តាមការចោទប្រកាន់លើកចុងក្រោយ ដែលមានកម្រាស់ ៤៥ទំព័រ លោកដូណាល់ ត្រាំ អតីតប្រធានាធិបតីអាម៉េរិក ត្រូវបានលោក Jack Smith រដ្ឋអាជ្ញា​ពិសេស ចោទពីករណីចំនួន ៤ ក្នុងនោះមានដូចជា បទសមគំនិតបន្លំអាម៉េរិក និងសមគំនិតលើការរារាំងដល់ដំណើរការសភាអាម៉េរិកទាំងពីរថ្នាក់ ក្នុងការបញ្ជាក់ពីជ័យជម្នះរបស់លោក ចូ បៃឌិន នៅក្នុងការបោះឆ្នោតប្រធានាធិបតីក្នុងឆ្នាំ២០២០។ 

 

«គោលបំណងនៃបទសមគំនិតនេះ គឺធ្វើឱ្យមានចលាចលដល់លទ្ធផលស្របច្បាប់នៃការបោះឆ្នោតប្រធានាធិបតីឆ្នាំ២០២០ តាមរយៈការទាមទារដោយខុសលើការបោះឆ្នោត»។ ដីកាចោទធ្វើដោយលោក Smith  បានបញ្ជាក់បែបនេះ ដោយបន្តថា បើទោះចាញ់ការបោះឆ្នោតក៏ដោយ លោកត្រាំ នៅតែប្តេជ្ញាចង់បន្តកាន់អំណាចដដែល។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

ទន្ទឹមនេះ ដីកាខាងលើ បានបន្ថែមទៀតថា ក្រោយការបោះឆ្នោតប្រធានាធិបតីអាម៉េរិកជាងរយៈពេល២ខែ លោកត្រាំ បានផ្សព្វផ្សាយពាក្យកុហក ជុំវិញការបន្លំសន្លឹកឆ្នោត និងជ័យជម្នះរបស់លោក។ ត្រង់ចំណុចនេះ លោក Smith បានចាត់ទុកជាការយល់ខុស។ 

 

ជាការឆ្លើយតប លោកត្រាំ បានសរសេរលើបណ្តាញសង្គមរបស់ខ្លួន ដោយចោទសួររដ្ឋអាជ្ញាពិសេសថា ហេតុអ្វីបានជាមិនមានការចោទប្រកាន់លើរូបលោកកាលពីពេលជាង ២ឆ្នាំមុន។ ជុំវិញបញ្ហានេះ លោកត្រាំបានអះអាងថា រដ្ឋអាជ្ញាពិសេសអាម៉េរិក ចង់លូកដៃក្នុងយុទ្ធនាការឃោនាបោះឆ្នោតរបស់ខ្លួន។ លោកត្រាំ ជាបេក្ខជនប្រធានាធិបតីនាំមុខមួយសម្រាប់បក្សសាធារណរដ្ឋ នៅក្នុងការបោះឆ្នោតប្រធានាធិបតីអាម៉េរិក ឆ្នាំ២០២៤។ 

 

គួររំឭកថា កន្លងមក លោកត្រាំ ត្រូវបានលោក Smith ចោទពីបទមិនទុកដាក់ឯកសាររដ្ឋាភិបាលអាម៉េរិកបានត្រឹមត្រូវ រួមទាំងប្រឈមមុខនឹងការជំនុំជម្រះក្តីពាក់ព័ន្ធនឹងការផ្តល់លុយទៅតារាស្រីអាសអាភាសផង៕