អង្គរវត្ត ទីតាំងល្អដាច់គេលើលោកសម្រាប់មើលថ្ងៃរះ និងស្ថិតនៅ Top 10 សម្រាប់មើលថ្ងៃលិច

ជាតិ

អង្គរវត្ត ទីតាំងល្អដាច់គេលើលោកសម្រាប់មើលថ្ងៃរះ និងស្ថិតនៅ Top 10 សម្រាប់មើលថ្ងៃលិច

16, Aug 2023 , 8:59 am

រូបភាព

ដោយ: រួបរួម

ទស្សនាព្រះអាទិត្យរះ (ថ្ងៃរះ) និងទស្សនាព្រះអាទិត្យអស្ដង្គត (ថ្ងៃលិច)! អង្គរវត្តគឺជាទីតាំងដ៏សក្តិសមបំផុតសម្រាប់អ្នកទេសចរទាំងឡាយ។ នេះបើផ្អែកតាមចំណាត់ថ្នាក់របស់គេហទំព័រ Morning Life។

មានមូលដ្ឋាននៅក្រុងឡុងដ៍ ចក្រភពអង់គ្លេស Morning Life ជាប្រភពដែលផ្តល់ព័ត៌មាន និងផ្តល់ចំណាត់ថ្នាក់ផ្សេងៗទាក់ទងនឹងគុណភាពជីវិតជាពិសេសភាពស្កប់ស្កល់នៃដំណេករហូតដល់ព្រឹកព្រលឹមដ៏ស្រស់ស្រាយ។

ព្រលឹមដ៏មានសុភមង្គលជាមួយថ្ងៃរះ និងព្រលប់ដ៏មានន័យជាមួយថ្ងៃលិច Morning Life ដែលបានប្រើប្រាស់ទិន្នន័យរបស់គេហទំព័រដំណើរកម្សាន្ត Tripadvisor បានឈានដល់ការកំណត់ចំណាត់ថ្នាក់ទីតាំងដ៏ល្អបំផុតសម្រាប់មើលថ្ងៃរះ (Sunrise) និងថ្ងៃលិច (Sunset)។ ទីតាំងទាំងនោះ មានរមណីយដ្ឋានប្រវត្តិសាស្ត្រ ទីសាធារណៈ តំបន់ភ្នំ តំបន់ឆ្នេរ អគារបុរាណ និងទំនើបនានា។

ពិតជាអស្ចារ្យណាស់សម្រាប់អង្គរវត្តរបស់កម្ពុជា ដែលមានការគាំទ្រដាច់គេក្នុងនាមជាទីតាំងដ៏ល្អបំផុតសម្រាប់ទស្សនាថ្ងៃរះ ( Best Places to See the Sunrise in the World)។ ចំនួនដែលបានលើកឡើង (Mentions) អំពីអង្គរវត្ត គឺមានជាង១ម៉ឺន ខណៈតំបន់ភ្នំភ្លើង Haleakala Crater នៃកោះហាវ៉ៃ សហរដ្ឋអាម៉េរិក ស្ថិតនៅលំដាប់ទីពីរ ដោយមានការលើកឡើងជិត៤០០០។

ចំពោះទីតាំងដ៏ល្អបំផុតសម្រាប់មើលថ្ងៃលិច (Best Places to See the Sunset in World) វិញ អង្គរវត្តស្ថិតនៅលេខរៀងទី៦ ដោយមានការលើកឡើងជា២៥០០ ខណៈទីតាំងលំដាប់លេខ១ គឺ តំបន់ផ្សារទំនើប Mollory Square ក្នុងរដ្ឋហ្វ្លរីដា សហរដ្ឋអាម៉េរិក ដោយមានការលើកឡើងជាង៩៨០០។