និស្សិតដែលបានទៅហាត់ការនៅអ៊ីស្រាអែល នឹងមានឱកាសរួមចំណែកជួយដល់វិស័យកសិកម្មកម្ពុជា តាមរយៈគោលនយោបាយអាទិភាពរបស់រដ្ឋាភិបាលអាណត្តិថ្មីនីតិកាលទី៧ គឺការពង្រាយអ្នកជំនាញកសិកម្មនៅតាមគ្រប់មូលដ្ឋាន ដើម្បីចូលរួមដោះស្រាយបញ្ហានានាក្នុងផលិតកម្មបានទាន់ពេលវេលា និងមានប្រសិទ្ធភាព។ នេះជាការបញ្ជាក់របស់លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នៅក្នុងឱកាសសំណេះសំណាលជាមួយនិស្សិតទាំង ២៥៥នាក់ កាលពីថ្ងៃទី៣១ ខែសីហា។ 
 

លោករដ្ឋមន្រ្តី គាំទ្រចំពោះកម្មវិធីហាត់ការខ្លីនេះ ដោយរំពឹងថា និស្សិតទាំងនោះនឹងយកជំនាញដែលបានរៀនពីអ៊ីស្រាអែល មកជួយដល់អភិវឌ្ឍវិស័យកសិកម្មកម្ពុជាវិញ។ និស្សិត ដែលចេញទៅហាត់ការជំនាញកសិកម្មនៅអ៊ីស្រាអែលមាន ២៥៥នាក់ ក្នុងនោះស្រី ៣៩នាក់។ 
 

នាឱកាសនោះ លោក ឌិត ទីណា បានណែនាំដល់និស្សិតឆ្នើមទាំងអស់ ត្រូវមានទំនាក់ទំនងល្អ ខិតខំរៀនសូត្រ ជាពិសេស ពង្រឹងសមត្ថភាពទាំងជំនាញ និងភាសា។ 
 

លោក ថ្លែងបន្ថែមថា៖«ប្អូនៗត្រូវបំពេញការងារឱ្យអស់ពីសមត្ថភាពតាមដែលអាចធ្វើទៅបាន មានភាពម្ចាស់ការ។ ពិសេសត្រូវពិចារណាថា តើការងារ និងបទពិសោធដែលរៀនសូត្របានពីបរទេស អាចយកមកអនុវត្តបានយ៉ាងដូចម្ដេចនៅកម្ពុជា ដើម្បីចូលរួមអភិវឌ្ឍវិស័យកសិកម្មនៅកម្ពុជាឱ្យមានភាពរីកចម្រើនឡើងបន្ថែមទៀត»។ 
 

ចាប់តាំងពីឆ្នាំ២០០៨មក ​មាននិស្សិតកម្ពុជាជិត២ពាន់នាក់ហើយ ដែលបានឱកាសទៅហាត់ការងារ ផ្នែកកសិកម្មនៅអ៊ីស្រាអែល។ និស្សិតកសិកម្មទាំងនោះ ភាគច្រើនត្រូវបានបណ្ដុះបណ្ដាលចំណេះដឹងបច្ចេកទេសកសិកម្មទាំងទ្រឹស្ដី និងការអនុវត្ត៕