បក្សទាំង២៨នេះ ក្នុងចំណោមបក្សនយោបាយជាង៤០ ដែលបានចុះបញ្ជីនៅក្រសួងមហាផ្ទៃ បានស្នើសុំចូលឧត្តមក្រុមប្រឹក្សាពិគ្រោះ និងផ្ដល់យោបល់។ លោក ឈឹម ផលវរុណ សុំមិនបង្ហាញឈ្មោះបក្សទាំងនេះឡើយ។ 

 

ចំពោះការឈប់ទទួលពាក្យស្នើសុំចូលអង្គភាព គឺមានរយៈពេល១៤ថ្ងៃ ក្រោយព្រះរាជក្រឹត្យ ស្ដីពី​ការរៀបចំ និងការប្រព្រឹត្តទៅ​នៃឧត្ដមក្រុមប្រឹក្សា​ពិគ្រោះ និងផ្ដល់យោបល់​ បានអនុម័តចេញជាផ្លូវការ កាលពីថ្ងៃទី២៦ សីហា។ ដូច្នេះ នៅសល់៤ថ្ងៃទៀតប៉ុណ្ណោះ ក្នុងការដាក់ពាក្យសុំចូលអង្គភាពនេះ។ 

 

លោក ឈឹម ផលវរុណ បានបញ្ជាក់ថា ក្រោយពេលបញ្ចប់ការទទួលពាក្យ ខាងឧត្តមក្រុមប្រឹក្សាពិគ្រោះ និងផ្ដល់យោបល់ នឹងពិនិត្យសំណើរ ដែលបានដាក់ទាំងអស់។ ចំពោះការប្រជុំជាមួយបណ្ដាបក្សនយោបាយ ដែលបានដាក់ពាក្យស្នើសុំ លោកពុំទាន់ដឹង ឬកំណត់ថ្ងៃបានឡើយ។ 

 

បក្សនយោបាយនៅកម្ពុជា ដែលបានចុះបញ្ជីនៅក្រសួងមហាផ្ទៃ មានជាង៤០បក្ស ហើយក្នុងនោះមាន១៨បក្ស បានចូលរួមការបោះឆ្នោតជ្រើសតាំងតំណាងរាស្ត្រអាណត្តិទី៧។ ទាក់ទិននឹងការចូលរួមក្នុងឧត្តមក្រុមប្រឹក្សាពិគ្រោះ និងផ្ដល់យោបល់ នាពេលថ្មីៗ ឃើញមានបក្សខ្លះ ដែលធ្លាប់បានចូលរួម កាលពីអាណត្តិមុន បានស្នើសុំឱ្យមានកែប្រែនីតិវិធីធ្វើការងារមួយចំនួន។ ចំណែក បក្សខ្មែររួបរួមជាតិ គេឃើញមានការបែកបាក់ផ្ទៃក្នុង ដោយសារមានមតិផ្ទុយគ្នា ពាក់ព័ន្ធនឹងការសម្រេចឧត្តមក្រុមប្រឹក្សាពិគ្រោះ និងផ្ដល់យោបល់៕