លោក សាប៊ូន វិនតា​ បានបញ្ជាក់ប្រាប់សារព័ត៌មានថ្មីៗ តាមហ្វេសប៊ុកថា  សិក្ខាសាលាស្ដីពីច្បាប់ នៃការប្រកួត ត្រូវបានធ្វើឡើងដោយសហព័ន្ធកីឡាបាល់ទាត់កម្ពុជា និងក្រុមហ៊ុន Cambodian Premier League មានសារសំខាន់ សម្រាប់ផ្ដល់ចំណេះដឹងបន្ថែម ក៏ដូចជាការយល់ដឹង ក្នុងការប្រកួតខេប៊ូឌាព្រីមាលីគ ដែលនឹងមកដល់ឆាប់ៗនេះ។ ជាទូទៅក្រុមទាំងអស់ តែងធ្វើបទបង្ហាញទៅដល់កីឡាករ មុនរដូវកាលចាប់ផ្ដើម។ ក្រុមហ៊ុន CPL និងសហព័ន្ធកីឡាបាល់ទាត់កម្ពុជា ក៏ចុះធ្វើបទបង្ហាញនូវច្បាប់ទាំងអស់នេះ គឺដើម្បីឲ្យក្លិបទាំងអស់យល់ដឹងពីអ្វី ដែលបានអភិវឌ្ឍ និងបច្ចុប្បន្នភាព នៃបទបញ្ជារ និងច្បាប់ទម្លាប់ពីការប្រកួតនីមួយ។
 

«សិក្ខាសិលាច្បាប់នៃការប្រកួតដែលរៀបចំដោយក្រុមហ៊ុនលីគCPL និងសហព័ន្ធបាល់ទាត់កម្ពុជាពិតជាមានសារះសំខាន់សម្រាប់កីឡាករនិងក្រុមការងារមន្ត្រីគ្រូបង្វឹកអោយបានយល់ដឹងបន្ថែមពីច្បាប់នៃការប្រកួតដែលផ្លាស់ប្តូរថ្មីមួយចំនួននិងត្រូវប្រើប្រាស់ក្នុងការប្រកួតលីគខាងមុខនេះដែលអាចធ្វើអោយកីឡាករនិងក្រុមទាំងមូលបានត្រៀមលក្ខណៈមួយផ្នែកទៀតទៅលើការប្រកួតផងដែរ។ ជាទូទៅក្នុងរដូវកាលត្រៀមក្នុងបាល់ទាត់ក្រុមទាំងអស់តែងតែធ្វើបទបង្ហាញច្បាប់នៃការប្រកួតជាមួយអ្នកជំនាញទៅកាន់កីឡាករនិងក្រុមរបស់ខ្លួនផងដែរព្រោះវាជាផ្នែកមួយសំខាន់សម្រាប់ការប្រកួត។»។ គ្រូបង្វឹករូបនេះ បាននិយាយដូច្នេះ។ 

 

គ្រូបង្វឹកក្លិបគិរីវង់សុខសែនជ័យរូបនេះ បានកត់សម្គាល់ថា ច្បាប់នៃការប្រកួត តែងមានផ្លាស់ប្ដូរ ឬកែសម្រួលមួយចំនួន ដើម្បីជួយជម្រុញឲ្យការប្រកួត កាន់តែទាក់ទាញ់ និងយុត្តិធម៌ ស្មើភាពសម្រាប់ការកាត់សេចក្ដី។ 
 

ដោយឡែក គ្រូបង្វឹករូបនេះ បានប្រាប់ពីគោលច្បាប់មួយចំនួន ដែលសិក្ខាសាលា បានធ្វើបទបង្ហាញ មានដូចជា៖
 

- ច្បាប់ ស្ដីពីបញ្ហាកីឡាករជ្រៀតជ្រេតចូលក្នុងទីលាន

- ច្បាប់ ស្ដីពីថេរវេលានៃការប្រេកួត (ទាក់ទងនិងម៉ោងបន្ថែមដើម្បីអោយកីឡាករនិងគ្រូបង្វឹកបានយល់)

- ច្បាប់ ស្ដីពីការកំណត់ការទាត់បាល់ប៉េណាល់ទី (Penalty Shoot-out)

- ច្បាប់ ស្ដីពីជំហរក្រៅល្បែង (Offside) 

- ច្បាប់ ស្ដីពីការកំណត់ការពិន័យទៅលើកំហុសកើតឡើងនៅលើទីលាន
 

គួរបញ្ជាក់ផងដែរថា ក្នុងសិក្ខាសាលានេះ ក្លិបបាល់ទាត់គិរីវង់សុខសែនជ័យ មានសិក្ខាកាមចូលរួម សរុបទាំងអស់ ៣៥នាក់ ក្នុងនោះកីឡាករ ២៧នាក់ និង មន្ត្រីក្រុមការងារគ្រូបង្វឹក ៨នាក់៕