ប៊ន សុផាត់ ជានិស្សិតទើបបញ្ចប់ថ្នាក់បរិញ្ញាបត្ររងផ្នែកវិស្វកម្មសំណង់ស៊ីវិល នៃវិទ្យាស្ថានជាតិពហុ​បច្ចេកទេស​​អង្គរ។ សុផាត់ បានចូលហ្វឹកហាត់ការងារតាំងពីរៀនឆ្នាំទី១ និងកំពុងបំពេញការងារក្នុង​ក្រុមហ៊ុនឯកជនមួយកន្លែង ដែលចុះម៉ៅការសំណង់តាមខេត្តរាជធានីផ្សេងៗ។ ទោះសិក្សាបានពីរឆ្នាំ តែយុវជន សុផាត់ មានជំនឿចិត្តខ្ពស់លើបទពិសោធន៍ការងារដែលមាន និងចំណេះដឹងដែលរៀនពី សាលា។ 

 

«តាមសមត្ថភាពអាចធ្វើ ​ចូល៨០ទៅ៩០ភាគរយព្រោះបានចូលធ្វើការជាមួយក្រុមហ៊ុន​តាំងពី​ចូលរៀនឆ្នាំទី១។ ក្នុងនោះជាមួយក្រុមហ៊ុនក្នុងគម្រោងផ្លូវ៣៨ខ្សែក្រុងសៀមរាប និងគម្រោងខាង​បាត់ដំបង់ជាមួយខាងADBជាដើម»។ នេះជាការបញ្ជាក់ពីយុវជន សុផាត់។

 

យុវជន សុផាត់ ក៏បានលើកទឹកចិត្តដល់យុវជនដទៃទៀតដែលរៀនបានតិច និងមិនបាន​ចប់បាក់ឌុបជាដើមដោយសារកត្តាជីវភាព និងផ្សេងៗកុំអាលអស់សង្ឃឹម គឺត្រូវចូលរៀនជំនាញវិជ្ជាជីវៈ​ដែលខ្លួនស្រឡាញ់ ដើម្បីបានជំនាញមួយសម្រាប់ខ្លួនឯងនាពេលអនាគត។ សុផាត់ បន្ថែមថា៖​«ប្រសិនប្អូនៗបោះបង់​ការសិក្សា រៀនទាប អាចមករៀនជំនាញបច្ចេកទេស ដោយសាលា​មានផ្តល់​អាហារូបករណ៍ ការឧបត្ថម្ភចាប់ពីC1 ដល់បរិញ្ញាបត្រ ហើយសាលានឹងផ្តល់ឱកាសការងារ មិនបាច់​ចំណាកស្រុកទៅក្រៅទេ»។

 

ចំណែកលោកស្រី នូ ផាន់នី បច្ចុប្បន្នជាមន្រ្តីបម្រើការងារនៅអគ្គិសនីសៀមរាប។ ទើបទទួលសញ្ញាបត្រ​បរិញ្ញាបត្ររងអគ្គិសនី ស្រ្តីរូបនេះបញ្ជាក់ថា ស្រ្តីក៏អាចរៀនជំនាញអគ្គិសនីបានដែរ ហើយជំនាញមិន​ប្រកាន់​​ភេទទេ សំខាន់យើងមានគោលដៅមួយពិតប្រាកដ។ ក្នុងបទសម្ភាសជាមួយ​សារព័ត៌មានឌីជីថលថ្មីៗនៅចុងខែ កក្កដា លោកស្រី ផាន់នី ពន្យល់ដូច្នេះថា៖«ជំនាញនេះនារីមានតិច និងចង់លើកទឹកចិត្តនារីកាន់តែច្រើន ចូលរៀនផ្នែកហ្នឹងដើម្បីលើកកម្ពស់ផ្នែកនេះសម្រាប់នារី»។

 

ក្រៅពីពេញចិត្តរៀនជំនាញអគ្គិសនី លោកស្រី ផាន់នី បញ្ជាក់ថា ខ្លួនក៏ទទួលបានការលើកទឹកចិត្តពី គ្រួសារផងដែរ។ ដ្បិតអីពួកគេយល់ថា ជំនាញនេះមានទីផ្សារល្អ គ្រប់ទីកន្លែងសុទ្ធតែមានតម្រូវការភ្លើង ដូច្នេះវត្តមានស្រ្តីក៏នឹងជួយអភិវឌ្ឍន៍វិស័យនេះកាន់តែល្អប្រសើរផងដែរ។ លោកស្រី ផាន់នី បន្ថែមថា៖« ជំនាញនេះសំខាន់សម្រាប់ទីផ្សារ បច្ចុប្បន្នប្រជាជនត្រូវការភ្លើងច្រើន។​ សូមឱ្យមានការជំរុញ​​លើកទឹកចិត្ត​​អំពីអ្នកជុំវិញខ្លួន សង្គមឱ្យនារីចូលរៀនអគ្គិសនីច្រើន ជាការល្អសម្រាប់​សង្គម មិនមែនបុរសធ្វើបាន នារីធ្វើមិនបាននោះទេ»។ 

 

មន្រ្តីគ្រប់គ្រងកិច្ចសន្យានៃអគ្គិសនីសៀមរាបរូបនេះ ក៏បានបង្ហាញក្ដីមោទកភាពសម្រាប់ខ្លួនឯងផងដែរ​ដែលបានរៀនជំនាញនេះ ពិសេសអរគុណសាលា​ដែលមានវគ្គសិក្សាជាច្រើនសម្រួលដល់សិស្សក្រីក្រ និងអ្នករៀនបានទាប ឱ្យពួកគេបានចូលរៀន និងការឧបត្ថម្ភផ្សេងៗ។

 

ងាកទៅយុវជន សឿន ភក្តី នោះវិញ ក៏ទើបបញ្ចប់ថ្នាក់បរិញ្ញាបត្ររងផ្នែកវិទ្យាសាស្រ្ត និងព័ត៌មានវិទ្យា  ឬហៅថា IT ពីវិទ្យាស្ថានជាតិពហុបច្ចេកទេសអង្គរផងដែរ។ ភក្ដីយល់ថា សាលានេះផ្តល់ឱកាសល្អ សម្រាប់យុវជន ពិសេសអ្នកសិក្សាបានតិច បោះបង់ការសិក្សាជាដើម ព្រោះសាលានេះទទួលសិស្សឱ្យ រៀនមិនគិតពីកម្រិតថ្នាក់ឡើយ។ 

 

ដូចយុវជនដទៃទៀតដែរ ភក្ដី មើលឃើញពីសារសំខាន់នៃជំនាញវិជ្ជាជីវៈ។ ភក្ដី លើកឡើងដូច្នេះថា៖« តាមសព្វថ្ងៃជំនាញវិជ្ជាជីវៈមានសក្ដានុពលខ្លាំង ព្រោះកម្ពុជាជាប្រទេសកំពុងអភិវឌ្ឍន៍យើងត្រូវការអ្នក ជំនាញកាន់តែច្រើនកាន់តែល្អ។ ខ្ញុំលើកទឹកចិត្តដល់ពួកគាត់ [យុវជន] ខិតខំសិក្សា និងស្វែងរក​សាលារៀន​​ឱ្យបានច្រើន ព្រោះគេផ្តល់ឱកាសយើងច្រើនសព្វថ្ងៃ»៕