សហព័ន្ធកីឡាបាល់ទះកម្ពុជា នៅថ្ងៃទី២៦ ខែកក្កដា ឆ្នាំ២០២៣ បានបើកវគ្គបណ្តុះបណ្តាលគ្រូបង្វឹកបាល់ទះកម្រិត “គ”(C) ឆ្នាំ២០២៣ នាទីស្នាក់ការសហព័ន្ធកីឡាបាល់ទះ ក្នុងបរិវេណពហុកីដ្ឋានជាតិអូឡាំពិក។ សិក្ខាកាមទាំងអស់មានចំនួន ៤១រូប ក្នុងនោះស្រី ៣រូប ដែលទទួលបានការបង្រៀនដោយលោក Barrios Berto Friol គ្រូឧទ្ទេសជនជាតិគុយបា ដែលជាគ្រូកម្រិត “ក” A។
លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជាបានលើកឡើងក្នុងវគ្គបណ្តុះបណ្តាលគ្រូបង្វឹកបាល់ទះកម្រិត “គ” ថាកន្លងមកសហព័ន្ធបានរៀបចំវគ្គបណ្តុះបណ្តាលមន្រ្តីអាជ្ញាកណ្តាលកម្រិតជាតិ និងអន្តរជាតិជាច្រើនរូបរួចមកហើយ ក្នុងនោះអាជ្ញាកណ្តាលកម្រិតអន្តរជាតិ ៣រូប អាជ្ញាកណ្តាលកម្រិតជាតិ “ខ” ២៥រូប ស្រី៥រូប កម្រិត “គ” ២១២រូប ក្នុងនោះមានស្រី ២៣រូប។
គ្រូបង្វឹកកម្រិតជាតិ “ខ” B មានចំនួន ២០រូបក្នុងនោះស្រី ១រូប គ្រូបង្វឹកកម្រិតជាតិ “គ” C មានចំនួន ៣២រូប។ ក្នុងវគ្គបណ្តុះបណ្តាលគ្រូបាល់ទះកម្រិតជាតិ “គ” C នឹងចាប់ប្រព្រឹត្តទៅពីថ្ងៃទី២៦ រហូតដល់ថ្ងៃទី៣១ ខែកក្កដា ឆ្នាំ២០២៣។
សិក្ខាកាមទាំង ៤១រូបដែលបានចូលរួមរៀនវគ្គបណ្តុះបណ្តាលនេះមានមកពីបណ្តាក្លិបកីឡាបាល់ទះ និងសមាគមចំនួន ២២រួមមាន៖ នាយកដ្ឋានរៀបចំ និងព្រឹត្តិការណ៍មានចំនួន ២រូប, វិទ្យាស្ថានជាតិអប់រំកាយ និងកីឡា ២រូប, សមាគមកីឡាបាល់ទះក្រសួងមហាផ្ទៃ ២រូប, សមាគមកីឡាបាល់ទះវិសាខា ២រូប, ក្លិបកីឡាបាល់ទះរដ្ឋបាលរាជធានីភ្នំពេញ, ក្លិបកីឡាបាល់ទះស្នងការដ្ឋាននគរបាលខេត្តកំពត ២រូប។
ក្លិបកីឡាបាល់ទះស្នងការដ្ឋាននគរបាលខេត្តព្រះសីហនុ ២រូប, ក្លិបកីឡាបាល់ទះស្នងការដ្ឋាននគរបាលខេត្តស្វាយរៀង ២រូប, ក្លិបកីឡាបាល់ទះស្នងការដ្ឋាននគរបាលខេត្តឧត្តរមានជ័យ ២រូប, ក្លិបកីឡាបាល់ទះស្នងការដ្ឋាននគរបាលខេត្តកែប ២រូប, ក្លិបកីឡាបាល់ទះស្នងការដ្ឋាននគរបាលខេត្តប៉ៃលិន ២រូប, ក្លិបកីឡាបាល់ទះតាឌីព្រះវិហារ ២រូប និងក្លិបកីឡាបាល់ទះកងពលធំអន្តរាគមន៍លេខ៣ មានចំនួន១រូប។
គួបញ្ជាក់ថា ការរៀបចំវគ្គបណ្តុះបណ្តាលគ្រូបង្វឹកបាល់ទះកម្រិត “គ” C គឺទទួលបានការគាំទ្រឧបត្ថម្ភដោយក្រសួងអប់រំយុវជន និងកីឡាតាមរយៈនាយកដ្ឋានអប់រំកាយ និងកីឡា។ សិក្ខាកាមដែលបានបញ្ចប់វគ្គបណ្តុះបណ្តាលនេះនឹងទទួលបាននូវវិញ្ញាបនបត្រដែលបញ្ជាក់ដោយសហព័ន្ធកីឡាបាល់ទះកម្ពុជា៕