ជុំវិញការរៀបចំកម្មវិធីប្រកួតកីឡាបាល់ទាត់ដើម្បីសប្បុរសធម៌ជួយដល់មន្ទីរពេទ្យកុមារបាត់ដំបង មន្ទីរពេទ្យបង្អែកបាត់ដំបង និងប្រជាពលរដ្ឋក្រីក្រនៅតាមមូលដ្ឋានមួយចំនួនក្នុងខេត្តបាត់ដំបង លោក គង់ វង្ស ប្រធានក្លិបបាល់ទាត់បាត់ដំបងយូណាយធីតបញ្ជាក់ថា នេះជាការស្រលាញ់ដែលលោកមានតាំងពិតូច និងមានការតាំងចិត្តចង់ធ្វើដើម្បីរួមចំណែកក្នុងសង្គមជាតិ។

 

ថ្លែងក្នុងបទសម្ភាសផ្ទាល់ជាមួយសារព័ត៌មានថ្មីៗ ក្រោយបញ្ចប់ការប្រកួត លោក គង់ វង្ស បញ្ជាក់ថាមានតែការប្រកួតទីបីនេះទេមានអ្នកមកគាំទ្រច្រើនដែលលោកនឹកស្មានមិនដល់ គឺលើសពីការប្រកួតលើកទីមួយ និងទីពីរនាពេលកន្លងមកដែលលោកបានរៀបចំដើម្បីសប្បុរសធម៌ជួយដល់មន្ទីរពេទ្យ និងប្រជាជនក្រីក្រមួយចំនួនក្នុងខេត្តបាត់ដំបង។

 

លោក គង់ វង្ស និយាយថា៖«សម្រាប់ការប្រកួតទីបីនេះមានអ្នកគាំទ្រច្រើនជាងលើកទី១ និងទី២ ដោយសារក្រុមផ្ការីកគ្រប់រដូវរបស់បងពាក់មី មានតារាច្រើន»។ លោកវេជ្ជបណ្ឌិតផ្នែកឆ្អឹងដែលបានបញ្ចប់ការសិក្សាពីប្រទេសបារាំងរូបនេះបន្ថែមថា ការប្រកួតនីមួយៗលោកចំណាយច្រើនខ្ទង់ពាន់ដុល្លារតែលោកក៏បង្ហាញអារម្មណ៍សប្បាយរីករាយពេលមានអ្នកគាំទ្រច្រើន។

 

«ខ្ញុំសប្បាយចិត្តពេលដែលឃើញបងប្អូននៅក្នុងខេត្តបាត់ដំបងមកគាំទ្របាល់ទាត់ច្រើន ពិសេសថ្ងៃនេះអាកាសធាតុល្អ មិនរំខានដល់ការប្រកួតរបស់យើង»។ បុរសវ័យកណ្តាលរូបនេះនិយាយដូច្នេះ។ ស្ថាបនិកការប្រកួតដើម្បីសប្បុរសធម៌ជួយកុមារ និងពលរដ្ឋក្នុងខេត្តបាត់ដំបងក៏សង្ឃឹមថាខ្លួននឹងមានសមត្ថភាពក្នុងការរៀបចំការប្រកួតជាលើកទីបួនសម្រាប់ជួយដល់ប្រជាពលរដ្ឋក្នុងខេត្តរបស់ខ្លួនផងដែរ។
 

គួបញ្ជាក់ថា ការប្រកួតកីឡាបាល់ទាត់ដើម្បីសប្បុរសធម៌របស់ក្រុមបាត់ដំបងយូណាយធីតនៅក្នុងខេត្តបាត់ដំបងមានបីលើក ដោយប្រកួតដំបូងជាមួយសាកលវិទ្យាជាតិបាត់ដំបង បន្ទាប់ជាមួយជីងចក់ អេហ្វស៊ី និងចុងក្រោយនេះជាមួយក្រុមផ្ការីកគ្រប់រដូវ។ ថវិការដែលចំណាយក្នុងមួយប្រកួតអស់ដល់ ៥០០០ដុល្លារអាមេរិក៕