សេដ្ឋកិច្ចអន្តរជាតិ
អន្តរជាតិ
តម្លៃអង្ករថៃឡើងខ្ពស់ ក្រោយឥណ្ឌាប្រកាសហាមឃាត់ការនាំចេញ រូបភាពពី AFP ។
× ការព្រួយបារម្ភនៃការផ្គត់ផ្គង់អង្ករមិនគ្រប់គ្រាន់ដោយសារការប្រែប្រួលអាកាសធាតុ និងជម្លោះនៃសង្គ្រាមអ៊ុយក្រែន និងការហាមប្រាមរបស់ឥណ្ឌា បានធ្វើឱ្យតម្លៃអង្ករនៅថៃឡើងថ្លៃខ្ពស់ដល់៦៤៨ដុល្លារក្នុងមួយតោន។ បច្ចុប្បន្នជាតម្លៃខ្ពស់បំផុតចាប់តាំងពីឆ្នាំ ២០០៨។
យោងតាមសមាគមអ្នកនាំចេញអង្ករថៃ តម្លៃអង្ករបាក់ថៃនៅថ្ងៃទី ៩ ខែសីហា បានឡើងដល់ ៦៤៨ ដុល្លារក្នុងមួយតោន។ នេះជាកម្រិតខ្ពស់បំផុតក្នុងរយៈពេល ១៥ឆ្នាំ។ បើធៀបនឹងមួយខែមុន តម្លៃអង្ករបានកើនឡើង ២០ភាគរយ។ តម្លៃកនេះត្រូវបានគេចាត់ទុកជាសន្ទុះនៃការកើនថ្លៃខ្ពស់ក្នុងតំបន់អាស៊ី។
ការកើនឡើងតម្លៃនេះ ដោយសារក្តីបារម្ភអំពីកង្វះខាតនៃការផ្គត់ផ្គង់អង្ករពិភពលោក។ អាកាសធាតុក្តៅស្ងួតកំពុងគំរាមកំហែងដល់ដំណាំនៅថៃ ខណៈឥណ្ឌាដែលជាប្រទេសនាំចេញអង្ករដ៏ធំបំផុតរបស់ពិភពលោកកាលពីខែមុនបានហាមឃាត់ការលក់អង្ករប្រភេទមួយចំនួនទៅបរទេស។
បច្ចុប្បន្នអង្ក រគឺជាអាហារសំខាន់សម្រាប់មនុស្សរាប់ពាន់លាននាក់នៅអាស៊ី និងអាហ្វ្រិក។ ដូច្នេះ ការកើនឡើងតម្លៃនៃផលិតផលនេះអាចបង្កើនសម្ពាធអតិផរណានៅក្នុងប្រទេសទាំងនេះ ហើយក្នុងពេលជាមួយគ្នានេះនឹងទាញថ្លៃនាំចូលឡើងខ្ពស់។
ការកើនឡើងតម្លៃ ក៏នឹងធ្វើឱ្យការផ្គត់ផ្គង់ស្បៀងអាហារពិភពលោកកាន់តែតានតឹងថែមទៀត។ ទីផ្សារនេះបានជួបការលំបាកនាពេលថ្មីៗនេះ ដោយសារអាកាសធាតុធ្ងន់ធ្ងរ និងកាត់បន្ថយការផ្គត់ផ្គង់គ្រាប់ធញ្ញជាតិ ដោយសារសង្គ្រាមរុស្ស៊ី និងអ៊ុយក្រែន។
កាលពីចុងខែកក្កដា ត្រឹមតែមួយសប្ដាហ៍ប៉ុណ្ណោះ ឥណ្ឌា អេមីរ៉ាតអារ៉ាប់រួម (UAE) និងរុស្ស៊ីបានប្រកាសហាមលក់អង្ករទៅបរទេស។ ឥណ្ឌាបានបញ្ឈប់ការនាំចេញអង្ករមិនមែន ប្រភេទ Basmati (អង្ករដ៏ពេញនិយមនៅអាស៊ីខាងត្បូង) ដើម្បីបន្ថយតម្លៃក្នុងស្រុក និងទប់ស្កាត់អតិផរណា។
UAE ចង់ធានាការផ្គត់ផ្គង់ក្នុងស្រុក បន្ទាប់ពីឥណ្ឌាបានហាមឃាត់ការនាំចេញអង្ករ។ រុស្ស៊ីក៏បានហាមឃាត់ការលក់អង្ករទៅក្រៅប្រទេសរហូតដល់ដំណាច់ឆ្នាំដើម្បីរក្សាស្ថិរភាពទីផ្សារក្នុងស្រុក។
កាលពីដើមខែនេះ រដ្ឋាភិបាលថៃក៏បានលើកទឹកចិត្តប្រជាជន ឲ្យកាត់បន្ថយការដាំដុះស្រូវ ហើយប្តូរទៅដាំដំណាំផ្សេងទៀតដែលត្រូវការទឹកតិច។ ប្រទេសនាំចេញអង្ករធំទីពីររបស់ពិភពលោកកំពុងកត់ត្រាការថយចុះនៃបរិមាណទឹកភ្លៀងនៅក្នុងបរិបទដែលអាកាសធាតុនៅឆ្នាំក្រោយត្រូវបានព្យាករថានឹងស្ងួតដោយសារតែបាតុភូត El Nino ។ ទឹកភ្លៀងសរុបនៅភាគកណ្តាលប្រទេសបច្ចុប្បន្នមានកម្រិតទាបជាងធម្មតា ៤០ភាគរយ៕
© រក្សាសិទ្ធិដោយ thmeythmey.com