ខ្សែបម្រើសញ្ជាតិអ៊ីតាលី Marco Verratti បានចាកចេញពីក្រុម Paris Saint Germain ដោយផ្លាស់ទៅចូលរួមក្លិប Al Arabi របស់ប្រទេសកាតា នៃក្របខណ្ឌ Qatar’s Star League។ នេះបើតាមក្លិបស្ថិតក្នុងក្របខណ្ឌ Ligue 1 បារាំងប្រកាស់នាថ្ងៃទី១៣ ខែកញ្ញា។
បើតាមប្រព័ន្ធផ្សព្វផ្សាយរបស់អ៊ីតាលី ក្លិប Al Arabi នៃក្របខណ្ឌ Qatar’s Star League បានចំណាយប្រាក់ប្រមាណ ៤៥លានអឺរ៉ូ (៤៨,៣១លានដុល្លារ) សម្រាប់ខ្សែបម្រើវ័យ ៣០ឆ្នាំ ហើយដោយផ្តល់កិច្ចសន្យារយៈពេល ៣ឆ្នាំ នៅទឹកដីប្រទេសកាតា។
ក្រោយពេលចាកចេញ Verratti បាននិយាយប្រាប់ទៅកាន់គេហទំព័រក្លិប PSG ដោយបានអរគុណសម្រាប់ការស្នាក់នៅរយៈពេលជិត ១១ឆ្នាំជាមួយក្លិបយក្សបារាំងមួយនេះ។
«ខ្ញុំពិតជាមានមោទកភាពខ្លាំងដែលបានពាក់អាវរបស់ក្រុម Paris Saint Germain ច្រើនជាង ១សតវត្សរ៍ ហើយដែលបានប្រគៀកស្មាជាមួយកីឡាករដ៏អស្ចារ្យជាច្រើន ព្រមទាំងឈ្នះពានរង្វាន់ចំនួន ៣០។ PSG គឺជាក្លិបដែលមានអ្នកគាំទ្រ ដែលតែងតែផ្តល់តម្លៃដល់រូបខ្ញុំ ហើយស្ថិតនៅក្នុងដួងចិត្តរបស់ខ្ញុំ ខ្ញុំនឹងនៅតែជាសមាជិកនៃក្រុមនេះជារៀងរហូត។»។ Verratti បាននិយាយបែបនេះ។
Verratti ដែលមិនដែលប្រជែងក្នុងពានរង្វាន់ក្នុងស្រុក Serie A បានចូលរួមជាមួយក្រុម PSG ក្នុងឆ្នាំ ២០១២ ដោយផ្លាស់ចេញពីក្លិបស្ថិតក្នុងស្រុកកំណើតរបស់គេ គឺក្លិប Pescara ក្នុងតម្លៃ ១២លានអឺរ៉ូ (១២,៩លានដុល្លារ) អំឡុងរូបគេមានអាយុ ១៩ឆ្នាំ។
ចំណាយពេល ១១ រដូវកាលក្នុងក្លិប PSG ខ្សែបម្រើសញ្ជាតិអ៊ីតាលីបង្ហាញខ្លួនឱ្យក្រុមចំនួន ៤១៦ប្រកួត ដោយបានធ្វើឱ្យគេគឺជាកីឡាករទីពីរប្រចាំក្រុមដែលបានបង្ហាញខ្លួនលេងច្រើនជាងគេបំផុត ឈរពីក្រោមអតីតកីឡាករ Jean-Marc Pilorget ដែលបង្ហាញខ្លួនបាន ៤៣៥ប្រកួត។
កីឡាករវ័យ ៣០ឆ្នាំ បានជួយ PSG ឈ្នះពានរង្វាន់លីគកំពូលបារាំងចំនួន ៩លើក ដែលជាកំណត់ត្រាច្រើនបំផុតនៅក្នុង Ligue 1 ជាមួយនឹងពាន French Cups ចំនួន ៦លើក។ ក្រោយ PSG ស្ថិតក្រោមការដឹកនាំរបស់គ្រូបង្វឹកថ្មីលោក Luis Enrique កីឡាករសញ្ជាតិអ៊ីតាលីមិនស្ថិតក្រោមគម្រោងរបស់គ្រូបង្វឹកសញ្ជាតិអេស្ប៉ាញឡើយ។
កីឡាករល្អៗដែលបានចាកចេញពី PSG ក្រោមការដឹកនាំរបស់លោក Enrique រួមមាន Lionel Messi, Neymar Jr, Mauro Icardi និង Sergio Ramos ជាដើម។
ក្រៅពីបង្ហាញខ្លួនច្រើនឱ្យក្លិប PSG កីឡាករ Verratti ក៏បានបង្ហាញខ្លួន ៥៥លើកឱ្យក្រុមជម្រើសជាតិអ៊ីតាលី ហើយរកបាន ៣គ្រាប់ ហើយរូបគេក៏បានជួយអ៊ីតាលីឈ្នះពានរង្វាន់ Euro ឆ្នាំ ២០២០។
ក្លិប Al Arabi ដែលបុរសអ៊ីតាលីទៅចូលរួម គឺជាក្រុមលេខ ២ រដូវកាលមុន ដោយបញ្ចប់ចំណាត់ថ្នាក់ពីក្រោមក្រុម Al-Duhail នៃក្របខណ្ឌ Qatar Star League ហើយការចាប់ផ្តើមរដូវកាលថ្មីនេះក្លិប Al Arabi ឆ្លងកាត់ ៣ប្រកួតស្មើទាំង ៣ប្រកួត។ ទីផ្សារដោះដូរកីឡាកររបស់លីគកាតា នឹងត្រូវបិទនៅថ្ងៃទី១៨ ខែកញ្ញា៕