ជាតិ
នយោបាយជាតិ
×![]()
ភ្នំពេញ៖ រដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី បានប្ដេជ្ញាពង្រឹងភាពស្អាតស្អំនៅក្នុងរដ្ឋបាលសាធារណៈ ដូចមានចែងនៅក្នុងយុទ្ធសាស្ត្របញ្ចកោណ។ សេចក្តីប្រកាសប្ដេជ្ញាចិត្តរបស់លោករដ្ឋមន្ត្រី ត្រូវបានធ្វើឡើងនៅក្នុងពិធីសំណេះសំណាលជាមួយថ្នាក់ដឹកនាំ និងមន្ត្រីនៃក្រសួងមុខងារសាធារណៈជិត១ពាន់នាក់នៅព្រឹកថ្ងៃទី២៨ខែសីហានេះ។
ការកែទម្រង់ស្ថាប័ន ការពង្រឹងធនធានមនុស្សឱ្យមានប្រសិទ្ធភាព ការពង្រឹងភាពស្អាតស្អំនៅក្នុងរដ្ឋបាលសាធារណៈ មិនត្រឹមតែជាចំណុចស្នូលនៅក្នុងយុទ្ធសាស្ត្របញ្ចកោណរបស់រដ្ឋាភិបាលអាណត្តិទី៧ឡើយ។ ចំណុចទាំងនេះគឺជាចក្ខុវិស័យរបស់លោកនាយករដ្ឋមន្ត្រីផងដែរ។ នេះបើតាមការបញ្ជាក់របស់លោក ហ៊ុន ម៉ានី រដ្ឋមន្ត្រី ក្រសួងមុខងារសាធារណៈ ដែលបានប្រកាសថា លោកនឹងប្តេជ្ញាអនុវត្តចក្ខុវិស័យរបស់លោកនាយករដ្ឋមន្ត្រីនេះ។ លើសពីនេះ ដោយសារតែ ក្រសួងមុខងារសាធារណៈ ត្រូវដើរជាតួនាទីស្នូលនៃកំណែទម្រង់នេះ លោករដ្ឋមន្ត្រី អំពាវនាវដល់មន្ត្រីក្រោមឱវាទចូលរួមជាមួយលោក។
នៅចំពោះមុខថ្នាក់ដឹកនាំ និងមន្ត្រីដែលឡើងមកពីបណ្ដាខេត្តផងនោះ លោក ហ៊ុន ម៉ានី ថ្លែងយ៉ាងដូច្នេះ៖« ស្នូលនៃយុទ្ធសាស្ត្របញ្ចកោណ ផ្តោតលើកំណែទម្រង់ និងពង្រឹងអភិបាលកិច្ច ការធ្វើទំនើបកម្មស្ថាប័នរដ្ឋ ឱ្យក្លាយជារដ្ឋបាលសាធារណៈទំនើប ប្រកបដោយសមត្ថភាពខ្ពស់ វ័យឆ្លាត និងស្អាតស្អំ។ ខ្ញុំស្នើសុំថ្នាក់ដឹកនាំ និងមន្ត្រីថ្នាក់ជាតិ និងថ្នាក់ក្រោមជាតិនៃក្រសួងមុខងារសាធារណៈ សូមផ្តល់ជំនឿទុកចិត្តក្នុងការដឹកនាំរបស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត។»។
នៅក្នុងជំនួបទ្រង់ទ្រាយធំជាមួយថ្នាក់ដឹកនាំ និងមន្ត្រី លោករដ្ឋមន្ត្រីក៏មានឱកាសពន្យល់ប្រាប់មន្ត្រីរបស់ខ្លួនអំពីរបៀបរបបនៃអនុវត្តការងាររបស់លោកផងដែរ។ ជាពិសេស វេទិកានេះបានផ្ដល់ពេលវេលាឱ្យលោករដ្ឋមន្ត្រីអះអាងអំពីភាពស្អាតស្អំរបស់លោកផ្ទាល់ និងរបស់សមាជិកខុទ្ទកាល័យរបស់លោកផង។
លោក ហ៊ុន ម៉ានី បានអធិប្បាយថា៖«ឋានៈជារដ្ឋមន្ត្រី មិនមែនជាកេររបស់ខ្ញុំទេ។ ខ្ញុំទទួលបេសកកម្មដើម្បីដឹកនាំ និងលើកស្ទួយវិស័យនេះ។ យើងត្រូវខំប្រឹងប្រែង ក្នុងក្របខណ្ឌនៃនីតិកាលទី៧នេះ ដើម្បីបន្តបេសកកម្មរបស់ឯកឧត្តម ពេជ្រ ប៊ុនធិន ឯកឧត្តម ព្រុំ សុខា ជាមួយនឹងស្មារតីលើកស្ទួយវិស័យមុខងារសាធារណៈ ដើម្បីផលប្រយោជន៍របស់ប្រទេសជាតិ និងអ្នកជំនាន់ក្រោយ។»។
ចំពោះលោក ហ៊ុន ម៉ានី ក្រសួងរបស់លោកជាក្រសួងតូច ប៉ុន្តែមានតួនាទីស្នូល និងអម្រែកធ្ងន់ដែលធានានិរន្តរភាពរបស់ប្រទេសផងដែរ៕
Tag:
ហ៊ុន ម៉ានី
មុខងារសាធារណៈ
កែលម្អ
មន្ត្រីរាជការ
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 13 វិនាទី
