Didier Drogba អតីតខ្សែប្រយុទ្ធឆ្នើម Chelsea មើលឃើញថាកីឡាករបាល់ទាត់ក្នុងប្រទេសតំបន់អាហ្វ្រិក ជារឿយៗងាយធ្លាក់ចូលទៅក្នុងការបោកប្រាស់ របស់ទីភ្នាក់ងារក្លែងក្លាយ ដែលលួចសន្យាចំពោះភាពល្បីល្បាញ និងទ្រព្យសម្បត្តិ។ Drogba នឹងបង្កើតក្រុមការងារ បង្រៀនកីឡាករអាហ្វ្រិក ឱ្យគេចផុតពីការបោកប្រាសរបស់ភ្នាក់ងារទាំងនោះ។
តាមរយៈមូលនិធិផ្ទាល់ខ្លួន Drogba បានរួមដៃគ្នាជាមួយនឹងស្ថាប័នសហព័ន្ធកីឡាករបាល់ទាត់អន្តរជាតិ (FIFPRO) និងអង្គការការងារអន្តរជាតិ (ILO) ដើម្បីលើកកម្ពស់ការយល់ដឹងអំពីហានិភ័យដែលអាចកើតឡើង ទាក់ទងនឹងទីភ្នាក់ងារកីឡាករក្លែងក្លាយ។
«សូមមេត្តា ខ្ញុំត្រូវការអ្នកទាំងអស់គ្នាឮពីរឿងទាំងនេះ។ គួរតែប្រុងប្រយ័ត្នចំពោះនរណាម្នាក់ដែលអ្នកជឿទុកចិត្ត សូមកុំជឿជាក់លើមនុស្សដែលចង់បានតែលុយរបស់អ្នកអី។»។ អតីតខ្សែប្រយុទ្ធក្រុមកូតឌឺវ័រ និយាយបែបនេះ ក្នុងឃ្លីបវីដេអូមួយដើម្បីផ្តាំផ្ញើទៅដល់កីឡាករអាហ្វ្រិក។
ស្ថាប័ន FIFPRO ធ្លាប់បានស្ទង់មតិកាលពីពេលថ្មីៗនេះ ដោយរកឃើញថា៧០ភាគរយ នៃកីឡាករចំនួន ២៦៣នាក់មកពី ៧ប្រទេសស្ថិតក្នុងតំបន់អាហ្វ្រិក ត្រូវបានក្រុមភ្នាក់ងារក្លែងក្លាយ ទាក់ទងដោយបានសន្យាថា នឹងជួយពួកគេផ្លាស់ប្តូរក្លិបថ្មី។
ជារឿយៗ កីឡាករដែលជិតនឹងត្រូវបានផ្តល់ឱកាសនៃការសាកល្បងមានប្រមាណ ៤៣ភាគរយ ឬការចុះកិច្ចសន្យាជាមួយក្លិបមានត្រឹម ៣៩ភាគរយប៉ុណ្ណោះ។ ចំណែក ៥៦ភាគរយ គឺទៅលើការមិនទទួលបានការសាកល្បងដែលក្រុមភ្នាក់ងារបានសន្យា ខណៈ ៤៤ភាគរយ គឺមិនអាចចុះកិច្ចសន្យាជាមួយក្លិប ទៅតាមអ្វីដែលពួកគេបានរំពឹងទុកឡើយ។
សេចក្តីថ្លែងការណ៍ពី FIFPRO បានប្រកាសដូច្នេះថា៖« FIFPRO បានឮនូវរឿងរ៉ាវជាច្រើន អំពីកីឡាករដែលត្រូវបានទាក់ទាញដោយមនុស្ស ដែលព្យាយាមតាំងខ្លួនធ្វើជាភ្នាក់ងាររបស់កីឡាករ ដោយបានសន្យាចំពោះការរៀបចំកិច្ចសន្យាជាមួយក្លិបថ្មី។ ការពិតមិនសូវល្អមើលទេ ករណីដ៏អាក្រក់បំផុតមួយចំនួនទៅលើកីឡាករ ត្រូវបានមើលឃើញថា ពួកគេជាប់គាំងនៅបរទេស ដោយគ្មានលុយដើម្បីត្រលប់ទៅផ្ទះវិញ។»។
ចំពោះករណីកើតឡើងច្រើននោះ គឺលើកីឡាករវ័យក្មេងរបស់អាហ្វ្រិក។ Drogba បាននិយាយដាស់តឿនពួកគេថា ពិតជាគ្រោះថ្នាក់ក្នុងការចង់បានភ្នាក់ងារ សម្រាប់ការផ្លាស់ប្តូរក្លិប។ Drogba អះអាងបន្ថែមនៅលើបញ្ហាទាំងនេះថា ភ្នាក់ងារល្អ គឺជាមនុស្សដែលមើលទៅយើងមិនអាចទុកចិត្តបាន តែជាភ្នាក់ងារល្អពិតប្រាកដ។
យ៉ាងណាពេលដ៏ខ្លីខាងមុខ សហព័ន្ធបាល់ទាត់អន្តរជាតិ (FIFA) នឹងចេញបទប្បញ្ញត្តិថ្មីមួយ នៅដើមខែកញ្ញា ដោយគ្រប់ភ្នាក់ងារបាល់ទាត់ទាំងអស់ នឹងត្រូវតែមានលិខិតបញ្ជាក់ពី FIFA ហើយដើម្បីឱ្យមានលិខិតទាំងអស់នេះពួកគេក៏ត្រូវតែឆ្លងកាត់ការប្រលងជាមុនផងដែរ។
Drogba វ័យ ៤៥ឆ្នាំ គឺជាកីឡាករអាហ្រ្វិកដែលជោគជ័យបំផុតមួយ នៅក្នុងប្រវត្តិសាស្ត្ររបស់ក្របខណ្ឌ Premier League ដោយរូបគេ ធ្លាប់រកបានគ្រាប់បាល់ចំនួន ១៦៤គ្រាប់ឱ្យ Chelsea។ Drogba ឈ្នះពានរង្វាន់ Premier League ចំនួន ៤លើក និង Champions League ១លើក មិនតែប៉ុណ្ណោះ គេឈ្នះស្បែកជើងមាស ជាកីឡាករស៊ុតបញ្ចូលទីច្រើនក្នុងមួយរដូវកាលចំនួន ២លើក៕