សម្រាប់និស្សិត​ ជ័យ ស្រីលីន ​គេមិនអាចបង្អាប់បង្អោនស្ត្រីបច្ចុប្បន្ន ថាទន់ខ្សោយ រស់នៅពឹ​ងផ្អែកតែលើបុរសបានទៀតនោះទេ។ ​តាមរយៈការអប់រំ ស្រ្តី ​មិនត្រឹមតែមាន​ឯករាជ្យ​ក្នុង​ការ​រស់នៅ​នោះទេ ប៉ុន្តែពួកគេ កំពុងចូលរួមក្នុងតួនាទី​ធ្វើសេចក្តីសម្រេចចិត្ត និង​អភិវឌ្ឍន៍​សេដ្ឋកិច្ច និងសង្គម ​ដូចបុរសដែរ។ កញ្ញា ជ័យ ស្រីលីន លើកឡើងដូច្នេះ មុននឹងបន្តថា៖ ​« នៅពេលស្ត្រីមានការងារច្បាស់លាស់ រៀនចេះដឹង គាត់ពុំចាំបាច់ពឹងផ្អែកលើបុរសទៀត​ទេ គាត់អាចយកចំណេះគាត់មកអភិវឌ្ឍន៍ខ្លួនគាត់! ដោយការងារដែលបុរសធ្វើបាន ស្រ្តី​ក៏អាចធ្វើ​បានដែរ»។ 
  

​ដ្បិតតែជាមុខជំនាញដែលខ្លួនស្រឡាញ់ ប៉ុន្តែក្នុងពេលសិក្សា និស្សិត ជ័យ ស្រីលីន ក៏​ជួប​ការលំបាកខ្លះដែរ ព្រោះជាមុខវិជ្ជាដែលទាមទារឱ្យសិក្សានៅនឹងមុខកុំព្យូទ័រច្រើន ព្រមទាំង​ទាមទារ​ឱ្យនិស្សិតស្រាវជ្រាវច្រើនផងដែរ។ ដើម្បីបង្កើនសមត្ថភាពក្នុងជំនាញនេះ ស្រីជ័យ មិនរៀន​ត្រឹមតែទ្រឹស្តីនៅសាលានោះទេ នាងក៏ចូលហ្វឹកហាត់ការងារទាក់ទងនឹងជំនាញ​ដែល​ខ្លួន​រៀន​បណ្តើរដែរ ជាមួយមិត្តរួមថ្នាក់ផ្សេងទៀត។ បើតាមនិស្សិតជ័យ ស្រីលីន  ពួកគេ​រៀនសរសេរកូដ និងស្រាវជ្រាវឯកសារផ្សេងៗ ដែលពាក់ព័ន្ធផ្នែកបច្ចេកវិទ្យា ដើម្បី​រួមគា្ន​រកដោះស្រាយ និងបង្កើតអ្វីដែលថ្មី។ រៀននៅសាកលវិទ្យាល័យពេលព្រឹក ធ្វើការងារ​ស្ម័គ្រចិត្ត​ពេលថ្ងៃ ឬធ្វើនៅ​ម៉ោងទំនេរពីការសិក្សា។

ក្រៅពីទៅរៀននៅសាលា ធ្វើការងារស្ម័គ្រចិត្ត និងទៅកន្លែងហូបអាហារ ស្រីលីន មិនទុក ឱ្យខ្លួនឯងទំនេរនោះទេ គឺរូបគេបានយកជំនាញកំពុងរៀន និងអនុវត្តន៍បច្ចុប្បន្ននៅសាលា រៀន ដែលមានឈ្មោះថា «Optimus» មកចូលរួមប្រកួតនៅក្នុងកម្មវិធី Bandos Digital Startup 2023 ជាមួយមិត្តភក្ដិ ២នាក់ផ្សេងទៀត។ ជាលទ្ធផល ពួកគេទទួលបានជ័យលាភី ទឹក​ប្រាក់ចំនួន ១ម៉ឺនដុល្លារ។ «Optimus» ជាបច្ចេកវិទ្យា AI មួយមានតួនាទីចាប់យកចំនួន និង​ស្លាកលេខយានយន្ត ដើម្បីប្រមូលទិន្នន័យយ៉ាងងាយស្រួលដោយ ពុំចាំបាច់កត់ត្រា ដោយ​ដៃ។
 

​យុវតីរូបនេះ សង្ឃឹមថា នៅក្រោយការបញ្ចប់ការសិក្សារបស់ខ្លួន នាងនឹងអាចក្លាយ​ជា​ចំណែក​មួយ ក្នុងការចូលរួម​អភិវឌ្ឍន៍សង្គមជាតិ តាមរយៈជំនាញរបស់ខ្លួន។ ជាមួយគ្នានេះ និស្សិតរូបនេះ ក៏លើកទឹកចិត្តឱ្យស្ត្រីផ្សេងទៀត បន្តចាប់យកការអប់រំសម្រាប់ខ្លួនដែល​សម្រាប់ កញ្ញា ស្រីលីន ការអប់រំ គឺជាតម្លៃដែលធ្វើឱ្យស្ត្រីមានឯករាជ្យ និងក្លាយជាអ្នក​ចូល​រួម​អភិវឌ្ឍសង្គម៕