កីឡាអន្តរជាតិ
អន្តរជាតិ
គ្រូបង្វឹកអង់គ្លេសថា កីឡាករផ្លាស់ទៅអារ៉ាប៊ីសាអូឌីត មិនប៉ះពាល់ដល់ការតស៊ូមតិ របស់អ្នកស្រលាញ់ភេទដូចគ្នាឡើយ
×
លោក Gareth Southgate បាននិយាយថា ការសម្រេចចិត្តរបស់កីឡាករ ផ្លាស់ទៅកាន់ក្លិប Al-Ettifaq ស្ថិតនៅក្នុងប្រទេសអារ៉ាប៊ីសាអូឌីត មិនប៉ះពាល់ដល់មុខតំណែងជាអ្នកការពារសិទ្ធិតស៊ូមតិ សម្រាប់សិទ្ធិអ្នកស្រលាញ់ភេទដូចគ្នា LGBTQ+ឡើយ។
កីឡាករវ័យ ៣៣ឆ្នាំ Henderson បានចូលរួមជាមួយក្លិប Al-Ettifaq ជាមួយកិច្ចសន្យារយៈពេល ៣ឆ្នាំ ក្រោយរួមរស់រយៈពេល ១២ឆ្នាំ ជាមួយនឹងក្រុម Liverpool កាលពីខែមុន។ ការផ្លាស់ទៅកាន់អារ៉ាប៊ីសាអូឌីត ដែលជាទីកន្លែងប្រកាន់លើការស្រលាញ់ភេទដូចគ្នា ដែលត្រូវបានចាត់ទុកថាខុសច្បាប់ ខណៈ Henderson ជាកីឡាករអង់គ្លេសម្នាក់ ដែលតែងតែគាំទ្រដល់ការស្រលាញ់ភេទដូចគ្នា LGBTQ+។
សេចក្តីថ្លែងការណ៍ មួយរបស់ក្រុមអ្នកគាំទ្រ LGBTQ+ នៅក្នុងប្រទេសអង់គ្លេសបាននិយាយថា ខ្សែបម្រើ Henderson «បាត់បង់ការគោរពពីមនុស្សជាច្រើន ដែលបានផ្តល់តម្លៃ និងការទុកចិត្តលើគាត់»។
នាកិច្ចសម្ភាសមួយក្នុងកម្មវិធី TalkSPORT លោក Gareth Southgate បានលើកឡើងអំពីការផ្ទេររបស់ កីឡាករវ័យ ៣៣ឆ្នាំ ថាមិនប៉ះពាល់ដល់ការតស៊ូមតិសម្រាប់អ្នកស្រលាញ់ភេទដូចគ្នាឡើយ។
«វាមិនមែនជារឿងសម្រាប់ខ្ញុំដែលត្រូវវិនិច្ឆ័យបុគ្គលណាម្នាក់ឡើយ ថាតើពួកគេនៅក្នុងបាល់ទាត់ ឬនៅក្នុងឧស្សាហកម្មផ្សេងទៀតទេ។ ខ្ញុំមិនគិតឡើយថារូបគេនឹងផ្លាស់ប្តូរនូវអ្ វីដែលរូបគេធ្លាប់បានធ្វើនឹងជឿជាក់លើ ដូច្នេះយើងកំពុងតែស្ថិតនៅក្នុងពិភពដ៏ស្មុកស្មាញមួយ […] ការផ្លាស់ទៅទឹកដីអារ៉ាប៊ីសាអូឌីត មិនប៉ះពាល់ដល់តំណែងអ្នកតស៊ូមតិសម្រាប់អ្នកស្រលាញ់ភេទដូចគ្នា LGBTQ+ របស់ Henderson ឡើយ នេះគ្រាន់តែពួកគេមានទស្សនៈខ្លាំងចំពោះរឿងនេះតែប៉ុណ្ណោះ។»។ លោក Southgate បាននិយាយបែបនេះ។
មកដល់ពេលបច្ចុប្បន្ននេះក្របខណ្ឌ Saudi Pro League បានប្រមូលយកកីឡាករល្បីៗពីតំបន់អឺរ៉ុបប្រមាណជាង ២០នាក់ ដោយបានចាយប្រាក់ជាង ៥០០លានដុល្លារ ត្រឹមរយៈពេល ២ខែចុងក្រោយ។
កីឡាករដែលបានផ្លាស់ទៅរួមមានម្ចាស់ពាន Ballon d’Or ១សម័យ Karim Benzema, និងម្ចាស់ពានរង្វាន់ World Cup 2018 កីឡាករ N’Golo Kante។ មិនត្រឹមតែប៉ុណោះលោក Steven Gerrard ក៏បានទៅដឹកនាំក្រុម Al-Ettifaq ផងដែរ៕
Tag:
Jordan Henderson
Gareth Southgate
© រក្សាសិទ្ធិដោយ thmeythmey.com