បើតាមការប្រកាសពីសំណាក់ក្លិប Barcelona ស្ថិតនៅក្នុងលីគ La Liga ថ្ងៃទី២៦ ខែមិថុនា ខ្សែបម្រើ Gundogan យកព្រមចុះកិច្ចសន្យា ២ឆ្នាំជាមួយនឹងក្រុមរហ័សនាមអ្នកមានបុណ្យ។ 

កីឡាករវ័យ ៣២ឆ្នាំ ទទួលបានកិច្ចសន្យាលេងឱ្យក្រុមយក្សរបស់អេស្ប៉ាញរហូតដល់ឆ្នាំ ២០២៥ ជាមួយនឹងជម្រើសបន្តបន្ថែមនៅឆ្នាំបន្ទាប់។ មិនត្រឹមតែប៉ុណ្ណោះ Barca ក៏បាននិយាយបន្ថែមចំពោះកិច្ចសន្យារបស់ Gundogan ដែរថាពួកគេបានរួមបញ្ចូលនៅលក្ខខណ្ឌទិញផ្តាច់មានតម្លៃប្រមាណ ៤០០លានអឺរ៉ូ(៤៣៥,៧២លានដុល្លារ)។
  

កីឡាករសញ្ជាតិអាល្លឺម៉ង់ ចាកចេញពីក្រុម Man City បន្ទាប់ពីបានជួយក្រុមជើងខ្លាំងអង់គ្លេសគ្រងជើងឯកពានរង្វាន់ ៣ ក្នុងមួយរដូវកាល Premier League, FA Cup និង Champions League។ នៅជាមួយនឹង Man City រយៈកាល ៧ ឆ្នាំតាំងពីឆ្នាំ ២០១៦ Gundogan បង្ហាញពីសមត្ថភាពនៅក្នុងប្រទេសអង់គ្លេស ដោយគេរកបានពានរង្វាន់ចំនួន ១៤ បូករួមទាំងពានរង្វាន់ Premier League ចំនួន ៥។
 

Gundogan ត្រូវបានលោក Pep Guardiola ដែលជាអតីតគ្រូបង្វឹក Barcelona មួយរូបនាំយកគេទៅចូលរួម Man City ក្នុងឆ្នាំ ២០១៦ បើទោះជាកីឡាករសញ្ជាតិអាល្លឺម៉ង់រូបនេះនៅរដូវកាលដំបូងត្រូវខកខានចូលរួមហ្វឹកហាត់ជាមួយក្រុមដោយសារតែរងរបួស ក្រោយផ្លាស់មកពីក្រុម Borussia Dortmund។


 

២ រដូវកាលចុងក្រោយបំផុត កីឡាករវ័យ ៣២ឆ្នាំ បង្ហាញថាគេជាមនុស្សសំខាន់នៅក្នុងក្រុម Man City ដោយគេតែងតែរកបានគ្រាប់បាល់ជួយក្រុមដណ្តើមបានពានរង្វាន់នានា។ Gundogan ចាកចេញពី Man City បន្ទាប់ពីបានបង្ហាញខ្លួនលេងប្រមាណជាង ៣០០ប្រកួត រកបានគ្រាប់បាល់ ៦០គ្រាប់ និងបញ្ជូនបាល់ឱ្យមិត្តរួមក្រុម ៤០លើករាល់គ្រប់ការប្រកួត។
 

បទពិសោធន៍របស់គេនឹងក្លាយជាកម្លាំងដ៏សំខាន់សម្រាប់ក្រុម Barca របស់លោក Xavi បន្ទាប់ពីកីឡាករខ្សែបម្រើជើងចាស់ប្រចាំក្រុម Sergio Busquets បានចាកចេញពីក្រុមនាចុងបញ្ចប់រដូវកាល ២០២២-២៣ ក្រោយរួមរស់រយៈពេល ១៨ឆ្នាំជាមួយជើងខ្លាំងស្ថិតក្នុងតំបន់ Catalan។ កាលពីរដូវកាលមុន Barcelona បានឈ្នះពានរង្វាន់ La Liga ប៉ុន្តែពួកគេបានបរាជ័យនៅក្នុងពានរង្វាន់អឺរ៉ុបទាំង Champions League និង Europa League៕