សន្ទស្សន៍តម្លៃអង្ករទាំងអស់របស់ FAO ដែលតាមដានតម្លៃនៅក្នុងប្រទេសនាំចេញសំខាន់ៗជា​មធ្យម​មាន១២៩,៧ពិន្ទុក្នុងខែកក្កដាធៀបនឹង​១២៦,២ពិន្ទុសម្រាប់ខែមិថុនា។ FAO បញ្ជាក់ថា ពិន្ទុខែកក្កដា ជាកម្រិតខ្ពស់បំផុតចាប់តាំងពីខែកញ្ញាឆ្នាំ២០១១មក។

 

សន្ទស្សន៍តម្លៃម្ហូបអាហារពិភពលោកទាំងមូល ក៏បានកើនឡើងផងដែរនៅក្នុងខែកក្កដា ដែលជាការស្ទុះងើបឡើងវិញពីកម្រិតទាបក្នុងរយៈពេលពីរឆ្នាំចុងក្រោយ។

 

ឥណ្ឌាដែលជាប្រទេសនាំចេញអង្ករប្រមាណ៤០ភាគរយទៅកាន់ទីផ្សារពិភពលោកកាលពីខែមុន បានផ្អាកការនាំចេញអង្ករ​របស់ខ្លួនដើម្បីទប់ស្កាត់តម្លៃក្នុងស្រុកដែលបានកើនឡើង​ដល់កម្រិត​ខ្ពស់​ខ្លាំង​ដោយសារអាកាសធាតុមិនប្រក្រតីដែលគំរាមកំហែងដល់ផលិតកម្មស្បៀងមួយនេះ។

 

បន្ថែមពីនេះ បាតុភូតអាកាសធាតុ El Nino ដែលបង្កជាគ្រោះរាំងស្ងួត និងកង្វះទឹកភ្លៀងនឹង បង្កើន​សម្ពាធដល់ទិន្នផលដំណាំស្រូវ និងដំណាំកសិកម្មផ្សេងៗផងដែរក្នុងប្រទេសតំបន់អាស៊ីអាគ្នេយ៍។

 

គួរបញ្ជាក់ថា ឥណ្ឌា ថៃ វៀតណាម កម្ពុជា និងប៉ាគីស្ថាន ជាប្រទេសនាំចេញអង្ករឈានមុខគេ ខណៈ​ចិន ហ្វីលីពីន បេណាំង សេណេហ្កាល់ នីហ្សេរីយ៉ា និង​ម៉ាឡេស៊ី ជា​អ្នក​នាំ​ចូលសំខាន់៕