ក្រុមជម្រើសជាតិកីឡាបាល់ទាត់នារីកម្ពុជា អាយុក្រោម១៩ឆ្នាំ បានទៅដល់ប្រទេសឥណ្ឌូណេស៊ី កាលពីថ្ងៃទី៣ ខែកក្កដា ឆ្នាំ២០២៣ ដើម្បីត្រៀមប្រកួត ក្នុងព្រឹត្តិការណ៍ AFF U19 Women’s Championship 2023។ យោងទៅលើការផ្សាយរបស់សហព័ន្ធកីឡាបាល់ទាត់កម្ពុជា កីឡាការិនី ២៣រូប ត្រូវបានជ្រើសរើសចូលរួមក្នុងព្រឹត្តិការណ៍នោះ។ ក្នុងចំណោមអ្នកទាំងនោះ កីឡាការិនី មកពីខេត្តសៀមរាប មានចំនួន ៧នាក់ច្រើនជាងគេ ក្នុងក្រុម។
 

កម្ពុជា ស្ថិតក្នុងពូល A ជាមួយម្ចាស់ផ្ទះ ឥណ្ឌូណេស៊ី ឡាវ និងទីម័រខាងកើត។ បន្ទាប់ពីប្រកួតជាមួយឡាវនៅកីឡដ្ឋាន Gelora Sriwijaya ក្រុមនារីកម្ពុជា នឹងត្រូវប៉ះក្រុមទីម័រខាងកើត នៅថ្ងៃទី៧ ខែកក្កដា ហើយត្រូវជួបជាមួយឥណ្ឌូណេស៊ី នៅថ្ងៃទី៩ ខែកក្កដា។ ពូល B មាន វៀតណាម, ម៉ាឡេស៊ី និង សិង្ហបុរី រីឯ ពូល C មានថៃ មីយ៉ាន់ម៉ា និងហ្វីលីពីន៕