រឿង “ខ្មោចចូល” ស្រង់ពីជីវិតពិតពលទាហាន១រូប ក្រោយសម័យសង្គ្រាម

ជាតិ

រឿង “ខ្មោចចូល” ស្រង់ពីជីវិតពិតពលទាហាន១រូប ក្រោយសម័យសង្គ្រាម

05, Aug 2023 , 9:19 am

រូបភាព

ដោយ: ប៉ូ សាគុន

ភ្នំពេញ៖ រឿង “ខ្មោចចូល” បញ្ចូលទាំងជំនឿលើរបស់ស័ក្ដិសិទ្ធ ដូចជាខ្នាយសត្វព្រៃ បង្ហាញពីជីវិតពលទាហានក្នុងភ្លើងសង្គ្រាម ការច្រណែនឈ្នានីសគ្នា និងការដណ្ដើមអំណាចជាដើម។ រឿងនេះមួយផ្នែក បានកើតឡើងក្នុងសង្គមពិត ហើយមួយផ្នែកទៀត ស្រង់ចេញពីជិវិតពិត របស់ឪពុកមារបស់អ្នកដឹកនាំរឿងផ្ទាល់។

រឿង”ខ្មោចចូល” ត្រូវបានស្រង់ចេញពីរឿង របស់ពលទាហានមួយរូប ក្នុងសម័យក្រោយសង្គ្រាម។ ឆ្នាំ១៩៩១ ជាពេលដែលប្រជាជននិងទាហាន ចូលស្រុកភូមិវិញ ក្រោយចប់សង្គ្រាម។ ទាហានតស៊ូក្នុងព្រៃមួយរូប ត្រូវបានមេទាហានរបស់ខ្លួន ប្រើល្បិចដើម្បីប្លន់ដំណែងយកទៅឱ្យក្មួយរបស់គេ ដោយឈាមត្រជាក់បំផុត។

អ្នកដឹកនាំ និងជាតួសម្ដែងក្នុងរឿង “ខ្មោចចូល” លោក ហ៊ុយ យ៉ាឡេង បានប្រាប់សារព័ត៌មានថ្មីៗ ថា រឿងនេះផ្នែកខ្លះស្រង់ចេញពីរឿងពិត របស់មារបស់លោក។ លោក យ៉ាឡេង បានប្រាប់ថារឿង ”ខ្មោចចូល” មានការចូលរួមពីអ្នកនិពន្ធប្រមាណ៥ទៅ៦រូប។ បើតាមការអះអាង ទម្រាំងចេញជារូបរាង រឿងនេះត្រូវចំណាយពេលយូរ និងមានការខ្វែងគំនិតគ្នាច្រើន ទៅលើខ្លឹមសាររឿង ព្រោះដើម្បីធ្វើយ៉ាងណា ឱ្យទស្សនិកជន មើលហើយទទួលអារម្មណ៍ថាជារសជាតិថ្មី។

លោក ហ៊ុយ យ៉ាឡេង អ្នកដឹកនាំរឿង និងជាតួសម្ដែង (ស្ដាំ)

លោក យ៉ាឡេង បន្ថែម៖«កុំឱ្យអ្នកទស្សនានិយាយថា កុនបង ឡេង ដូចតែមុនៗ ដូច្នេះដាច់ខាតខ្ញុំត្រូវតែធ្វើឱ្យខុសមុនតែម្ដង។ ឱ្យអ្នកទស្សនា មើលហើយឃើញប្លែកពីមួយរឿងទៅមួយរឿង។ ខ្ញុំមើលរឿងស្រុកគេច្រើន និងមើលរឿងក្នុងស្រុកដែរ ប្រមូលទិន្នន័យហើយ ទើបខ្ញុំអាចធ្វើរឿងនេះបាន»។

ទោះជាយ៉ាងណា លោក យ៉ាឡេង ក៏បានបន្ថែមដែរថា ប្រសិនគ្រប់គ្នាចង់បានសុខ សូមកុំច្រណែនគ្នា គួរជួយគ្នាទៅវិញទៅមក ដោយមិនគិតមានក្រ។ លោកថាប្រសិនមនុស្សចេះជួយគ្នាទៅវិញទៅមក នោះទាំងក្នុងសង្គមគ្រួសារ និងសង្គមជាតិ និងមានការរីកចម្រើន។

«តែងតែមានការច្រណែន អ្នកណាមេធំ អ្នកណាមេតូច អ្នកណាធ្វើការតិច អ្នកណាធ្វើការច្រើន។ តែងតែមានការប្រៀបធៀបគ្នាបែបនេះហើយ។ អ្នកនៅក្នុងស្រុក ច្រណែនអ្នកនៅក្នុងព្រៃ នេះគឺជារឿងពិត ដែលខ្ញុំដកស្រង់ចេញពីរឿង មា(ពូ)ខ្ញុំដែរ»។ នេះជាការបញ្ជាក់បន្ថែមរបស់លោក ហ៊ុយ យ៉ាឡេង។

