ការប្រកួតនៅក្នុងទឹកទី១ រវាងបង្គោលក្រហមកីឡាករមកពីប្រទេសកម្ពុជា វី សម្ភស្ស ឬអេលីត សម្ភស្ស បានយកឈ្នះកីឡាករបារាំងបង្គោលខៀវ Barach Ghilas លើប្រភេទទម្ងន់៦៧គីឡូក្រាម ដោយវាយឱ្យសន្លប់ និងត្រូវមន្រ្តីអាជ្ញាកណ្តាលសម្រេចបញ្ឈប់ក្រោយស្ថានភាពមិនអាចបន្តការប្រកួតទៀតបាន។

 

គូបន្ទាប់បង្គោលក្រហមគីងកុងពិឃាដ លិញ ភារម្យ ឬអេលីត សាន់ បានយកឈ្នះកីឡាករបារាំងបង្គោលខៀវ Moundo Hamza  លើប្រភេទទម្ងន់ ៦០គីឡូក្រាមដោយទាត់ផ្កាប់ចានឱ្យសន្លប់នៅទឹកទី២។ រីឯកីឡាករកម្ពុជាបង្គោលក្រហម មឿន សុខហុច រងបរាជ័យក្រោមថ្វីដៃកីឡាករបារាំងបង្គោលខៀវ Kasem Yanis លើប្រភេទទម្ងន់ ៦០គីឡូក្រាមដោយពិន្ទុក្រោយតស៊ូយ៉ាងស្វិតស្វាញពេញបីទឹក។

 

ចំណែកគូចុងក្រោយកីឡាករកម្ពុជាបង្គោលក្រហមក្របីព្រៃ ពេជ្រ សម្បត្តិ បានយកឈ្នះបង្គោលខៀវកីឡាករបារាំង Bahroumi Faycal លើប្រភេទទម្ងន់ ៦០គីឡូក្រាម ដោយពិន្ទុបន្ទាប់ពីបើកការប្រយុទ្ធគ្នាដ៏ជក់ចិត្តនៅសង្វៀនគុនខ្មែរអលស្តារពេញបីទឹក៕