នៅលើគេហទំព័រនៃព្រឹត្តិការណ៍កីឡា Asian Games ទីក្រុងហាងចូវ អត្តពលិកកូរ៉េខាងជើងនឹងប្រកួតប្រជែងក្នុងប្រភេទវិញ្ញាសាកីឡាដូចជា អត្តពលកម្ម, កាយសម្ព័ន្ធ, បាល់បោះ, ប្រដាល់ និងលើកទម្ងន់ជាដើម។
 

កាលពីខែមិថុនាកន្លងទៅ កូរ៉េខាងជើងបានចុះឈ្មោះទៅប្រកួតកីឡាលើកទម្ងន់នៅប្រទេសគុយបា តែពួកគេមិនបានបង្ហាញខ្លួនឡើយ។
 

កាលពីឆ្នាំ ២០២២ កូរ៉េខាងជើងត្រូវបានគណៈកម្មាធិការអូឡាំពិកអន្តរជាតិ (IOC) ហាមឃាត់ពីការប្រកួតប្រជែងក្នុងព្រឹត្តិការណ៍កីឡាអូឡាំពិករដូវរងារក្នុងប្រទេសចិន ដោយសារតែប្រទេសនេះ មិនបានចូលរួមប្រកួតក្នុងព្រឹត្តិការណ៍កីឡាអូឡាំពិករដូវក្តៅក្នុងទីក្រុងតូក្យូកាលពីឆ្នាំ ២០២០ ព្រោះតែបញ្ហាបិទច្រកព្រំដែន និងការធ្វើដំណើរដោយសារជំងឺកូវីដ-១៩។
 

ចាប់តាំងពីរងគ្រោះដោយសារបញ្ហាជំងឺរាតត្បាតកូវីដ-១៩ កូរ៉េខាងជើងមិនដែលបញ្ជូនអត្តពលិកខ្លួនទៅចូលរួមការប្រកួតកីឡាអន្តរជាតិនានា ណាមួយឡើយ។
 

ការប្រកួតកីឡា Asian Games ទីក្រុងហាងចូវ ដែលធ្វើឡើងចាប់ពីថ្ងៃទី១៩ ខែកញ្ញា នឹងក្លាយជាការបង្ហាញវត្តមានជាថ្មីពីសំណាក់ប្រទេសកូរ៉េខាងជើង។ ក្រុមបាល់ទាត់កូរ៉េខាងជើងនឹងត្រូវជួបតទល់ជាក្រុមនឹងក្រុមបាល់ទាត់បុរសតៃវ៉ាន់នៅ ៤ថ្ងៃមុនកម្មវិធីបើកការប្រកួតជាផ្លូវការ។
 

កូរ៉េខាងជើងត្រូវបានគេដឹងថាជាប្រទេសមួយដែលមានអត្តពលិកខ្លាំងពូកែលើផ្នែកវិញ្ញាសាកីឡាលើកទម្ងន់ ដោយការប្រកួតបង្ហាញចុងក្រោយនៅក្នុងព្រឹត្តិការណ៍ Asian Games នៅក្នុងទីក្រុងហ្សាការតាឆ្នាំ ២០១៨ ពួកគេឈ្នះមេដាយ ចំនួន ៨ ពីវិញ្ញាសានេះ។
 

គួរបញ្ជាក់ថាព្រឹត្តិការណ៍ Asian Games ទីក្រុងហាងចូវនឹងបង្ហាញវត្តមានអត្តពលិកសរុបចំនួន ១២,២០០នាក់ ដើម្បីការប្រកួតប្រជែងគ្នាដណ្តើមមេដាយ ហើយការប្រកួតដែលចាប់ពីថ្ងៃទី១៩ ខែកញ្ញានេះ នឹងត្រូវបញ្ចប់នៅថ្ងៃទី៨ ខែតុលា៕