លោក តាកាហាស៊ី ហ្វូមីអាគី បានប្រាប់ទៅ សម្ដេច ហ៊ុន ម៉ាណែត ថា វិនិយោគិនជប៉ុន ជាពិសេសសហគ្រាសធុនតូច និងមធ្យម (SMEs) កំពុងសម្លឹងឃើញការវិនិយោគនៅកម្ពុជាលើវិស័យចំនួនពីរ ក្នុងនោះរួមមាន ការផលិតទំនិញកែច្នៃ ដែលប្រើប្រាស់វត្ថុធាតុដើមកម្ពុជា និងបច្ចេកវិទ្យាទំនើបជប៉ុន ដើម្បីផលិតជាផលិតផលសម្រេច សម្រាប់នាំចេញ។ មួយទៀត គឺការបណ្តុះបណ្តាលជំនាញវិជ្ជាជីវៈ ដោយផ្តោតលើ សេវាបដិសណ្ឋារកិច្ច, មេកានិក យានយន្ត (សេវាជួសជុលរថយន្តជប៉ុន), ការតុបតែង និងកែសម្ផស្ស, សេវាថែទាំអ្នកជំងឺ-មនុស្សចាស់ និងជំនាញបច្ចេកវិទ្យាព័ត៌មាន និងឌីជីថល ជាដើម។ 
 

ក្នុងឱកាសនោះ សម្ដេច ហ៊ុន ម៉ាណែត បង្ហាញការគាំទ្រ និងជំរុញឱ្យសមាគមធុរកិច្ចជប៉ុន សហការ និងបង្កើនទំនាក់ទំនងការងារ ជាមួយភាគីពាក់ព័ន្ធរបស់កម្ពុជា ដើម្បីសម្រេចឱ្យបាននូវការវិនិយោគទាំងនេះ។ ម្យ៉ាងទៀត វិស័យមួយចំនួន ដែលលោក តាកាហាស៊ី ហ្វូមីអាគី បានលើកឡើងក៏កំពុងមានតម្រូវការផងដែរ។
 

សម្ដេច បានបញ្ជាក់បន្ថែមដូច្នេះថា៖« រាជរដ្ឋាភិបាលអាណត្តិទី៧ ក្រោមការដឹកនាំផ្ទាល់របស់ខ្ញុំ បានត្រៀមខ្លួនរួចជាស្រេច ដើម្បីសម្របសម្រួល សហការ និងគាំទ្រធុរកិច្ចជប៉ុន តាមរយៈគោល នយោបាយ និងកញ្ចប់លើកទឹកចិត្តដ៏ទាក់ទាញ និងជាក់លាក់»៕