ទាំងស្នងការនៃស្នងការដ្ឋាននគរបាលខេត្ត និងអ្នកនាំពាក្យខេត្តសៀមរាប មិនទាន់អាចសុំការបញ្ជាក់ នៅឡើយទេ ជុំវិញករណីអ្នកទោសជនជាតិចិនត្រូវបានខ្មាន់កាំភ្លើងមួយក្រុម​រំដោះពេលកំពុងចូល​ពេទ្យធ្មេញមួយកន្លែងក្នុងក្រុងសៀមរាប។ ខ្មាន់កាំភ្លើង បានបិទមុខជិតនិងប្រដាប់ដោយអាវុធ បានចូលមករំដោះជនជាតិក្នុងពេទ្យធ្មេញមួយ ស្ថិតនៅតាមបណ្ដោយផ្លូវជាតិលេខ៦ នាភូមិតាភុល សង្កាត់ស្វាយដង្គំ។ ក្រោយមករថយន្តដែលរំដោះនោះ ត្រូវបានសមត្ថកិច្ចប្រទះ​ឃើញ​ទុកចោល លើដីទំនេរមួយនៅភូមិគ្រួស សង្កាត់ស្វាយដង្គំ និងមានវត្ថុតាងមួយចំនួន ដូចជាអាវុធ ខោអាវ និងរបាំងមុខ ជាដើម។ 

 

តាមការបញ្ជាក់ពីសមត្ថកិច្ច ហេតុការណ៍ខាងលើកើតឡើងនៅវេលាម៉ោងប្រមាណ៩ព្រឹក។ អ្នកទោសជនជាតិចិនដែលបានរត់គេចនោះកំពុងអនុវត្តន៍ទោសចំនួន៥២ឆ្នាំ ពីបទជួញដូរ​គ្រឿងញៀន និងត្រូវបានសមត្ថកិច្ចចាប់ខ្លួនបាននៅថ្ងៃទី១១ សីហា ឆ្នាំ២០០៩។ 

 

យ៉ាងណាមិញ ព័ត៌មានលម្អិតជាងនេះមិនទាន់អាចបញ្ជាក់ពីក្រុមសមត្ថកិច្ចនៅឡើយ។ សារព័ត៌មានឌីជីថលថ្មីៗនឹងព្យាយាមសុំការបំភ្លឺពីស្នងការខេត្តសៀមរាប ក៏ដូចជាអ្នកនាំពាក្យខេត្តបន្ថែមទៀត៕