ការត្រួតពិនិត្យរយៈពេល៣ថ្ងៃគិតត្រឹមថ្ងៃទី៥ ខែសីហា បានកើតឡើងនៅពេលអាម៉េរិក និងកូរ៉េខាងត្បូងត្រៀមធ្វើសមយុទ្ធរួមគ្នាជុំបន្ទាប់ដែលគ្រោងធ្វើនៅចុងខែនេះ។ ភាពតានតឹងនៅឧបទ្វីបកូរ៉េនៅតែស្ថិតនៅកម្រិតខ្ពស់ក្នុងរយៈពេលប៉ុន្មានឆ្នាំមកនេះ ដោយសារការសាកល្បងអាវុធបស់កូរ៉េខាងជើង និងសមយុទ្ធយោធារួមគ្នារវាងអាម៉េរិក និងកូរ៉េខាងត្បូង ដែលកូរ៉េខាងជើងចាត់ទុកជាការត្រៀមឈ្លានខ្លួន។ 

 

អំឡុងទស្សនកិច្ចនៅរោងចក្រផលិតប្រព័ន្ធកាំភ្លើងធំខ្នាតធំ លោក គីម ជុងអ៊ុន បានសង្កត់ធ្ងន់លើការទទួលខុសត្រូវ និងភារកិច្ចសំខាន់ៗរបស់រោងចក្រក្នុងការត្រៀមខ្លួនជាស្រេចសង្គ្រាមរបស់កូរ៉េខាងជើង។ បើតាម KCNA លោក គីម បានសរសើរកិច្ចខិតខំប្រឹងប្រែងរបស់រោងចក្រដែលប្រើវិធីសាស្រ្តវិទ្យាសាស្រ្ត និងបច្ចេកវិទ្យាដើម្បីបង្កើនគុណភាពសម្បកគ្រាប់ និងបង្កើនល្បឿនផលិត ប៉ុន្តែលោកក៏អំពាវនាវឱ្យអភិវឌ្ឍ និងផលិតសំបកប្រភេទថ្មីដែរ។

 

នៅឯរោងចក្រផលិតឡានដើម្បីបាញ់និងដឹកជញ្ជូនមីស៊ីលផ្លោងវិញ មេដឹកនាំកូរ៉េខាងជើងរូបនេះ ចាត់ទុកការបង្កើនការផ្គត់ផ្គង់ឡាននេះ ជាអាទិភាពចម្បងសម្រាប់យោធា។ លោក គីម​ ក៏ទៅត្រួតពិនិត្យ

 នៅរោងចក្រផលិតម៉ាស៊ីនសម្រាប់កាំជ្រួចប្រដេញ និងយន្តហោះគ្មានមនុស្សបើក និងរោងចក្រផលិតអាវុធតូចមួយកន្លែងទៀត។ ទីភ្នាក់ងារព័ត៌មានរដ្ឋកូរ៉េខាងជើង ក៏បញ្ចេញរូបថតលោក គីម សាកល្បងកាំភ្លើងវែងផងដែរ។ 

 

មិនមានព័ត៌មានលម្អិតអ្វីច្រើនពីដំណើរទស្សនកិច្ចនេះឡើយ ប៉ុន្តែអ្នកជំនាញខ្លះជឿថា វាក៏អាចពាក់ព័ន្ធនឹងកិច្ចសហប្រតិបត្តិការយោធាជាមួយទីក្រុងមូស្គូជុំវិញការផ្គត់ផ្គង់កាំភ្លើងធំ និងគ្រាប់រំសេវផ្សេងទៀតដែលលោកខាងលិចធ្លាប់សង្ស័យកន្លងមក។

 

នៅចំពោះមុខការប្រឈមមុខដាក់គ្នាកាន់តែខ្លាំងជាមួយទីក្រុងវ៉ាស៊ីនតោន និងទីក្រុងសេអ៊ូល ទីក្រុងព្យុងយ៉ាងបានបង្កើនទំនាក់ទំនងជាដៃគូសំខាន់មានទីក្រុងមូស្គូ និងទីក្រុងប៉េកាំងជាដើម។ កាលពីខែមុន មន្ត្រីជាន់ខ្ពស់រុស្ស៊ី និងចិន បានធ្វើទស្សនកិច្ចនៅកូរ៉េខាងជើងដើម្បីចូលរួមពិធីអបអរទិវាជ័យជម្នះដែលជាខួបបញ្ចប់សង្រ្គាមកូរ៉េ៕