ចំណែកលោក លៀក លីណា អ្នកគ្រប់គ្រងទូទៅនៃផលិតកម្ម LD Picture ដែលបានចាប់ដៃសហការជាមួយលោក ហ៊ុយ យ៉ាឡេង ក្នុងការផលិតរឿង “ខ្មោចចូល” បានប្រាប់សារព័ត៌មានថ្មីៗថារឿង “ខ្មោចចូល” មានគុណភាពល្អ ទើបលោកសម្រេចចិត្តសហការផលិតជាមួយលោក យ៉ាឡេង។

និយាយក្នុងទឹកមុខ ហ្មត់ចត់លោក លៀក លីណា បន្ថែម៖«រឿង”ខ្មោចចូល” គាត់យកមកជួបពួកបង។ បងមើលឃើញថាល្អ។ មួយរយៈក្រោយនេះ គាត់នៅតែឯង មានការខ្វះខាត ទាំងថវិកា ទាំងក្រុមការងារ ដូច្នេះមកជាមួយ LD យើងទៅជាមួយគ្នា»។

លោក លៀក លីណា អ្នកចាត់ការទូទៅក្នុងផលិតកម្ម LD Picture (ឆ្វេង)

អ្នកគ្រប់គ្រងទូទៅនៃផលិតកម្ម LD Picture បានប្រកាសថាផលិតកម្មរបស់លោក បើកទូលាយសម្រាប់ ផលិតករ អ្នកដឹកនាំរឿង និងអ្នកនិពន្ធគ្រប់រូប ក្នុងការសហការផលិត ប្រសិនក្រុមទាំងនោះខ្វះថវិកា ខ្វះក្រុមការងារ ឬខ្វះធនធានផ្សេងៗ។ ទោះជាយ៉ាងណាក៏ដោយ ការសហការនេះ លោក លីណា ថាទាល់តែសាច់រឿងល្អ ដោយឆ្លងកាត់ការវាយតម្លៃពីផលិតកម្ម LDជាមុន ទើបផលិតកម្មចូលរួមសហការជាមួយ។

«យើង (ផលិតកម្ម LD Picture) ចង់ធ្វើការរួមគ្នាជាមួយអ្នកពន្ធរឿងផ្សេងៗ និងអ្នកដឹកនាំរឿងពីខាងក្រៅ។ ក្រុមការងារយើងមានច្រើនហើយ ប៉ុន្តែយើងនៅតែត្រូវការអ្នកខាងក្រៅ ព្រោះទស្សនិកជន គាត់ចង់បានអ្វីដែលថ្មី។ ផលិតកម្មមិនមែនជាដៃគូប្រកួតប្រជែងគ្នាឡើយ តែជាភាគីត្រូវសហការគ្នា ព្រោះវិស័យភាពយន្តនៅស្រុកខ្មែរនៅតូច គួរតែពង្រីកគួរតែសហការគ្នា»។ នេះជាការអះអាងរបស់លោក លីណា។

ជាតួឯកស្រីក្នុងរឿង “ខ្មោចចូល” កញ្ញា លឹម ស្រីពៅ ដែលមានឈ្មោះក្នុងសិល្បៈថា អេឡា បានបង្ហាញអារម្មណ៍ពេញចិត្តខ្លាំង ដែលបានសម្ដែងក្នុងរឿងនេះ។ សប្បាយចិត្តខ្លាំង ដោយសារបានសម្ដែងក្នុងផលិតកម្មធំ និងបានសម្ដែងជាមួយអ្នកដឹកនាំរឿងផ្ទាល់ គឺលោក ហ៊ុយ យ៉ាឡេង។

ជាអ្នកគាំទ្រលោក ហ៊ុយ យ៉ាឡេង តាំងពីអំឡុងឆ្នាំ២០១៦ ក្នុងរឿង ”វិកលចរិត” កាលនោះ ស្រីពៅ ទើបតែប្រឡូកក្នុងវិស័យសិល្បៈដំបូង។ ក្រោយពីមើលរឿងនោះហើយ នាងមានក្ដីប្រាថ្នាចង់ក្លាយជាតួសម្ដែងដ៏ល្អម្នាក់ គឺល្អដូចជាលោក ហ៊ុយ យ៉ាឡេង។ នារីសើចស្រស់រាងខ្ពស់ស្រឡះរូបនេះ អះអាងថានាងតែងតែស្រមៃ ចង់ធ្វើការជាមួយលោក យ៉ាឡេង។ រហូតដល់ឆ្នាំ២០២៣នេះ នាងពិតជារំភើបចិត្ត ព្រោះបំណងប្រាថ្នាបានសម្រេច។

