នាព្រឹកថ្ងៃទី២៦ ខែមិថុនា ឆ្នាំ២០២៣នេះ គណៈកម្មការជំនាញ២របស់ព្រឹទ្ធសភា គឺគណៈកម្មការនីតិកម្ម និងយុត្តិធម៌នៃព្រឹទ្ធសភា ដែលគណៈកម្មការទី៦ និងគណៈកម្មការមហាផ្ទៃ ការពារជាតិ ទំនាក់ទំនងរដ្ឋសភា ព្រឹទ្ធសភា អធិកាកិច្ច និងមុខងារសាធារណៈ ដែលជាគណៈកម្មការទី៤ បានបើកកិច្ចប្រជុំរួមគ្នា ដើម្បីពិភាក្សាលើសេចក្តីព្រាងស្តីពីវិសោធនកម្មច្បាប់បោះឆ្នោត។

 

លោក ម៉ម ប៊ុននាង សមាជិក និងអ្នកនាំពាក្យព្រឹទ្ធសភា ប្រាប់ពីនីតិវិធីថា ក្រោយពិនិត្យចប់ គណៈកម្មាធិការជំនាញ នឹងប្រគល់សេចក្តីព្រាងនេះ ទៅគណៈអចិន្រ្តៃយ៍វិញ។ លោក បន្តថា គណៈអចិន្រ្តៃយ៍ នឹងបើកកិច្ចប្រជុំលើកទី២ នៅព្រឹកថ្ងៃ២៨មិថុនា ដើម្បីកំណត់កាលបរិច្ឆេទ សម្រាប់ការបើកកិច្ចប្រជុំពេញអង្គរបស់ព្រឹទ្ធសភា។
 

ក្នុងកិច្ចសម្ភាសជាមួយសារព័ត៌មានថ្មីៗ លោក អះអាងដូច្នេះថា៖«ពេលកិច្ចប្រជុំពេញអង្គរបស់ព្រឹទ្ធសភា អនុម័តហើយ សេចក្តីព្រាងនេះ នឹងត្រូវបញ្ជូនទៅរដ្ឋសភាវិញ»។ 

អ្នកនាំពាក្យព្រឹទ្ធសភា បន្ថែមថា បើសេចក្តីព្រាងវិសោធនកម្មនេះ ត្រូវតម្រូវឲ្យឆ្លងកាត់ក្រុមប្រឹក្សាធម្មនុញ្ញ រដ្ឋសភា នឹងបញ្ជូនទៅកាន់ក្រុមប្រឹក្សាធម្មនុញ្ញ។ សេចក្តីព្រាងច្បាប់ នឹងក្លាយជាច្បាប់ នៅពេលព្រះមហាក្សត្រចេញព្រះរាជក្រឹត្យ។
 

កាលពីព្រឹកថ្ងៃទី២៣មិថុនា រដ្ឋសភា បានអនុម័តទាំងស្រុងលើសេចក្តីព្រាងស្តីពីវិសោធនកម្មច្បាប់បោះឆ្នោតនេះ។ មាត្រាថ្មី ដែលត្រូវបានសរសេរចូលទៅក្នុងច្បាប់បោះឆ្នោត មានខ្លឹមសារជារួមថា អ្នកដែលមិនទៅបោះឆ្នោត នឹងមិនមានសិទ្ធិឈរជាបេក្ខជនឲ្យគេបោះឆ្នោត នៅពេលក្រោយឡើយ។ 
 

អ្នកដែលផ្តើមគំនិតឲ្យធ្វើវិសោធនកម្មលើច្បាប់បោះឆ្នោត គឺសម្តេចនាយករដ្ឋមន្រ្តី ហ៊ុន សែន។ ក្រសួង២ គឺក្រសួងមហាផ្ទៃ និងក្រសួងយុត្តិធម៌ ជាសេនាការរបស់ប្រមុខរដ្ឋាភិបាល ក្នុងការរៀបចំធ្វើសេចក្តីព្រាងសោធនកម្មច្បាប់នេះ។ ផ្អែកតាមការប្រកាសជាសាធារណៈរបស់ប្រមុខរដ្ឋាភិបាល សេចក្តីព្រាងនេះ នឹងត្រូវក្លាយជាច្បាប់ មុនការបោះឆ្នោតជាតិ នៅថ្ងៃទី២៣ ខែកក្កដា ឆ្នាំ២០២៣៕