ជាតិ
សង្គមជាតិ
សពនារីដែលបាត់ខ្លួន នៅទឹកធ្លាក់ឱម៉ាល់ ត្រូវបានរកឃើញ កម្លាំងសមត្ថកិច្ចស្វែងរកជនរងគ្រោះដែលបាត់ខ្លួននៅទឹកធ្លាក់ឱម៉ាល់។ រូបពី ស្នងការដ្ឋាននគរបាលខេត្តកំពត
× សពនារីដែលបានបាត់ខ្លួន អំឡុងពេលបោះតង់នៅតំបន់ទឹកធ្លាក់ឱម៉ាល់ ត្រូវបានរកឃើញ ក្រោយប្រើពេល៤ថ្ងៃ ដើម្បីស្វែងរក។
ស្នងការខេត្តកំពត លោក ម៉ៅ ច័ន្ទមធុរិទ្ធ បានសរសេរសារខ្លីបែបនេះលើទំព័រហ្វេសប៊ុក នៅរសៀលថ្ងៃទី២ សីហាថា៖ «សពប្អូនស្រីខួចត្រូវបានរកឃើញហើយ»។ សមត្ថកិច្ចបានចំណាយពេល៤ថ្ងៃ រាប់ចាប់ពីថ្ងៃកើតហេតុនាយប់ថ្ងៃទី២៩ខែកក្កដា ដើម្បីស្វែងរកសពនារីម្នាក់ ដែលបានបាត់ខ្លួន។
ជុំវិញករណីនេះ លោក ឃុត ឧសភា នាយករដ្ឋបាលខេត្តកំពត ប្រាប់សារព័ត៌មានថ្មីៗថា សពដែលត្រូវបានរកឃើញ គឺនៅក្បែរកន្លែងកើតហេតុ ដោយកៀបនឹងថ្ម។ លោកបញ្ជាក់ថា សពជនរងគ្រោះ ត្រូវបានរៀបចំប្រគល់ទៅក្រុមគ្រួសារហើយ។
គួររំលឹកថា មានយុវជន៤នាក់ ដែលមានប្រុស២នាក់ និងនារី២នាក់បានបោះតង់នៅលើតំបន់ទឹកជ្រោះឪម៉ាល់។ ក្នុងចំណោម៤នាក់នេះ មានបុរសម្នាក់ បានទៅបោះតង់ជាបុគ្គលម្នាក់ឯង។ មានយុវជនមួយក្រុមទៀត ដែលមានបុរសម្នាក់ និងនារី២នាក់ បានបោះតង់នៅទីនោះដែរ។ នៅពេលកើតហេតុ បុរសម្នាក់ដែលបោះតង់ជាលក្ខណៈឯកជនតែម្នាក់ឯងនោះ មិនមានគ្រោះថ្នាក់នោះទេ។ ផ្ទុយទៅវិញ ទឹកធ្លាក់បានបោកនាំយកក្រុមយុវជនបុរសម្នាក់និងនារី២នាក់ធ្លាក់ជ្រោះ។ ក្នុងឧបទ្ទវហេតុនោះ បុរសម្នាក់ត្រូវបានរកឃើញដោយនៅមានជីវិត ហើយនារីម្នាក់ត្រូវបានរកឃើញថាស្លាប់។ នៅសល់តែតែនារីម្នាក់ទៀតដែលទើបត្រូវបានរកឃើញនៅរសៀលថ្ងៃទី២ខែសីហានេះ៕
© រក្សាសិទ្ធិដោយ thmeythmey.com