លោក សរ សិទ្ធិ អនុរដ្ឋលេខាធិការក្រសួងមហាផ្ទៃ និងជាប្រតិភូដឹកនាំអត្ដពលិកចូលរួម The 20th World Police and Fire Games  បានថ្លែងក្នុងកិច្ចជួបសំណេះសំណាលជាមួយប្រតិភូកីឡាថា ព្រឹត្តិការណ៍អន្ដរជាតិនេះ គឺធ្វើឡើងសម្រាប់កងកម្លាំងប៉ូលិស បង្ហាញពីសាមគ្គីភាព សមត្ថភាព បំណិន និងទេព្យកោសល្យ តាមរយៈការប្រកួតប្រជែងកីឡា។

 

ដោយឡែក លោក ចេង ពិរោទ បាននិយាយថា អត្ដពលិកកម្ពុជា បានត្រៀមខ្លួនសម្រាប់ព្រឹត្តិការណ៍មួយនេះ តាំងពីដើមឆ្នាំ២០២២។ គ្រូបង្វឹករូបនេះ បានអះអាងថាកីឡាករ-កីឡាការិនី បានប្រឹងហ្វឹកហាត់ជាខ្លាំង និងទទួលបានសមិទ្ធផលល្អច្រើន ដូចជាក្នុងព្រឹត្តិការណ៍ស៊ីហ្គេម អត្ដពលិកមួយចំនួន ទទួលបានមេដាយ រីឯមួយចំនួនទៀត បំបែកកំណត់ត្រាថ្មីសម្រាប់ខ្លួនឯង។ «ខ្ញុំ រំពឹងទុកខ្ពស់ដែរ ដោយសារតែខ្ញុំ បានមើលការប្រកួតពីមុនៗ ដូចជានៅហូឡង់ និងចិន។ ដូច្នេះ ខ្ញុំមានការរំពឹកទុកខ្ពស់ក្នុងការបានមេដាយ មិនថាមេដាយក្នុងកម្រិតណាទេ ប៉ុន្ដែសំខាន់ឲ្យពួកគាត់ យកមេដាយមាសជូនជាតិឲ្យបាន។»។ លោក ចេង ពិរោទ បាននិយាយដូច្នេះ។
 

ប្រតិភូកីឡាកម្ពុជា ចេញដំណើរទៅប្រកួត នៅព្រឹកថ្ងៃទី២៥ ខែកក្កដា ឆ្នាំ២០២៣។ កីឡា ១៣​ប្រភេទនោះ រួមមាន៖ វាយ​កូន​ឃ្លី​លើ​តុ, បាល់ទះឆ្នេរខ្សាច់, ចំបាប់, ចំបាប់​កាច់​ដៃ,​ កីឡាវាយសី, យូដូ, ជឺជីតស៊ូ, ហែលទឹក, ការ៉ាតេ, វាយកូនគោល, បាល់ទះក្នុងសាល, ​ Bench Press និង Push Pull Lifting ។ ចំពោះការប្រកួតនឹងចាប់ផ្ដើមពីថ្ងៃទី២៨ ខែកក្កដា រហូត​ដល់​ថ្ងៃ​ទី០៦ ខែសីហា ឆ្នាំ២០២៣ ។ ដោយឡែកកម្ពុជា ធ្លាប់ដណ្ដើមបានមេដាយសរុប ៣៣គ្រឿង ក្នុងព្រឹត្តិការណ៍នេះ កាលពីឆ្នាំ២០២២ ក្នុងនោះ មានមេដាយមាស១៥ ប្រាក់៨ និងសំរឹទ្ធ ១០។ 
 

យោងតាមវេបសាយ World Police and Fire Games 2023 ព្រឹត្តិការណ៍នេះ មានអត្ដពលិកចូលរួម សរុបប្រមាណជាង ១៦០០០នាក់ មកពី ៧០ប្រទេស ដោយប្រកួតលើ ៦៧ប្រភេទកីឡា។ ៕