវប្រមូលនាពេលខាងមុខ រូបភាពពីហ្វេសប៊ុក ARDB
× ភ្នំពេញ៖ លោក កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម បានស្នើសុំ និងជំរុញឱ្យម្ចាស់រោងម៉ាស៊ីនកិនស្រូវជួយទិញស្រូវពីកសិករឱ្យអស់ពីលទ្ធភាពក្នុងតម្លៃទីផ្សារ នៅរដូវប្រមូលនាពេលខាងមុខ។ លោក ស្នើបែបនេះ នៅក្នុងកិច្ចប្រជុំជាមួយម្ចាស់រោងម៉ាស៊ីន ក្រុមហ៊ុននាំចេញអង្ករ ដែលមកពីខេត្តពោធិ៍សាត់ បាត់ដំបង និងខេត្តបន្ទាយមានជ័យ កាលពីថ្ងៃទី២៤ ខែមិថុនា។
តំណាងម្ចាស់រោងម៉ាស៊ីន ក្រុមហ៊ុននាំចេញអង្ករ ដែលមកពីខេត្តពោធិ៍សាត់ បាត់ដំបង និងខេត្តបន្ទាយមានជ័យ បានជួបប្រជុំជាមួយលោក កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម នាសភាពាណិជ្ជកម្ម ខេត្តបាត់ដំបង។ ក្នុងកិច្ចប្រជុំនោះ លោក កៅ ថាច បានស្នើសុំ និងជំរុញដល់ម្ចាស់រោងម៉ាស៊ីនកិនស្រូវទាំងអស់ ជួយទិញស្រូវពីកសិករឱ្យអស់ពីលទ្ធភាពក្នុងតម្លៃទីផ្សារ។
រូបភាពពីហ្វេសប៊ុក ARDB
ទន្ទឹមនឹងនេះ លោក កៅ ថាច អះអាងថា ធនាគារអភិវឌ្ឍន៍ជនបទ និងកសិកម្ម នៅតែបន្តផ្តល់ឥណទានដល់ម្ចាស់រោងម៉ាស៊ីន សម្រាប់ប្រមូលទិញស្រូវពីកសិករក្នុងរដូវប្រមូលផលខាងមុខនេះ។ ក្នុងន័យនេះ អគ្គនាយកនៃធនាគារអភិវឌ្ឍន៍ជនបទរូបនេះ លើកទឹកចិត្តឱ្យម្ចាស់រោងម៉ាស៊ីន ដែលខ្វះថវិកាទិញស្រូវ អាចស្នើសុំឥណទានបន្ថែម ពីធនាគារអភិវឌ្ឍន៍ជនបទ និងកសិកម្មបាន។
បើតាមហ្វេសប៊ុក ARDB លោក កៅ ថាច ក៏បានស្នើឱ្យម្ចាស់រោងម៉ាស៊ីនកិនស្រូវ រៀបចំបង្កើតទីផ្សារទិញស្រូវ ក្នុងតំបន់របស់ខ្លួនឱ្យបានច្រើនកន្លែង ដើម្បីបង្កភាពងាយស្រួលដល់កសិករ ប្រមូលផ្តុំស្រូវមកលក់ និងកាត់បន្ថយការចំណាយថ្លៃដឹកជញ្ជូន។
ជាមួយគ្នានេះ លោក កៅ ថាច ទទូចដល់ម្ចាស់រោងម៉ាស៊ីនទាំងអស់ ឱ្យមានសាមគ្គីភាពរវាងគ្នា កុំប្រកួតប្រជែងគ្នា និងសូមរួបរួមគ្នា ដើម្បីលើកស្ទួយវិស័យស្រូវអង្ករកម្ពុជាប្រកបដោយវិបុលភាព និងភាពរីកចម្រើន។ លោក សង្ឃឹមថា ម្ចាស់រោងម៉ាស៊ីនទាំងអស់នឹងសហការគ្នា ដោយសាមគ្គីភាព ដើម្បីលើកស្ទួយជីវភាពកសិករ និងជំរុញឱ្យផែនការនាំចេញអង្ករ ១លានតោន របស់រាជរដ្ឋាភិបាលទទួលបានជោគជ័យ៕
រូបភាពពីហ្វេសប៊ុក ARDB
© រក្សាសិទ្ធិដោយ thmeythmey.com