លោក រស់ សុជា បានប្រាប់សារព័ត៌មានថ្មីៗ តាមបណ្តាញ Messenger ថា កីឡករ-កីឡាការិនីថ្នាល នៅក្នុងក្លិបប្រដាល់ចក្រវាឡគុនខ្មែរ មានឆន្ទៈខ្លាំង ទាំងសម្រាប់ការប្រកួត និងការហ្វឹកហាត់ ដែលជាហេតុធ្វើឲ្យរូបលោក សប្បាយចិត្ត និងចង់បណ្ដុះធនធានទាំងនោះឲ្យខ្លាំង ដើម្បីឲ្យក្លាយជាទំពាំងស្នងគុនខ្មែរ នាថ្ងៃអនាគត។ ប្រធានក្លិបរូប​នេះ បានប្រាប់បន្ថែមថា ដោយសារតែបញ្ហាជីវភាពខ្វះខាតរបស់ពួកគេ  ធ្វើឲ្យក្មេងៗទាំងនោះត្រូវចំណាយពេលធ្វើការរោងចក្រ ហើយខ្លះរើសអេតចាយ ដើម្បីរកចំណូលខ្លះ សម្រាប់គ្រួសារ។ នេះជាហេតុធ្វើឲ្យសិស្សប្រដាល់ទាំងនោះ ខ្ជះខ្ជាយកម្លាំង ស្មារតី និងមិនអាចផ្ដោតអារម្មណ៍ហ្វឹកហាត់បានល្អ។
 

លោក រស់ សុជា បានផ្ដល់អាហារសម្រាប់សិស្សទាំងនោះ ហើយក៏បានបង្រៀន បន្ថែមទៀត បន្ទាប់ពីហាត់ប្រដាល់ចប់ នៅរៀងរាល់ពេលល្ងាច។ ជាទូទៅថ្នាក់ចំណេះដឹងទូទៅ លោក សុជា ចាប់បង្រៀន ពីម៉ោង ៩:០០ យប់ រហូតដល់ម៉ោង ៩:៣០ យប់។ 
 

«ខ្ញុំសប្បាយចិត្តពេលឃើញ ពួកគាត់ប្រឹងហ្វឹកហាត់។ កីឡាករ-កីឡាការិនី សម្រុកហាត់ខ្លាំង ហើយឥឡូវពួកគាត់ មានឆន្ទៈ ចង់ឈ្នះណាស់។ អ៊ីចឹង ខ្ញុំ ត្រូវជួយសម្រួលគាត់ ឲ្យគាត់មានអារម្មណ៍ថា កន្លែងហាត់ប្រដាល់ មិនត្រឹមតែមកហាត់ប្រដាល់ តែជាផ្ទះ និងជាកន្លែងអប់រំរបស់ពួកគេ។»។ លោក រស់ សុជា បាននិយាយដូច្នេះ។
 

ក្លិបប្រដាល់គុនខ្មែរមួយនេះ បានបិទម្ដងរួចមកហើយ គឺក្នុងដើមឆ្នាំ២០២០ ព្រោះវិបត្តិកូវីដ-១៩ ហើយបានបើកជាថ្មីម្ដងទៀត នៅខែកុម្ភៈ ឆ្នាំ២០២៣។ លោក រស់ សុជា បើកក្លិបនេះ មានគោលដៅសំខាន់មួយ គឺបណ្ដុះធនធានថ្នាលឲ្យមានសមត្ថភាពក្នុងវិស័យប្រដាល់គុនខ្មែរ។
 

បច្ចុប្បន្ន ក្លិបប្រដាល់ចក្រវាឡគុនខ្មែរ មានសិស្សប្រដាល់ដែលជាកីឡាករ-កីឡាការិនីថ្នាល់ទាំងអស់ ៧នាក់។ ក្នុងចំណោម ៧នាក់នោះ កីឡាការិនី ធឿន ស្រីនី ត្រូវប្រកួតដណ្ដើមខ្សែក្រវាត់ទម្ងន់ ៤៥គីឡូក្រាម នៅដើមខែសីហា។ ចំណែក កីឡាករ ជា វឌ្ឍនា ត្រូវប្រកួត លើប្រភទទម្ងន់ ៤៨គីឡូក្រាម៕