មួយថ្ងៃក្រោយមហាក្សត្រតែងតាំងជានាយករដ្ឋមន្រ្តីទី៣០ លោក សេដ្ឋា ថាវីស៊ីន បានជួបជាមួយនាយករដ្ឋមន្រ្តី ប្រាយុទ្ធ ចន្ទអូចា ជាលើកដំបូង។ ក្នុងជំនួបនៅវិមានរដ្ឋាភិបាល មេដឹកនាំទាំងពីរ បានជជែកគ្នាប្រមាណ៤៥នាទី។

 

ក្រោយកិច្ចសន្ទនា លោក ស្រេតថា បានជម្រាបលាលោកប្រាយុទ្ធ និងមិនបានបញ្ជាក់ប្រាប់អ្នកសារព័ត៌មានពីប្រធានបទ ដែលបានលើកយកទៅពិភាក្សាឡើយ។ 

 

តាមការចុះផ្សាយរបស់សារព័ត៌មាន Khaosod English លោក សេដ្ឋា បានជួបជាមួយលោកប្រាយុទ្ធ ដើម្បីស្វះស្វែងរកការប្រឹក្សាយោបល់។ ការគ្រប់គ្រងប្រទេស សេដ្ឋកិច្ច ឬបញ្ហាផ្សេងៗ ដែលថៃកំពុងជួបប្រទះ អាចជាប្រធានបទរបស់មេដឹកនាំទាំងពីរ។ 

 

មុនជំនួបដោយផ្ទាល់នេះមួយថ្ងៃ លោក ប្រាយុទ្ធ បានអបអរនាយករដ្ឋមន្រ្តីថ្មី ហើយថែមទាំងជូនពរឱ្យលោក សេដ្ឋា ទទួលបានជោគជ័យក្នុងការដឹកនាំរដ្ឋាភិបាលទៀត។ 

 

បើទោះត្រូវបានតែងតាំងជានាយករដ្ឋមន្រ្តីក្ដី លោក សេដ្ឋា មិនទាន់អាចដឹកនាំរដ្ឋាភិបាលបានទេនៅពេលនេះ ដោយសារគណៈរដ្ឋមន្រ្តីរបស់លោក មិនទាន់ស្បថចូលកាន់តំណែង។ ម្យ៉ាងគណៈរដ្ឋមន្រ្តីថ្មី ក៏មិនទាន់រៀបចំរួចរាល់ផងដែរ។ តំណែងនាយករដ្ឋមន្រ្តីបណ្តោះអាសន្នរបស់លោកប្រាយុទ្ធ ត្រូវបញ្ចប់ នៅពេលលោក សេដ្ឋា ស្បថចូលកាន់តំណែង។ 

 

បើទោះមិនទាន់មានការបង្ហាញពីសមាសភាពសមាជិករដ្ឋាភិបាលពីលោក សេដ្ឋា ប៉ុន្តែកន្លងមក បក្ស Bhumjaithai ចង់បានតំណែងរដ្ឋមន្រ្តីចំនួន៤ និងអនុរដ្ឋមន្រ្តីចំនួន ៤។ លោក Anutin Charnvirakul មេដឹកនាំបក្ស Bhumjaithai បានបង្ហាញក្តីសង្ឃឹមថា បក្សរបស់ខ្លួន ចង់កាន់តំណែងក្នុងក្រសួង ដូចមាននៅក្នុងរដ្ឋាភិបាលអាណត្តិមុនដែរ។ កន្លងមក បក្សBhumjaithai កាន់ក្រសួងសុខាភិបាល និងដឹកជញ្ជូន នៅក្នុងរដ្ឋាភិបាលរបស់លោកប្រាយុទ្ធ ចន្ទអូចា៕