«អារម្មណ៍រំភើប ពេលដឹងលទ្ធផលនោះមិនដឹងថារត់អោបអ្នកណា ចង់ទឹកភ្នែកអីផង ព្រោះអត់នឹកស្មានថាយើងអាចធ្វើបាន»។ នេះជាការលើកឡើងរបស់កញ្ញា សឿន សុខភត្រា ជាម្ចាស់ពានរង្វាន់សហគ្រិនស្រ្តីឆ្នើមឆ្នាំ២០២៣។

 

ការប្រកួតនេះ សុភត្រា មានពេលមួយខែប៉ុណ្ណោះ ដើម្បីរៀបចំ និងត្រៀមខ្លួនឡើងប្រកួត។ ការហ្វឹកហាត់បានត្រឹមត្រូវ និងរៀនពីចំណុចកែលម្អរបស់គ្រូបង្វឹក ធ្វើឱ្យ បេក្ខនារីរូបនេះធ្វើបានល្អ នៅថ្ងៃប្រកួត។ នេះជាការបញ្ជាក់ពី សុភត្រា។ នាងបន្ថែមថា កន្លងមក ធ្លាប់ចូលរៀនវគ្គសិក្សាសរសេរ​ផែនការអាជីវកម្ម និងប្រកួតទ្រង់ទ្រាយតូច តែការប្រកួតពេល​នេះចាត់ទុកថាជាការប្រកួតធំ និងដែលជំរុញឱ្យគេ​​ចង់ចូលរួមប្រកួតជាខ្លាំង ដើម្បីពង្រឹង​សមត្ថភាព​ផ្ទាល់ខ្លួន។ នាងលើកឡើង​ដូច្នេះថា៖« គិតថាការប្រឡងធំ និងចង់ពង្រឹងសមត្ថភាព​ខ្លួនឯងផង និងមានការជំរុញ​លើកទឹកចិត្ត​ពីក្រុមការងារ និងបងប្អូន ក៏ដាក់ពាក្យចូលរួម»។ 

 

ប្រធានសមាគមសហគ្រិនស្រ្តីកម្ពុជា លោកស្រី កែវ មុំ បានកើតសរសើរចំពោះការរៀបចំការប្រកួត​ពានរង្វាន់នារដូវកាលទី២នេះ។ សម្រាប់លោកស្រី បេក្ខនារីទាំង១២រូបដែលប្រជែងគ្នាក្នុងកម្មវិធីនេះ គឺសុទ្ធតែជាអ្នកឈ្នះ។ លោកស្រីបន្ថែមថា៖« អ្នកទាំងអស់គ្នាសុទ្ធតែឈ្នះដូចគ្នា គ្រាន់តែថាអ្នកណា​ជាអ្នកឆ្នើមជាងគេលើសគេបន្ដិច ដែលអាចកាន់ពាននេះបាន។ តែការឈ្នះនេះមិនមែន​យើងឈប់ការ​អភិវឌ្ឍបញ្ឈប់ការសិក្សារៀនសូត្រទេ គឺត្រូវបន្តទៀត កាលណាយើងប្រកបអាជីវកម្មកាន់តែធំ យើងត្រូវខិតខំប្រឹងប្រែងរៀនឱ្យកាន់តែច្រើន ពិសេសចូលរួមលើការបណ្ដុះបណ្ដាលផ្សេងៗ»។

 

ជាមួយគ្នានេះ លោកស្រី កែវ មុំ យល់ថា ការចូលរួមក្នុងកម្មវិធីខាងលើ គឺជាផ្នែកមួយជួយអភិវឌ្ឍន៍ សមត្ថភាពសហគ្រិនស្រ្តី ដែលអាចឱ្យពួកគេដឹងពីចំណុចខ្សោយ និងចំណុចខ្លាំងខ្លួនឯង ដែលនឹងជួយ អភិវឌ្ឍន៍អាជីវកម្មពួកគេកាន់តែល្អប្រសើរបន្ថែមទៀត។ លោកស្រី កែវ មុំ លើកឡើងដូច្នេះថា៖« សរសើរគ្រូបង្វឹកដែលធ្វើឱ្យបេក្ខនារីមានភាពក្លាហាន ឱ្យរកឃើញចំណុចខ្សោយ ពង្រឹងនិងបញ្ចេញ​សមត្ថភាព​នៅលើវេទិកាប្រកួត។ នេះជាសម័យបច្ចេកវិទ្យា ហើយការប្រកួតពានរង្វាន់នេះ​​មិនមែន​ចង់បានឈ្នះចាញ់អ្វីឡើយ គ្រាន់តែចង់ដឹងថាសមត្ថភាពយើង​ដើរដល់ណាហើយ នៅខ្វះត្រង់ណាទៀត»។

 

សូមបញ្ជាក់ថា នេះជារដូវកាលទី២ ដែលសមាគមសហគ្រិនស្រ្តីកម្ពុជាសាខាខេត្តសៀមរាប​បានរៀបចំការប្រកួតពានរង្វាន់នេះឡើង។ ហើយសហគ្រិនស្រ្តីដែលចូលរួមនៅលើកនេះមាន ១២រូប ក្នុងនោះមកពីខេត្តបាត់ដំបងចំនួន២រូប។ ចំណែកម្ចាស់ជ័យលាភីលេខ២បានទៅលើអ្នកស្រី ឃីន សូដា មកពីអាជីវកម្ម ខេមបូឌានហ៊ែរអ៊ិចស្ទីនសិន និងជ័យលាភីលេខ៣ បានទៅកញ្ញា ប៉ែន មិនា មកពីអាជីវកម្មអាហារដ្ឋានប៉ែនចេង ស្ថិតនៅ​ខេត្តបាត់ដំបង៕