កញ្ញា លឹម ស្រីពៅ តួឯកស្រីក្នុងរឿង ខ្មោចចូល

នារីសម្បុរសបែកផ្លាឈូកដ៏ស្រស់ស្អាតរូបនេះបន្ថែម៖«នៅពេលដែលខ្ញុំបានមើលរឿង “វិកលចរិត” ខ្ញុំពិតជាចង់ក្លាយជាតួសម្ដែងដែលល្អដូចជាគាត់ មានទាំងកាយវិកា និងសកម្មភាពដូចពិត។ ខ្ញុំតែងតែចង់ធ្វើការជាមួយគាត់។ រហូតដល់ឆ្នាំ២០២៣នេះ ខ្ញុំបានធ្វើការជាមួយគាត់មែន ហើយថែមទាំងបានសម្ដែងជាមួយគាត់ទៀត ខ្ញុំពិតជាសប្បាយចិត្តខ្លាំងណាស់»។

ក្នុងរឿង “ខ្មោចចូល” អេឡា ថាឈុតដែលនាងពិបាកសម្ដែងជាងគេ គឺឈុតវាយតួប្រុសដោយឈើជ្រុង។ និយាយបណ្ដើរសើចបណ្ដើរ នារីសក់ក្ដោបខ្លីត្រឹមករូបនេះ ពន្យល់៖«ទស្សនិកជនមើលទៅហាក់ដូចជាធម្មតាទេ ប៉ុន្តែធាតុពិតខ្ញុំថតច្រើនដងមែនទែន។ បង ឡេង ពេលថតគាត់ចូលចិត្តពិត។ ខ្ញុំមាឌតូច ហើយឈើជ្រុងធំ ពេលខ្ញុំកាន់កម្លាំងខ្ញុំអត់ដល់ទេ ហើយពេលខ្ញុំវ៉ៃ ខ្ញុំព្យាយាមវ៉ៃគាត់តិចៗ ប៉ុន្តែគាត់មិនយកទេ។

ថតខុសៗ គាត់អត់យករហូត ថតច្រើនដងឡើងខ្ញុំអស់កម្លាំង។ លើកចុងក្រោយខ្ញុំគិតថា ខ្ញុំដាក់មែនទែនហើយ។ ខ្ញុំដាក់មែនបង ឮសូរតែភូសហ្មងណា។ គាត់នៅស្ងៀម គាត់សំងំ គាត់ទប់ក្បាល ខ្ញុំគិតថាចប់ ឈាមមកបាត់ហើយមិនដឹង? ពេលនោះភ័យផង លំបាកផងដោយសារយើងថតយូរមែនទែន។ ឈុតនោះខ្ញុំថតខុសចង់១០ដងដែរ»។

ចំណែកឈុតដែលលំបាកមួយទៀត ពុំមែនជាការសម្ដែងឡើយ តែជាការអង្គុយនៅមួយកន្លែង រយៈពេលរហូតដល់ទៅជិត៣ម៉ោង ដោយមិនអាចកម្រើក ឬក្រោកទៅណាបាន។

«មានឈុតមួយទៀត វគ្គរលូតកូន។ ឈុតហ្នឹងខ្ញុំត្រូវអង្គុយនៅលើពូកហ្នឹង ជិត៣ម៉ោងគឺយូរមែនទែន។ ខ្ញុំមិនអាចរើខ្លួនបានទេ ដើម្បីកុំឱ្យខុសរ៉ាក់គ័រ (ខុសសកម្មភាព ឬខុសទីតាំងប្លង់)។ ដោយសារឈុតនេះមានឈាម ប្រសិនខ្ញុំបម្រាស វាខុសរ៉ាក់គ័រហើយ ឈាមហ្នឹងវាប្រឡាក់ពូកទៀត ព្រោះយើងមិនអាចដូរពូក៣ឬ៤ដងបានទេ ដូច្នេះឈុតនេះលំបាកមែនទែន»។ នេះជាការត្អូញត្អែររបស់ អេឡា។

អ្នកទស្សនាដើរចេញពីរោងកុន ក្រោយមើលរឿង ខ្មោចចូល ចប់

ចំពោះឈុតដែលនាងពេញចិត្តបំផុតវិញ គឺឈុតដែលនាងច្រៀងជាមួយតួឯកប្រុស មុនពេលតួឯកប្រុស លាភរិយាចេញទៅធ្វើសង្គ្រាម។ ឈុតនេះធ្វើឱ្យនាងក្ដុកក្ដួល ព្រោះបុរសម្នាក់បានលះបង់គ្រួសារ ទៅធ្វើ សង្គ្រាម ដើម្បីជាតិមាតុភូមិ។

