លោក Santos ដែលធ្លាប់ជួយព័រទុយហ្កាល់ឈ្នះពាន Euro កាលពីឆ្នាំ ២០១៦ បានចូលកាន់តំណែងគ្រូបង្វឹកប៉ូឡូញកាលពីខែមករា ដើមឆ្នាំ ២០២៣ ជំនួសលោក Czeslaw Michniewicz ដែលត្រូវបានបណ្តេញចេញក្រោយក្រុមធ្លាក់ចេញពីការប្រកួត World Cup 2022 ត្រឹមវគ្គ ១៦ក្រុមចុងក្រោយ។ ក្រោយដឹកនាំបាន៨ខែ និង៦ប្រកួត គ្រូសញ្ជាតិព័រទុយហ្កាល់ ត្រូវប៉ូឡូញបញ្ចប់តំណែងវិញ។
 

សម្រាប់ការប្រកួតជម្រុះ Euro 2024 ប៉ូឡូញកំពុងស្ថិតក្នុងចំណាត់ថ្នាក់លេខ ៤ នៃពូល E ដោយមានត្រឹមតែ ៦ពិន្ទុ ពីការប្រកួតចំនួន ៥លើក។ ប៉ូឡូញមានគម្លាតពិន្ទុចំនួន ៤ពិន្ទុ ពីក្រុមកំពូលតារាងអាល់បានី នឹងក្រោម ២ពិន្ទុ ពីក្រុមសាធារណៈរដ្ឋឆែក និងម៉ុលដាវី។ 
 

ក្រោយរងបរាជ័យនៅក្នុងទីក្រុង Tirana កាលពីថ្ងៃទី១០ ខែកញ្ញា រួចមក លោក Santos ក៏បាននិយាយថាលោកនឹងមិនចុះចេញពីតំណែងឡើយ។ តែទោះជាយ៉ាងណាក្រោយការប្រកួតបានបញ្ចប់រយៈពេល ៣ថ្ងៃ សហព័ន្ធ PZPN បានសម្រេចចិត្តបញ្ចប់លោក Santos ដើម្បីស្តារស្ថានភាពក្រុមឡើងវិញ។
 

«ការជ្រើសរើសអ្នកចាត់ការថ្មីឥឡូវនេះ គឺជាអទិភាពមួយសម្រាប់ក្រុមប្រឹក្សាភិបាលនៃសមាគមបាល់ទាត់ប៉ូឡូញ (PZPN) ដូច្នេះយើងនឹងប្រកាសអ្នកថ្មីពេលដ៏ឆាប់ខាងមុខនេះ ថាតើគ្រូបង្វឹកថ្មីនឹងត្រូវបង្ហាញវត្តមាននៅពេលណា និងនៅទីកន្លែងណា។»។ នេះបើតាមសម្តីលោក Cezary Kulesza ប្រធាន PZPN។
 

ការប្រកួតដំបូងដែលលោក Santos ដឹកនាំរងបរាជ័យលទ្ធផល ៣-១ ក្រោមថ្វីជើងសាធារណៈរដ្ឋឆែកក្នុងការប្រកួតជម្រុះ Euro 2024 មុនពេលការប្រកួតទីពីរយកឈ្នះអាល់បានីលទ្ធផល ១-០ វិញ។
 

ប៉ូឡូញក៏បានបំបាក់អាល្លឺម៉ង់ក្នុងជំនួបមិត្តភាពកាលពីខែមិថុនា លទ្ធផល ២-០ មុនពេលវិលមកចាញ់ក្រុមម៉ុលដាវីនៅការប្រកួតពានរង្វាន់អឺរ៉ុបលទ្ធផល ៣-២ វិញ។
 

ការប្រកួតបន្ទាប់របស់ប៉ូឡូញនឹងត្រូវធ្វើដំណើរទៅប្រកួតទល់ក្រុមកោះ Faroe នៅក្នុងខែតុលា មុនពេលវិលត្រលប់មកបើកទ្វារផ្ទះស្វាគមន៍ក្រុមម៉ុលដាវីឡើងវិញសម្រាប់ជំនួបជើងទីពីរ៕