ជាតិ
ឡៅ ពេជ្រ ពីស្រ្តីដែលខ្លាចខ្សែភ្លើងក្លាយជាអ្នកជំនាញតបណ្ដាញភ្លើងក្នុងអគារ ឡៅ ពេជ្រ ពេលកំពុងបំពេញការងារតបណ្ដាញភ្លើងនៅក្នុងអាគារ។
× សៀមរាប៖ កញ្ញា ឡៅ ពេជ្រ ទើបបញ្ចប់វគ្គជំនាញតបណ្ដាញក្នុងអគារពីវិទ្យាស្ថានជាតិពហុបច្ចេកទេសអង្គរ ដែលជាសេនាធិការរបស់ក្រសួងការងារ និងបណ្ដុះបណ្ដាល វិជ្ជាជីវៈ។ បច្ចុប្បន្ន ពេជ្រ បានក្លាយអ្នកជំនាញភ្លើង ខណៈពីមុនគេជាក្មេងស្រីមួយរូបដែលខ្លាចខ្សែភ្លើង។
មានវ័យ២៧ឆ្នាំ ឡៅ ពេជ្រ ជាអ្នកភូមិព្នៅ សង្កាត់សំបួរ ក្រុងសៀមរាប។ នាងរៀនបានត្រឹមថ្នាក់ទី១១ និងមានឱកាសចូលរៀនជំនាញវិជ្ជាជីវៈនៅវិទ្យាស្ថានជាតិពហុបច្ចេកទេសអង្គរ តាមការណែនាំពីមិត្តភក្ដិ។ ក្នុងសំដីសំដៅទន់ភ្លន់ ពេជ្រ ប្រាប់ថា នាងចូលរៀនជំនាញតបណ្ដាញភ្លើងក្នុងអគារ ក្នុងកម្រិតវគ្គC2 រយៈពេលមួយឆ្នាំ និងគ្រោងបន្តមួយកម្រិតទៀត។ សព្វថ្ងៃ នាងកំពុងបំពេញការងារ នៅក្នុងក្រុមហ៊ុនម៉ៅការឯកជនមួយកន្លែង និងមានប្រាក់ខែសមរម្យ។
ឡៅ ពេជ្រ ពីស្រ្តីដែលខ្លាចខ្សែភ្លើងក្លាយជាអ្នកតបណ្ដាញភ្លើងក្នុងអគារ
ជំនាញវិជ្ជាជីវៈជួយឱ្យ ពេជ្រ មានក្ដីសង្ឃឹម និងបំពេញក្ដីស្រមៃដែលធ្លាប់មានកន្លងមក។ នាងធ្លាប់អស់សង្ឃឹម ក្រោយសម្រេចឈប់រៀនត្រឹមថ្នាក់ទី១១ នៅឆ្នាំ២០១៣ ដោយសារកត្តាជីវភាព។ នាងរំលឹកថា «ពីមុនមានអារម្មណ៍ថាស្ដាយដែរ ដោយសារគ្រួសារយើងខ្វះខាត យើងរៀនអត់បានចប់ដូចគេ ហើយការងារក៏អត់ល្អដូចគេដែរ ប្រាក់ខែក៏បានតិចតួច»។
ក្រោយឈប់រៀន ពេជ្រ បានចេញធ្វើការជាអ្នករត់តុ ដោយទទួលប្រាក់ខែដំបូងចំនួន៦០ដុល្លារ។ កំឡុងពេលធ្វើការនោះ ពេជ្រ បានស្គាល់មិត្តភក្ដិ និងណែនាំនាងឱ្យចូលរៀនជំនាញនៅសាលាបច្ចេកទេសជាមួយគ្នា។ ជាកូនទី៥ក្នុងចំណោមបងប្អូន៦នាក់ ពេជ្រ បានឈប់ធ្វើការជាអ្នករត់តុនៅឆ្នាំ ២០១៩ ក្រោយចាប់ផ្តើមចុះកម្មសិក្សាជំនាញតបណ្ដាញភ្លើង។ «ខាងសាលាបានរកការងារឱ្យយើង ប្រាក់ខែរៀងគួរសមជាងមុនដែរ ពេលចុះស្ដារដំបូងបាន ១៨០ដុល្លារ»។ នេះជាការបញ្ជាក់របស់ ពេជ្រ។
ជំនាញវិជ្ជាជីវៈបានក្លាយជាក្ដីសង្ឃឹមថ្មីសម្រាប់យុវតី ពេជ្រ ដែលពីមុនមើលមិនឃើញពីអនាគតរបស់ខ្លួន។ ពេជ្រ យល់ថា ទោះនាងទៅដល់ទីណា ជំនាញដែលនាងខំប្រឹងរៀននៅជាប់នឹងខ្លួនគេជានិច្ច ដែលអាចប្រើប្រាស់សម្រាប់រកចំណូលក្នុងសេដ្ឋកិច្ចគ្រួសារបាន។ នាងបន្ថែមថា៖« ជំនាញវិជ្ជាជីវៈ ផ្តល់សារសំខាន់ខ្លាំងណាស់សម្រាប់យុវជន ព្រោះឥឡូវប្រទេសជាតិកំពុងជឿនលឿន គេត្រូវការអ្នកជំនាញច្រើន ហើយរៀនមួយយូរទេ រយៈពេលខ្លី»។ នាងបន្តថា៖« ទោះរៀនមិនចប់បាក់ឌុបក៏អាចរៀនបាន។ ខ្ញុំមានមោទនភាពសម្រាប់ខ្លួនឯង ពីមុនធ្លាប់តែស្រមៃ មិននឹកស្មានថាខ្លួនឯងបានឈរដល់ចំណុចហ្នឹង ហើយអរគុណសាលាដែលឱ្យខ្ញុំចូលរៀន និងមានការងារធ្វើសមរម្យ»៕
Tag:
អគ្គិសនី
ជំនាញវិជ្ជាជីវៈ
© រក្សាសិទ្ធិដោយ thmeythmey.com