ស្រីពៅ និយាយទាំងទឹកមុខស្រងូត៖«ដូចក្នុងរឿងគាត់និយាយអ៊ីចឹង គាត់ទៅធ្វើសង្គ្រាម មិនមែនដើម្បីបង្កើតសង្គ្រាមទេ គឺធ្វើសង្គ្រាមដើម្បីរំលត់សង្គ្រាម ដើម្បីឱ្យប្រទេសស្ងប់ស្ងាត់។ វាពិតជាបានប៉ះអារម្មណ៍ខ្ញុំ។ អ្វីៗត្រូវរលាយទាំងអស់ នៅពេលមានសង្គ្រាម សុភមង្គលគ្រួសារក៏គ្មានទៀតដែរ»។

តាមរយៈរឿងនេះ កញ្ញាស្នើរសុំឱ្យមានការរួបរួមគ្នា ទាំងកម្រិតប្រទេសកម្ពុជា និងពិភពលោក ព្រោះនៅពេលមានសង្គ្រាម នឹងមានការបែកបាក់ ទាំងគ្រួសារ បងប្អូន ញាតិមិត្ត ហើយគ្រប់យ៉ាងក៏រលាយ។

វិលមកលោក លៀក លីណា វិញ។ អ្នកគ្រប់គ្រងទូទៅនៃផលិតកម្ម LD Picture បានបញ្ជាក់ថា ផលិតកម្មរបស់ខ្លួនតែងបានដាក់គោលដៅ នាំភាពយន្តខ្មែរទៅទីផ្សារក្រៅប្រទេស ជាលក្ខណៈផ្លូវការក្នុងការចែកចាយ។ បានន័យថាមានក្រុមហ៊ុន ចាំចែកផ្សាយត្រឹមត្រូវ មិនមែនទៅជួយរោងភាពយន្តគេដើម្បីចាក់បញ្ចាំងឡើយ។

កន្លងមកផលិតកម្មនេះបាននាំយកភាពយន្តខ្មែរ ចេញទៅទីផ្សារក្រៅប្រទេសបានដោយជោគជ័យផងដែរ គឺរឿង “នាឡិកាដាស់វិញ្ញាណ” (The Clock)។ ក្រៅពីនោះ ផលិតកម្មខាងលើបានត្រៀម ភាពយន្តមួយចំនួនទៀត ដែលមានទាំងទើបបញ្ចប់ការថត និងបន្តថតនៅខែខាងមុខបន្តបន្ទាប់ទៀត។ ក្នុងភាពយន្តមួយ ផលិតកម្ម LD បានអញ្ជើញតួសម្ដែងភូមាមួយរូប តួថៃ២រូបដែលល្បីខ្លាំង តួវៀតណាម រួមទាំងតួសម្ដែងធំៗរបស់ខ្មែរសម្ដែងផងដែរ។ រឿងនេះបានត្រៀមនាំចេញ ទៅក្រៅប្រទេសយ៉ាងច្បាស់លាស់ ដោយបានភ្ជាប់ទំនាក់ទំនងរួចរាល់ហើយ។ លោកថារឿង”ខ្មោចចូល” ក៏អាចនាំចេញទៅទីផ្សារក្រៅប្រទេសបានដែរ ប៉ុន្តែត្រូវការការគាំទ្រពីក្នុងស្រុកសិន។

«ធម្មតារឿង ទាល់តែយើងចាក់ខ្លាំងក្នុងស្រុកសិន ទើបគេមើលឃើញថា ប្រជាជនយើងគាំទ្រខ្លាំង រឿងហ្នឹងវាល្អហើយ ទើបគេទទួលស្គាល់ដែរ។ រឿង ”នាឡិកាដាស់វិញ្ញាណ” ក្នុងស្រុកគាំទ្រខ្លាំងហើយ ពេលនាំចេញទៅក្រៅ គេទទួលស្គាល់។ គេមិនមែនចេះតែយកទេ ទាល់តែរឿងយើងល្អដែរ ទើបគេទទួល។ រឿងមានគុណភាពល្អ អ្នកណាក៏ធ្វើបានដែរ ប៉ុន្តែមានអ្នកគាំទ្រឬអត់?

សូមបញ្ជាក់ថារឿង “ខ្មោចចូល” ចាក់បញ្ចាំងចាប់ពីថ្ងៃទី២៧ ខែកក្កដា ឆ្នាំ២០២៣នេះ នៅគ្រប់រោងកុនទាំងអស់៕